Numeri 25:1-18
25 Panthawe yomwe Aizirayeli ambakhala ku Sitimu, adayamba kuchita chigololo na akazi wa ku Mowabu.
2 Akazi mwawo adayamba kuchemera Aizirayeli kuti ambakapereke ntsembe kwa milungu yawo ndipo Aizirayeli mwawo adayamba kudya ntsembe mwizo komasoti kugwadira milungu ya Amowabu.
3 Pamwapo Aizirayeli adayamba kutumikirambo Baala wa ku Peori, ndipo Yahova adakalipa maninge na Aizirayeli mwawo.
4 Manje Yahova adauza Mose kuti: “Phata wose omwe ankutsogolera wanthu mwawo, ndipo uwaphe nkuwamanika pamuti pamaso pa Yahova dzuwa inkutentha maninge. Uchite vimwivi kuti ukali wa Yahova womwe wagakira Aizirayeli umale.”
5 Pamwapo Mose adauza oweruza wa mu Izirayeli kuti: “Aliyese wa imwepo aphe wanthu wake omwe ankutumikira Baala wa ku Peori.”
6 Koma mwadzidzidzi wanthu mwawo adandoona mwamuna munango wa Chiizirayeli ankubwera na nkazi wa Chimidiyani. Adabwera naye pafupi na azibale wake, pamaso pa Mose na gulu yose ya Aizirayeli. Panthawe mwiyi nkuti Aizirayeli mwawo ankulira pansuwo wa chihema chogumanako.
7 Pinihasi mwana wa Eleazara, mzukulu wa wantsembe Aroni padaona vimwivi, nthawe mwiyoletu adanyamuka pakati pa gulu mwiyo nkunyamula nkondo* m’manja mwake.
8 Iye adathamangira mwamuna wa Chiizirayeli ule mpakana kukangena mutenti yake ndipo adalasa wose awiri mwawo na nkondo muyo. Mwamuna wa Chiizirayeli muyo adamulasira kubodzi na nkazi muyo mpakana nkondo muyo udabulira ku chidzo choberekera cha nkazi muyo. Padateno muliri muyo udaleka pakati pa Aizirayeli.
9 Omwe adafa na muliri muyo enzepo 24 000.
10 Manje Yahova adauza Mose kuti:
11 “Pinihasi mwana wa Eleazara mzukulu wa wantsembe Aroni, wabweza ukali wangu pa Aizirayeli, ndawa alibe kulekerera ne pang’ono kuti wanthu pakati pawo ambapikisane nane. Ndipomwapa niribe kuwadzonga Aizirayeli mwawa, olo kuti nifuna kuti wanthu ambadzipereke kwa ine nekha.
12 Ndawa ya vimwivi, umuuze Pinihasi kuti: ‘Ninkuchita naye mbverano wa ntendere.
13 Umuyu ukhale mbverano wauntsembe kwa iye na kwa mbadwa zake mpakana kalekale, ndawa alibe kulekerera vakuti wanthu ambapikisane na Mulungu wake ndipo adapsyimphiriza machimo ya Aizirayeli.’”
14 Dzina ya mwamuna wa Chiizirayeli yemwe adapherewa kubodzi na nkazi ule wa Chimidiyani yenze Zimiri mwana wa Salu, ndipo wenze mtsogoleri wa nyumba ya azibereki wa dzinza ya Simiyoni.
15 Dzina ya nkazi wa Chimidiyani yemwe adaphewa uyo yenze Kozibi, mwana wa Zuri. Zuri wenze mtsogoleri wa dzinza ya nyumba inango ya azibereki wa ku Midiyani.
16 Patsogolo pake Yahova adauza Mose kuti:
17 “Abonereseni Amidiyani ndipo muwaphe,
18 ndawa akubwereserani tsoka mochenjera pakukunyengererani kuti muchimwe ku Peori. Muwaphe ndawa ya vomwe wachita mulongosi wawo Kozibi, mwana wa mtsogoleri wa ku Midiyani, yemwe adaphewa pantsiku yomwe muliri udakugwerani ndawa ya vomwe vidachitika ku Peori.”
Mawu ya m’nyantsi
^ Panango kuti: “nkondo ung’ono.”
