Numeri 17:1-13
-
Mpsyimbo ya Aroni idachita mafololi ninge chizindikiro (1-13)
17 Manje Yahova adauza Mose kuti:
2 “Yankhula na Aizirayeli, ndipo utenge mpsyimbo* ibodzi kuchokera kudzinza iriyose, kwa mtsogoleri wa dzinza mwiyo. Zikhalepo mpsyimbo 12 ndipo unembe dzina ya mtsogoleri aliyese pa mpsyimbo yake.
3 Pa mpsyimbo ya dzinza ya Levi unembepo dzina ya Aroni, ndawa mpsyimbo iriyose ikuimira mtsogoleri wa dzinza.
4 Mpsyimbo mwizo uziikhe muchihema chogumanako, patsogolo pa Umboni, pomwe nigumana nawe nthawe zose.
5 Mpsyimbo ya munthu yemwe nimusankhule uyo idzaphukire, ndipo nidzamalise kung’ung’uzika kwa Aizirayeli komwe ankuchita motsutsana na inepano komasoti motsutsana na iwepo.”
6 Manje Mose adayankhula na Aizirayeli ndipo atsogoleri wawo wose adapereka mpsyimbo zawo. Mtsogoleri aliyese adapereka mpsyimbo ibodzi ya dzinza yake. Penze mpsyimbo 12, ndipo ibodzi yenze ya Aroni.
7 Patsogolo pake Mose adayenda kukaikha mpsyimbo mwizo pamaso pa Yahova muchihema cha Umboni.
8 Mangwana yake, Mose padangena muchihema cha Umboni mwicho, adandowona kuti mpsyimbo ya Aroni yoimira banja ya Levi yaphukira. Mpsyimbo mwiyo yenze idaphukira ndipo imbachita maluwa na kubala vipaso vakupsa va amondi.
9 Patsogolo pake Mose adatenga mpsyimbo zose pamaso pa Yahova nkuyenda nazo kwa Aizirayeli wose. Atsogoleri wale adanyang’ana mpsyimbo mwizo, ndipo aliyese adatengapo yake.
10 Pamwapo Yahova adauza Mose kuti: “Bwezera mpsyimbo ya Aroni patsogolo pa Umboni. Uisunge kuti ikhale chikumbuso kwa wana opanduka mwawa, na cholinga chakuti aleke kung’ung’uzika motsutsana na inepano nakuti osati afe.”
11 Nthawe mwiyoletu Mose adachita mobverana na vomwe Yahova adamulamula. Adachitadi vimwivo.
12 Pamwapo Aizirayeli adauza Mose kuti: “Isepano tichite kufa. Shuwadi timale ise. Tose timale basi.
13 Aliyese yemwe afenderere chihema cha Yahova ati afe. Koma shuwadi isepano tife mwa khaindi mwiyi?”
Mawu ya m’nyantsi
^ Panango kuti: “ndodo.”
