Numeri 27:1-23
27 Patsogolo pake wana akazi wa Tselofekadi adafika kwa Mose. Tselofekadi wenze mwana wa Heferi, Heferi wenze mwana wa Giliyadi, Giliyadi wenze mwana wa Makiri ndipo Makiri wenze mwana wa Manase. Wose mwawa enze ochokera kumabanja ya Manase mwana wa Yosefe. Wana akazi wa Tselofekadi mwawa madzina yawo enze Mala, Nowa, Hogila Milika na Tiriza.
2 Iwo adayenda kukaimirira pamaso pa Mose, wantsembe Eleazara, atsogoleri na gulu yose, pansuwo wa chihema chogumanako nkunena kuti:
3 “Ababa wathu adafera muchipululu. Koma iwo enzelini mugulu ya wanthu omwe ambabverana na Kora, omwe adasonkhana kuti atsutsane na Yahova. Ababa wathu mwawo adafa ndawa ya chimo yawo ndipo enze alibe mwana mwamuna.
4 Ko dzina ya ababa wathu ipfudzike kubanja yawo ndawa yakuti alibe kukhalako na mwana mwamuna? Pulizi, tipaseni malo pakati pa azibale wa ababa wathu.”
5 Pamwapo Mose adapereka dandaulo yawo mwiyo pamaso pa Yahova.”
6 Manje Yahova adauza Mose kuti:
7 “Wana akazi wa Tselofekadi analazau.* Uwapasedi malo kuti yakhale yawo pakati pa azibale wa ababa wawo. Vose vomwe venze va ababa wawo vikhale vawo.
8 Ndipo uuze Aizirayeli kuti: ‘Peno mwamuna wamwalira alibe mwana mwamuna, mumbapereke chuma chake kwa mwana wake nkazi.
9 Peno alibe mwana nkazi, mumbapereke chuma chake kwa azibale wake.
10 Peno alibe azibale, mumbapereke chuma chake kwa azibale wa ababa wake.
11 Peno ababa wake alibe azibale wawo, mumbapereke chuma chake kwa wachibale wake wapafupi wakubanja kwawo, ndipo ambatenge chuma mwicho kuti chikhale chake. Chigamulo mwichi chidzakhale lamulo kwa Aizirayeli, mobverana na vomwe Yahova walamula Mose.’”
12 Patsogolo pake Yahova adauza Mose kuti: “Kwera phiri ya Abarimu, ukawone dziko yomwe nidzaipereke kwa Aizirayeli.
13 Ukaiona dziko mwiyo, iwepo udzaikhiwembo m’manda ninge mwavidakhalira na azibereki wako* komasoti Aroni m’bale wako,
14 ndawa pomwe gulu ire idapiringana nane muchipululu cha Zini, imwepo mudapandukira mawu yangu ndipo mudakangira kunilemekeza pamaso pa gulu mwiyo pamadzi ya Meriba ku Kadesi, muchipululu cha Zini.”
15 Patsogolo pake Mose adauza Yahova kuti:
16 “Imwe Yahova, Mulungu yemwe mupereka moyo kwa wanthu wose,* sankhulani munthu wakuti ambatsogolere gulu mwiyi.
17 Musankhule munthu kuti akhale mtsogoleri wawo pa vinthu vose, nakuti ambawatsogolere pa vochita vawo vose, kuti gulu ya Yahova osati ikhale ninge nkhosa zilibe nyakabusa.”
18 Pamwapo Yahova adauza Mose kuti: “Tenga Yoswa mwana wa Nuni, munthu wolimba ntima,* ndipo uikhe djanja yako pa iye.
19 Patsogolo pake umuimiririse pamaso pa wantsembe Eleazara na pamaso pa gulu yose ndipo umuikhe kuti akhale mtsogoleri pamaso pawo.
20 Umupaseko mphanvu zako,* kuti gulu yose ya Aizirayeli imbamubvere.
21 Yoswa uyo ambaimirire pamaso pa wantsembe Eleazara, ndipo Eleazara ambabvunzire chigamulo cha Yahova m’malo mwa Yoswa pophatisa basa maere ya Urimu. Aliyese ambatewedze vomwe walamula,* peno ni Yoswa uyo, Aizirayeli na gulu yose.”
22 Pamwapo Mose adachitadi mobverana na vomwe Yahova adalamula. Adatenga Yoswa nkumuimiririsa pamaso pa wantsembe Eleazara na pamaso pa gulu yose mwiyo.
23 Patsogolo pake adaikha manja yake pa iye nkumuikha kukhala mtsogoleri mobverana na vomwe Yahova adanena kupitira mwa Mose.
Mawu ya m’nyantsi
^ Panango kuti: “ankunena vobveka.”
^ Muchiyankhulo choyambirira adati: “udzagone pabodzi na azibereki wako.”
^ Muchiyankhulo choyambirira adati: “Mulungu wa mizimu ya vamoyo vose.”
^ Muchiyankhulo choyambirira adati: “munthu yemwe mwa iye muli mzimu.”
^ Panango kuti: “ulemerero wako.”
^ Panango kuti: “vomwe Mulungu walamula,” panango kupitira mwa Yoswa panango Eleazara.”
