Numeri 11:1-35

  • Mulungu adawabweresera moto ndawa yakuti ambadandaula (1-3)

  • Wanthu adayamba kulirira nyama (4-9)

  • Mose ambadziwona kuti ni wosayenerera (10-15)

  • Yahova adapereka mzimu kwa akulu 70 (16-25)

  • Eledadi na Medadi; Yoswa adachita ntsanje ndawa ambachita nkhawa na Mose (26-30)

  • Adabweresa vinziri; wanthu adalangiwa ndawa ya dyera (31-35)

11  Manje wanthu mwawo adayamba kudandaula maninge pamaso pa Yahova. Yahova padabva kudandaula muko ukali wake udagaka, ndipo moto wochokera kwa Yahova udawagakira nkunyekesa anango pa wanthu mwawo kumalire kwa nsasa. 2  Koma wanthu mwawo padayamba kulirira Mose, iye adagwigwirira Yahova ndipo moto muyo udadzimwa. 3  Pamwapo malo mwayo adayapasa dzina yakuti Tabera,* ndawa moto wochokera kwa Yahova udawagakira pamalo mwayo. 4  Patsogolo pake gulu ya wanthu wa makhaindi yosiyanasiyana yomwe yenze pakati pawo idawonesa ntima wadyera, ndipo nawombo Aizirayeli adayamba kulira nkumbanena kuti: “Ni mbani yemwe atipase nyama yakuti tidye? 5  Tinkukumbukira ntsomba zafovolo zomwe timbadya ku Iguputo, madzakaka, mabvembe, adyo na ntsabola za khaindi na khaindi! 6  Koma pano na mphanvuizo tiribe. Palibe chinango chatinkuwona, koma mana basi.” 7  Mana mwayo yenze ninge mapira,* ndipo yambaoneka ninge utomoni wowonekera nkati ninge girazi. 8  Wanthu mwawo ambamwazikana nkumbakalokota mana mwayo. Akamaliza, ambayapeya pa mphero panango kuyadera m’banda. Patsogolo pake ambayabwabwasa mum’phika, panango kukonza makeke* yabololindo ndipo yambakoma ninge keke yoikha mafuta. 9  Pansasa pakachita mame usiku, manambo yambagwa. 10  Mose adabva wanthu ankulira m’banja iriyose, munthu aliyese pansuwo wa tenti yake. Ndipo Yahova adakalipa maninge komasoti Mose adakwinyirira maninge. 11  Manje Mose adauza Yahova kuti: “Ndawa chani mwaniboneresa teneuyu inepano ntumiki wanu? Ndawa chani mwaniumira ntima tene, nkunisenzesa chintolo cha wanthu wose mwawa? 12  Ko ndinepano nidakhala na mimba ya wanthu wose mwawa? Ko ndinepano nidawabereka, kuti muniuze kuti: ‘Uwanyamule pachifuwa pako ninge momwe nyabasa* anyamulira mwana woyamwa,’ nkuyenda nawo kudziko yomwe mudalumbirira kuti mudzaipereke kwa azibereki wawo? 13  Ko niiwone kuponi nyama yakuti nipase wanthu wose mwawa? Ndawa iwo ankupitiriza kunilirira kuti: ‘Tipase nyama tidye!’ 14  Ningakwaniselini kuwasamalira nekha wanthu wose mwawa. Basa mwiyi yanikulira. 15  Peno vimwivi ndivo vati mumbanichitire, mungachite bwino kundonipha manje so. Koma peno mwanikomera ntima, ayi kuniwonesa pomwe tsoka inango.” 16  Yahova adadawira Mose kuti: “Unisonkhanisire akulu 70 pakati pa akulu wa Izirayeli, omwe uwaona* kuti ni akulu komasoti onyang’anira pakati pa wanthu mwawo. Uyende nawo kuchihema chogumanako, ndipo akaimirire kumuko pabodzi na iwepo. 17  Inepano nibwere kumuko kudzayankhula nawe ndipo nidzatenge gawo inango ya mzimu womwe uli pa iwepo nkuuikha pa wanthu mwawo. Pamwapo iwo adzakuthandize kunyamula udindo wonyang’anira wanthu mwawo, kuti osati uunyamule wekha. 18  Wanthu mwawo uwauze kuti: ‘Mudzichenese pakukonzekera mangwana, ndawa mudye nyama. Pale mwakhala mukulirira Yahova kuti: “Ni mbani yemwe atipase nyama yakuti tidye? Ku Iguputo vinthu vimbatifambira bwino.” Yahova akupasenidi nyama mwiyo ndipo mudye. 19  Nyama mwiyo muidyelini ntsiku ibodzi, ntsiku ziwiri, ntsiku zishanu, ntsiku 10, panango ntsiku 20 neye, 20  koma mudzaidye kwa mwezi wantero, mpakana idzabule na m’mphuno mwanu, ndipo mudzachite kunyantsiwa nayo. Vidzakhale teno ndawa mwalamba Yahova yemwe ali pakati panu, ndipo mumulirira kuti: ‘Tidachokeranyi ku Iguputo?”’” 21  Manje Mose adati: “Amuna omwe nikufamba nawo alipo 600 000, koma imwepo mwanena kuti: ‘Niwapase nyama yokwana kudya mwezi wantero.’ 22  Ko tichipha vipfuwo vose, iwo angakwane? Panango tichipha ntsomba zose za m’nyanja, ko iwo angakwane?” 23  Manje Yahova adadawira Mose kuti: “Ko djanja ya Yahova yafupika? Manje uwone peno vomwe nanena ivi vichitike panango neye.” 24  Pamwapo Mose adayenda kukauza wanthu mwawo mawu ya Yahova. Iye adasonkhanisa amuna 70 kuchokera pakati pa akulu wa wanthu mwawo, nkuwauza kuti aimirire mozungulira chihema chogumanako. 25  Patsogolo pake Yahova adabuluka muntambo nkuyankhula naye. Adatengako gawo inango ya mzimu womwe wenze pa Mose nkuuikha pa aliyese wa akulu 70 mwawo. Ndipo padandotambira mzimu muyo, adayamba kuchita vinthu ninge aneneri,* koma adandochita vimwivi kabodzi kokha basi. 26  Manje penze amuna awiri omwe adakhalirira munsasa. Madzina yawo yenze Eledadi na Medadi. Amwawa adatambirambo mzimu muyo ndawa enze mugulu ya wanthu omwe adanembewa madzina, koma alibe kuyenda kuchihema. Pamwapo iwombo adayamba kuchita vinthu ninge aneneri munsasa mumo. 27  Manje mulumbwana munango adathamanga nkukanena kwa Mose kuti: “Eledadi na Medadi ankuchita vinthu ninge aneneri munsasa.” 28  Patsogolo pake Yoswa mwana wa Nuni, yemwe wenze ntumiki wa Mose kuyambira ali mulumbwana, adadawirira kuti: “Mbuya wangu Mose, kawalambizeni wanthu mwawo!” 29  Koma Mose adadawira kuti: “Ko unkuchita ntsanje ndawa ya inepano? Ayi kuchita teno. Nidakabva bwino wanthu wose wa Yahova adakakhala aneneri komasoti Yahova adakaikha mzimu wake pa iwo!” 30  Patsogolo pake, Mose pabodzi na akulu wa Izirayeli mwawo adabwerera ku nsasa. 31  Patsogolo pake Yahova adabweresa mphepo yamphanvu kuchokera kunyanja. Mphepo mwiyo idabweresa mbalani za chinziri, ndipo idazimwaza kuzungulira nsasa muyo mpakana pansenga wofamba ntsiku ibodzi kuyenda mbali zose za nsasa muyo. Idazimwaza kuzungulira nsasa muyo, mwakuti zidaunjikana hobo pafupifupi masentimetro 90* kuchokera pasi. 32  Pamwapo wanthu mwawo adayamba kuphata achinziri mwawo. Adaziphata masikati yose, usiku wose, mpakana mangwana yake osapumula. Palibe yemwe adaphata zosakwana mahomeri* 10 ndipo ambaziyanika palipose, mwakuti zidandoti bvuu, pa nsasa wose muyo. 33  Koma nyama mwiyo idakali nkamwa mwawo, akalibe na kuitampfuna uko, ukali wa Yahova udawagakira wanthu mwawo. Ndipo Yahova adayamba kuwalanga mwakuti wanthu azinji adaphewa. 34  Malo mwayo adayapasa dzina yakuti Kibiroti-hatava,* ndawa adafuchirapo wanthu omwe adawonesa ntima wadyera. 35  Wanthu mwawo padachoka ku Kibiroti-hatava, adafulukira ku Hazeroti, ndipo adakhala kumuko.

Mawu ya m’nyantsi

^ Dzina mwiyi itanthauza kuti: “Kugaka; moto wa ngandanganda.”
^ Panango kuti: “ntsere ya koriyanda.” Koriyanda ni chomera chomwe anango anena kuti “kamezameza,” ndipo ntsere yake ni ichena ninge mapira.
^ Keke ni bolo yomwe iphikiriwa mu uvuni.
^ Panango kuti: “makayaya.”
^ Panango kuti: “omwe uwadziwa.”
^ Panago kuti: “adayamba kuneneratu vakutsogolo.”
^ Muchiyankhulo choyambirira adati: “makovado yawiri.” Onani vakumapeto B14.
^ Homeri ibodzi yenze yolingana na malitru 220. Onani vakumapeto B14.
^ Kutanthauza kuti: “Manda ya wanthu wadyera.”

Bukhu mweyi niyotetezewa na ufulu wa zamalamulo