Numeri 22:1-41
22 Patsogolo pake Aizirayeli adanyamuka nkukamanga nsasa muchipululu cha Mowabu, monyang’anana na Yeriko patsidya pa kamadzi ka Yorodano.
2 Manje Balaki mwana wa Zipori, adawona vose vomwe Aizirayeli adachitira Aamori,
3 ndipo Amowabu adachita mantha maninge na wanthu mwawo ndawa enze azinji. Iwo adayamba kuwagopa maninge Aizirayeli mwawo.
4 Manje Amowabu mwawo adauza akuluakulu wa ku Midiyani kuti: “Chigulu mwichi cha wanthu chidzadye malo yathu yose ninge momwe ng’ombe idyera nsipu kuthengo.”
Panthawe mwiyo, Balaki mwana wa Zipori ndiye wenze mpfumu ya Mowabu.
5 Iye adatumiza wanthu kwa Balamu, mwana wa Beori, ku Petori pafupi na Kamadzi* ka mudziko yawo. Adawatuma kuti akamuchemere kuti: “Onani! Wanthu omwe achokera ku Iguputo wale afika kuno. Iwo adzadza dziko yose yapasi komwe munthu anganyang’ane, ndipo ankukhala pafupi chaipo na dziko yangu.
6 Manje pulizi bwerani, mudzatemberere wanthu mwawa ndawa ni wamphanvu kuposha inepano. Panango ningawawine nkuwathamangisa mudziko ino, ndawa ninkudziwa kuti munthu yemwe imwepo mwamudalisa, akhaladi wodalisiwa, koma munthu yemwe mwamutemberera, akhaladi wotembererewa.”
7 Pamwapo akuluakulu wa ku Mowabu na wa ku Midiyani adayenda kwa Balamu na kobiri zati akamulipire kuti awawombezere, komasoti adamuuza vomwe Balaki adanena.
8 Balamu padabva mawu mwayo adawauza kuti: “Mugone kunkuno, basi inepano nikudawireni mobverana na vomwe Yahova anganiuze.” Pamwapo akuluakulu wa ku Mowabu mwawo adagonadi kwa Balamu.
9 Patsogolo pake Mulungu adafika kwa Balamu nkumubvunza kuti: “Ko wanthu omwe uli nawo awa ni mbani?”
10 Balamu adadawira Mulungu chaiye kuti: “Balaki mwana wa Zipori, mpfumu ya Mowabu ndiye watumiza wanthu mwawa kuti adzaniuze kuti:
11 ‘Onani! Wanthu omwe achokera ku Iguputo wale adzadza dziko yose yapasi komwe munthu anganyang’ane. Manje bwerani, mudzawatemberere wanthu mwawa. Panango ningakwanise kumenyana nawo nkuwathamangisa.’”
12 Koma Mulungu adauza Balamu kuti: “Ayi kuyenda nawo, ndipo wanthu mwawo osati uwatemberere ndawa ni odalisiwa.”
13 Balamu adamuka machibesebese nkuuza akuluakulu omwe adatumiwa na Balaki mwawo kuti: “Yendani kudziko yanu, ndawa Yahova wanilambiza kuti niyende namwe.”
14 Pamwapo akuluakulu wa ku Mowabu mwawo adanyamuka nkubwerera kwa Balaki ndipo adamuuza kuti: “Balamu walamba kubwera nase pabodzi.”
15 Koma Balaki adatumiza akuluakulu anango azinji olemekezeka maninge kuposha oyamba wale.
16 Iwo adayenda kwa Balamu nkukamuuza kuti: “Balaki mwana wa Zipori wanena kuti: ‘Ayi kubvuma kuti chirichose chikukangiseni kubwera kwa inepano,
17 ndawa nidzakupaseni malipiro yakulu, ndipo nidzachite chirichose chomwe munganiuze. Pulizi bwerani mudzatemberere wanthu mwawa.’”
18 Koma Balamu adadawira atumiki wa Balaki mwawo kuti: “Olo Balaki achiti wanipasa nyumba yake yodzala siliva na golide, ningachitelini chirichose chosabverana na vomwe Yahova Mulungu wangu anganilamule, peno chikhale ching’ono panango chikulu.
19 Tani imwepo mugonembo kunkuno usiku wa lero kuti nibve pomwe vinthu vinango vomwe Yahova anganiuze.”
20 Usiku muyo Mulungu adafika kwa Balamu nkumuuza kuti: “Peno wanthu mwawa abwera kudzakuchemera, yenda nawo pabodzi. Koma undokayankhula mawu yati nikakuuze basi.”
21 Manje Balamu adamuka machibesebese nkumanga chishalo pabulu wake,* ndipo adayenda pabodzi na akuluakulu wa ku Mowabu wale.
22 Koma Mulungu padawona kuti Balamu ankuyenda, adakalipa maninge ndipo mngelo wa Yahova adaimirira pansewu kuti amutchingirize. Balamu uyo wenze adakwira bulu wake ndipo wenze na alumbwana wake awiri.
23 Manje bulu muyo padawona mngelo wa Yahova ali imirire pansewu na chibemba chake m’manja, adayesesa kupatuka munsewu nkupita na n’thengo. Koma Balamu adayamba kumukwapula kuti abwerere munsewu.
24 Patsogolo pake mngelo wa Yahova muyo adayenda kukaimirira panjira yopanikiza yomwe yenze pakati pa maminda yawiri ya uva ndipo njira mwiyo yenze na vipupa vaminyala uku na uku.
25 Bulu muyo padawona pomwe mngelo wa Yahova ule, adayamba kudzipanikizira kuchipupa, mpakana adapanikizira pomwe phazi ya Balamu kuchipupa muko. Ndipo Balamu adayamba kumukwapula pomwe bulu muyo.
26 Manje mngelo wa Yahova adayenda patsogolo nkukaima pamalo yanango yopanikiza, pomwe penze palibiretu mpata wakuti angapite ne kumakulu panango kumadzere.
27 Bulu muyo padawona pomwe mngelo wa Yahova ule, adandogwagwadala pasi, Balamu ali kwere pansana pake. Pamwapo Balamu adakalipa maninge, ndipo adapitiriza kumukwapula na mpsyimbo yake.
28 Pomalizira pake Yahova adachitisa kuti bulu muyo ayankhule,* ndipo adabvunza Balamu kuti: “Ko nakuphonyerani chani kuti mpakana munikwapule katatu tene?”
29 Balamu adadawira bulu muyo kuti: “Ndawa unkuchita mwano maninge. Mwakuti nidakakhala na chibemba m’manja mwangu umu, nidakakupha kale!”
30 Bulu muyo adabvunza pomwe Balamu kuti: “Ko inepano ndinelini bulu wanu yemwe mwakhala munkupakira moyo wanu wose mpakana lero? Ko nenze nidakuchitirankoni kale vimwivi?” Iye adadawira kuti: “Neye!”
31 Patsogolo pake Yahova adafungula maso ya Balamu, ndipo adaona mngelo wa Yahova ali imirire panjira mwapo, chibemba chiri m’manja mwake. Nthawe mwiyoletu Balamu adagwada nkujolima mpakana nkhope yake pasi.
32 Manje mngelo wa Yahova ule adamubvunza kuti: “Ndawa chani wakhala unkukwapula bulu wako maulendo yatatu yose mwaya? Inepano nabwera kudzakutchingiriza panjira, ndawa unkuyenda kukachita vinthu vosabverana na vomwe inepano ninkufuna.
33 Bulu muyu waniwona ndipo wayesesa kunipatukira maulendo yose yatatu. Adakati alibe kunipatukira, sembe pano nakupha kale. Koma bulu muyu, nidakamusiya kuti akhale na moyo.”
34 Balamu adauza mngelo wa Yahova muyo kuti: “Nachimwa, niribe kudziwa kuti imwepo mwaima pansewu kudzagumana nane. Koma peno mulibe kukomedzewa navo, ningabwerere.”
35 Koma mngelo wa Yahova muyo adauza Balamu kuti: “Yenda nawo wanthu mwawa, koma undokanena vomwe nikakuuze basi.” Pamwapo Balamu adapitiriza ulendo wake pabodzi na akuluakulu omwe Balaki adawatuma wale.
36 Balaki padabva kuti Balamu wafika, nthawe mwiyoletu adanyamuka nkuyenda kukamuchunguzira kuthaundi ya Mowabu. Thaundi mwiyi yenze m’mbalim’mbali mwa kamadzi ka Arinoni, komwe kali m’malire ya dziko mwiyo.
37 Manje Balaki adabvunza Balamu kuti: “Ko inepano niribe kutumiza wanthu kuti adzakuchemereni? Manje ndawa chani mulibe kubwera? Ko munkuganiza kuti inepano ningakwaniselini kukupasani malipiro yakulu?”
38 Balamu adadawira Balaki kuti: “Ine nabwera ndipo! Koma ko ninkubvumiziwa kuyankhula chirichose? Inepano nindoyankhula mawu yomwe Mulungu anganiuze basi.”*
39 Pamwapo Balamu adatengana na Balaki, nkuyenda ku Kiriyati-huzoti.
40 Kumuko Balaki adapereka ntsembe zanyama ya ng’ombe na nkhosa, nkutumiza inango kwa Balamu na akuluakulu omwe enze nawo pabodzi.
41 Mangwana yake pakudachena, Balaki adatenga Balamu nkuyenda naye ku Bamoti-baala. Adayenda naye kumuko kuti akakwanise kuona bwinobwino gulu yose ya Aizirayeli.
