Numeri 28:1-31
28 Patsogolo pake Yahova adauza Mose kuti:
2 “Lamula Aizirayeli kuti: ‘Mumbawonesese kuti munkupereka kwa inepano ntsembe yangu, yomwe ni chakudya changu. Pa nthawe yake yoikhiwiratu mumbapereke ntsembe zangu zowotcha pamoto, kuti zikhale kapfungo kabwino* kwa inepano.’
3 Uwauze kuti: ‘Ntsembe yowotcha pamoto yomwe mumbapereke kwa Yahova ni iyi: Ntsiku iriyose mumbapereke ntsembe yoshoka ya wana wa nkhosa awiri amuna, wagole ibodzi na osapunduka.
4 Mwana wa nkhosa m’bodzi mwamuna mumbamupereke ntsembe machibesebese. Ndipo mwana wa nkhosa mwamuna munango, mumbamupereke ntsembe maulo kuli bibibi.*
5 Mumbapereke ntsembe mwizi pabodzi na ufa wonyodoka wokwana gawo ibodzi pa magawo 10 ya mpimo wa efa* kuti ikhale ntsembe yambewu. Ufa muyo mumbauthire mafuta yosusa bwino maninge yokwana gawo ibodzi pa magawo yanayi ya mpimo wa hini.*
6 Imwiyi ni ntsembe yoshoka ya ntsiku na ntsiku yomwe nidakulamulani kuphiri ya Sinai. Nidakulamulani kuti mumbapereke kwa Yahova kuti ikhale ntsembe ya kapfungo kabwino* yowotcha pamoto.
7 Mumbaipereke pabodzi na ntsembe yachakumwa yokwana gawo ibodzi pa magawo yanayi ya mpimo wa hini. Pa mwana wa nkhosa mwamuna aliyese mumbapereke ntsembe ya chakumwa. Mumbaikhire Yahova ntsembe yachakumwa choledzeresa m’malo yochena.
8 Mwana wa nkhosa mwamuna munango mumbamupereke ntsembe maulo kuli bibibi.* Mumbamupereke ntsembe pabodzi na ntsembe yambewu na yachakumwa, molingana na ntsembe ya machibesebese ire. Imbakhale ntsembe yowotcha pamoto ya kapfungo kabwino* kwa Yahova.
9 Koma pa ntsiku ya Satade, mumbapereke ntsembe wana wa nkhosa awiri amuna osapunduka. Mumbawaperekere pabodzi na ufa wonyodoka kuti ikhale ntsembe yambewu. Ufa muyo mumbauthire mafuta, ndipo umbakhale wokwana magawo yawiri pa magawo 10 ya mpimo wa efa. Mumbapereke pomwe ntsembe yake yachakumwa.
10 Ntsembe mwiyi ni ntsembe yoshoka ya ntsiku ya Satade, ndipo mumbaipereke nthawe zose pabodzi na ntsembe yoshoka ya ntsiku na ntsiku komasoti ntsembe yake yachakumwa.
11 Kumayambiriro kwa mwezi uliwose,* mumbapereke ntsembe yoshoka kwa Yahova. Mumbapereke ng’ombe ziwiri zing’onozing’ono zimuna, nkhosa ibodzi imuna, na wana wa nkhosa 7 amuna osapunduka. Mwana wa nkhosa aliyese ambakhale wa gole ibodzi.
12 Pa ng’ombe iriyose imuna, mumbapereke ufa wonyodoka wothira mafuta wokwana magawo yatatu pa magawo 10 ya mpimo wa efa kuti ikhale ntsembe yake yambewu. Nkhosa imuna ibodzi mwiyo mumbaipereke pabodzi na ntsembe yambewu ya ufa wonyodoka wothira mafuta, yokwana magawo yawiri pa magawo 10 ya mpimo wa efa.
13 Ndipo pa mwana wa nkhosa mwamuna aliyese, yemwe ni ntsembe yoshoka ya kapfungo kabwino,* ntsembe yowotcha pamoto yoperekewa kwa Yahova, mumbapereke pomwe ntsembe yambewu ya ufa wonyodoka wothira mafuta. Ufa muyo umbakhale wokwana gawo ibodzi pa magawo 10 ya mpimo wa efa.
14 Pa nyama iriyose yoperekewa ntsembe, mumbapereke pomwe ntsembe ya chakumwa. Ng’ombe imuna mumbaipereke pabodzi na vinyu wokwana hafu ya mpimo wa hini. Nkhosa imuna mumbaiperekere kubodzi na vinyu wokwana gawo ibodzi pa magawo yatatu ya mpimo wa hini. Ndipo mwana wa nkhosa mwamuna mumbamuperekere kubodzi na vinyu wokwana gawo ibodzi pa magawo yanayi ya mpimo wa hini. Vinthu vimwivi mumbavipereke ninge ntsembe yoshoka ya mwezi na mwezi ndipo mumbavipereke mwezi uliwose pa gole.
15 Mumbapereke pomwe mbuzi ing’ono kuti ikhale ntsembe yamachimo kwa Yahova, kuingizira pa ntsembe yoshoka ya ntsiku na ntsiku pabodzi na ntsembe yake yachakumwa.
16 M’mwezi woyamba, pantsiku ya 14, pambakhale Pasika wa Yahova.
17 Manje pantsiku ya 15 ya mwezi muyu pambakhale chikondwerero. Kwa ntsiku 7 mumbadye mikate yalibe vofufumisa.
18 Pantsiku yoyamba yachikondwerero mwicho mumbachite nsonkhano wopatulika. Pantsiku mwiyi ayi kumbaphata basa iriyose yonetesa.
19 Mumbapereke ntsembe yoshoka kwa Yahova, yomwe ni ntsembe yowotcha pamoto. Mumbapereke ng’ombe ziwiri zing’onozing’ono zimuna, nkhosa ibodzi imuna na wana wankhosa 7 amuna. Mwana wa nkhosa aliyese ambakhale wa gole ibodzi. Mumbawonesese kuti nyama mwizo ni zosapunduka.
20 Ntsembe zimwizi mumbaziperekere kubodzi na ntsembe zake zambewu. Ng’ombe imuna iriyose mumbaiperekere kubodzi na ufa wonyodoka wokwana magawo yatatu pa magawo 10 ya mpimo wa efa. Nkhosa imuna mwiyo mumbaiperekere kubodzi na ufa wokwana magawo yawiri pa magawo 10 ya mpimo wa efa. Ufa muyo umbakhale wothira mafuta.
21 Pa mwana wa nkhosa mwamuna aliyese pa wana wa nkhosa 7 mwawo, mumbapereke pomwe ufa wokwana gawo ibodzi pa magawo 10 ya mpimo wa efa.
22 Komasoti mumbapereke mbuzi ibodzi ninge ntsembe yamachimo, kuti ikhale yopsyimphirizira machimo yanu.
23 Mumbapereke ntsembe zimwizi kuingizira pa ntsembe yoshoka ya machibesebese ya ntsiku na ntsiku.
24 Mumbapereke ntsembe zimwizi molingana ntsiku iriyose kwa ntsiku 7. Mumbazipereke ninge chakudya, ntsembe yowotcha pamoto ya kapfungo kabwino* kwa Yahova mumbaiperekere kubodzi na ntsembe yoshoka ya nthawe zose na ntsembe yake yachakumwa.
25 Pantsiku yachi 7 mumbachite nsonkhano wopatulika. Ayi kumbaphata basa iriyose yonetesa pantsiku mwiyi.
26 Ndipo pantsiku ya vipaso voyambirira kukhuma, mukambapereka ntsembe yambewu zinyowani kwa Yahova na kuchita phwando yanu ya masatade, mumbachite nsonkhano wopatulika. Ayi kumbaphata basa iriyose yonetesa pa ntsiku mwiyi.
27 Mumbapereke ntsembe yoshoka ya kapfungo kabwino* kwa Yahova. Mumbapereke ng’ombe ziwiri zing’onozing’ono zimuna, nkhosa ibodzi imuna na wana wa nkhosa 7 amuna, wagole ibodzi.
28 Mumbapereke pomwe ntsembe yake yambewu ya ufa wonyodoka wothira mafuta. Ufa muyo umbakhale wokwana magawo yatatu pa magawo 10 ya mpimo wa efa pa ng’ombe imuna iriyose. Pa nkhosa ibodzi imuna mwiyo, mumbapereke ufa wokwana magawo yawiri pa magawo 10 ya mpimo wa efa.
29 Mwana wa nkhosa aliyese pa wana wa nkhosa 7 amuna mwawo, mumbamupereke pabodzi na ufa wokwana gawo ibodzi pa magawo 10 ya mpimo wa efa.
30 Komasoti mumbapereke mbuzi ing’ono yopsyimphirizira machimo yanu.
31 Mumbapereke vimwivi kuingizira pa ntsembe yanu yoshoka ya nthawe zose na ntsembe yake yambewu. Mumbawonesese kuti nyama mwizo ni zosapunduka ndipo mumbaziperekere kubodzi na ntsembe yake yachakumwa.’”
Mawu ya m’nyantsi
^ Muchiyankhulo choyambirira adati: “kapfungo kokhazika ntima pasi.”
^ Muchiyankhulo choyambirira adati: “pakati pa maulo yawiri.” Onani matanthauzo ya mawu yanango.
^ Gawo ibodzi pa magawo 10 ya mpimo wa efa ni yolingana na malitru 2,2. Onani vakumapeto B14.
^ Mpimo wa hini ni wolingana na malitru 3,67. Onani vakumapeto B14.
^ Muchiyankhulo choyambirira adati: “kapfungo kokhazika ntima pasi.”
^ Muchiyankhulo choyambirira adati: “pakati pa maulo yawiri.” Onani matanthauzo ya mawu yanango.
^ Muchiyankhulo choyambirira adati: “kapfungo kokhazika ntima pasi.”
^ Muchiyankhulo choyambirira adati: “kwa minyezi yanu.”
^ Muchiyankhulo choyambirira adati: “kapfungo kokhazika ntima pasi.”
^ Muchiyankhulo choyambirira adati: “kapfungo kokhazika ntima pasi.”
^ Muchiyankhulo choyambirira adati: “kapfungo kokhazika ntima pasi.”
