Numeri 13:1-33
13 Manje Yahova adayankhula na Mose kuti:
2 “Utume amuna kuti akayendeze* dziko ya Kanani yomwe ninkuipereka kwa Aizirayeli. Pa dzinza iriyose utume mwamuna m’bodzi, ndipo akhale mtsogoleri wa dzinza yawo.”
3 Pamwapo Mose adatumiza amuna mwawo kuchokera kuchipululu cha Parana, mobverana na vomwe Yahova adalamula. Amuna wose mwawo enze atsogoleri wa Aizirayeli.
4 Madzina yawo ni aya: Wa dzinza ya Rubeni wenze Samuwa, mwana wa Zakuri.
5 Wa dzinza ya Simiyoni wenze Safati, mwana wa Hori.
6 Wa dzinza ya Yuda wenze Kalebe, mwana wa Yefune.
7 Wa dzinza ya Isakara wenze Igali, mwana wa Yosefe.
8 Wa dzinza ya Efuraimu wenze Hoshiya, mwana wa Nuni.
9 Wa dzinza ya Benjamim wenze Paliti, mwana wa Rafu.
10 Wa dzinza ya Zebuloni wenze Gadiyeli, mwana wa Sodi.
11 Wa dzinza ya Yosefe, kuimira dzinza ya Manase, wenze Gadidi mwana wa Susi.
12 Wa dzinza ya Dani wenze Amiyeli, mwana wa Gemali.
13 Wa dzinza ya Aseri wenze Seturi, mwana wa Mikayeli.
14 Wa dzinza ya Nafitali wenze Nabi, mwana wa Vopisi.
15 Wa dzinza ya Gadi wenze Geyuweli, mwana wa Maki.
16 Madzina ya amuna omwe Mose adawatuma kuti akayendeze dziko mwiyo ni mwaya. Mose adapasa Hoshiya mwana wa Nuni dzina yakuti Yoswa.*
17 Pakuwatumiza kuti akayendeze dziko ya Kanani, Mose adawauza kuti: “Pakuyenda kumuko mupite na ku Negebu, ndipo patsogolo pake mukafike kudera yamapiri.
18 Mukaone kuti dziko mwiyo ni yotani. Mukaone pomwe peno wanthu wa mudziko mumo ni wamphanvu panango neye, peno ni ang’onong’ono panango azinji.
19 Mukaone peno dziko mwiyo ni yabwino panango yoipa, komasoti peno mathaundi yomwe ankukhala yalibe mipanda panango peno yanamipanda yolimba maninge.
20 Komasoti mukaone peno dziko mwiyo inachonde panango neye, peno inamiti panango neye. Mukalimbe ntima nkutengako vipaso va mudziko mwiyo.” Mwiyi yenze nthawe yomwe uva woyamba umbapsa.
21 Pamwapo amuna mwawo adayenda kukayendeza dziko mwiyo, kuyambira kuchipululu cha Zini mpakana ku Rehobu, kufupi na Lebo-hamati.*
22 Padayenda ku Negebu, adakafika ku Heburoni komwe kumbakhala Ahimai, Sesani na Talimai, omwe ni Aanaki.* Thaundi ya Heburoni idamangiwa magole 7 thaundi ya Zowani ya ku Iguputo ikalibe kumangiwa.
23 Padafika kuchigwa cha Esikolo,* adagwata nthawi yomwe yenze na uva uzinji, ndipo wanthu awiri adainyamula paphewa na kamuti konyamulira. Adatengako pomwe makangaza* na nkhuyu.
24 Malo mwayo adayapasa dzina yakuti chigwa cha Esikolo,* ndawa yakuti Aizirayeli mwawo adagwatapo nthawi ya uva.
25 Pazidamala ntsiku 40, adabwererako kokayendeza dziko kule.
26 Iwo adabwerera kwa Mose na Aroni na kwa gulu yose ya Aizirayeli muchipululu cha Parana, ku Kadesi. Adafotokozera gulu yose mwiyo va ulendo wawo nkuwawonesa vipaso va kudziko mwiyo.
27 Iwo adauza Mose kuti: “Tenze tidangena mudziko yomwe mudatituma ire ndipo ni dziko yoyereradi nkaka na uchi, mwakuti vipaso vake ni ivi.
28 Olo viriteno, wanthu okhala kumuko ni wamphanvu, ndipo anamathaundi yakuluyakulu yozunguliriwa na mipanda yolimba maninge. Ni vimwivilini vokha, taona pomwe Aanaki kumuko.
29 Aamaleki ankukhala ku Negebu. Ahiti, Ayebusi na Aamori ankukhala kudera yamapiri. Akanani ankukhala m’mphepete mwa nyanja na m’mphepete mwa kamadzi ka Yorodano.”
30 Patsogolo pake Kalebe adayesesa kukhazika ntima pasi wanthu mwawo pamaso pa Mose pakunena kuti: “Naboni tiyende manje so, tikatenge dziko mwiyo nkukhala yathu, ndawa tingakwanise kuwawina wanthu mwawo.”
31 Koma amuna omwe adayenda naye pabodzi adanena kuti: “Tingakwaniselini kulimbana nawo wanthu mwawo, ndawa ni wamphanvu kuposha isepano.”
32 Ndipo iwo adapitiriza kuuza Aizirayeli mwawo mawu yosalimbikisa yonena va dziko yomwe adayenda kukaiyendeza iyo kuti: “Dziko yomwe tidayenda kukaiyendeza iyo imeza wanthu wake, ndipo wanthu wose omwe tidawaona kumuko ni viphona vamathupi yakuluyakulu.
33 Tidaonako pomwe Anefili,* wana wa Anaki omwe ni mbadwa za Anefili, mwakuti tikadzilinganiza na iwo, isepano timbaoneka ninge tuabombo. Iwo ambatiwonambo teno.”
Mawu ya m’nyantsi
^ Panango kuti: “akaunguze.”
^ Panango kuti: “Yahoswa,” kutanthauza kuti “Yahova ni Chipulumuso.”
^ Panango kuti: “pongenera ku Hamati.”
^ Aanaki enze wanthu wa mathupi yakuluyakulu na wamphanvu maninge.
^ Panango kuti: “kudambo ya Esikolo.”
^ “Makangaza” ni ntundu wa chipaso. Anango achichemera kuti chimanga chachizungu.
^ Panango kuti: “kudambo ya Esikolo.” Dzina mwiyi itanthauza “Nthawi ya uva woumbirirana.”
^ Vingachitike kuti dzina mwiyi itanthauza “Ogwesa” kutanthauza omwe agwesa wanthu anango. Onani matanthauzo ya mawu yanango.
