Numeri 6:1-27
6 Yahova adapitiriza kuyankhula na Mose kuti:
2 “Yankhula na Aizirayeli ndipo uwauze kuti: ‘Peno mwamuna panango nkazi wachita polomisi yapadera kwa Yahova yokhala Mnaziri,*
3 osati ambamwe vinyu na vakumwa vinango voledzeresa. Osati ambamwe pomwe vinagre* yokhala na vinyu, panango vinagre yochokera ku vakumwa vinango voledzeresa, panango madzi ya uva. Komasoti osati ambadye uva uwisi panango wouma.
4 Ntsiku zake zose zokhala Mnaziri, osati ambadye chirichose chochokera ku muti wa uva, peno ukhale uva uwisi panango mabade yake.
5 Ntsiku zose za polomisi yake yokhala Mnaziri, leza osati imbapite munsolo mwake. Ambakhale wochena pakusiya tsitsi ya kunsolo kwake kuti ikule mpakana ntsiku zomwe adadzipereka kwa Yahova zimale.
6 Iye osati ambafenderere munthu wakufa ntsiku zose zomwe wadzipereka kwa Yahova.
7 Olo kuti yemwe wamwalira ni ababa wake, amayi wake, m’bale wake panango mulongosi wake, iye osati ambadzipsyipize, ndawa chizindikiro cha unaziri wake kwa Mulungu chiri kunsolo kwake.
8 Iye ni wochena kwa Yahova ntsiku zose za unaziri wake.
9 Koma peno munthu munango wafera pambali pake mwadzidzidzi, mwakuti Mnaziri muyo wapsyipiza tsitsi yomwe iri ninge chizindikiro chakuti wadzipereka kwa Mulungu, ambagere tsitsi ya kunsolo kwake pantsiku yomwe wachenesewa. Ambaigere pantsiku yachi 7.
10 Ndipo pantsiku yachi 8, ambabwerese njiwa ziwiri panango wana awiri wa nkhangaiwa kwa wantsembe pansuwo wa chihema chogumanako.
11 Wantsembe muyo ambatenge mwana m’bodzi wanjiwa panango wa nkhangaiwa nkumupereka ninge ntsembe yamachimo. Ambatenge pomwe mwana wa njiwa panango wa nkhangaiwa munango muyo nkumupereka ninge ntsembe yoshoka kuti apsyimphirize machimo yomwe munthu muyo adachita pakugumirira munthu wakufa. Akachita teno ambachenese nsolo wake pantsiku mwiyo.
12 Munthu muyo ambayambe pomwe ntsiku zake za kudzipereka kwa Yahova ninge Mnaziri, ndipo ambabwerese nkhosa ing’ono imuna yosapitirira gole ibodzi ninge ntsembe yakupalamula. Koma ntsiku zoyamba zire zidzawerengewelini ndawa adapsyipiza unaziri wake.
13 Manje lamulo yonena va Mnaziri ni iyi: Pantsiku yomwe ntsiku za unaziri wake zamala, ambamubwerese pansuwo wa chihema chogumanako.
14 Kumuko ambapereke ntsembe yake kwa Yahova. Ambapereke nkhosa ing’ono imuna yosapunduka, yosapitirira gole ibodzi, ninge ntsembe yoshoka. Ambapereke pomwe mwana wa nkhosa nkazi wosapunduka, wosapitirira gole ibodzi, ninge ntsembe yamachimo. Komasoti ambapereke nkhosa imuna yosapunduka, ninge ntsembe yambverano.
15 Ambapereke pomwe dengu ya mikate yalaundi yobowola pakati yalibe vofufumisa, yophika na ufa wonyodoka yopakasira mafuta, tumikate twathasalala tulibe vofufumisa topakasira mafuta, pabodzi na ntsembe yake yambewu na ntsembe zake zachakumwa.
16 Wantsembe muyo ambabwerese vinthu mwivo pamaso pa Yahova, ndipo ambamuperekere ntsembe yake yamachimo na ntsembe yake yoshoka.
17 Ambapereke pomwe kwa Yahova nkhosa imuna ninge ntsembe yambverano, pabodzi na dengu ya mikate yalibe vofufumisa yale. Patsogolo pake wantsembe muyo ambapereke ntsembe yambewu na ntsembe yachakumwa, vomwe vifambira pabodzi na ntsembe yambverano iyo.
18 Patsogolo pake Mnaziri muyo ambagere tsitsi ya kunsolo kwake ndipo ambaigerere pansuwo wachihema chogumanako. Akateno, ambatenge tsitsi ya kunsolo kwake yomwe idamera panthawe yomwe wenze Mnaziri, nkuiponya pamoto womwe uli pasi pa ntsembe yambverano.
19 Wantsembe ambatenge mwendo wakutsogolo wa nkhosa imuna womwe wabwabwasiwa. Ambatenge pomwe m’dengu mumo nkate wobowola pakati ulibe vofufumisa na kankate kothasalala kalibe vofufumisa. Vinthu mwivi ambaviikhe m’manja mwa Mnaziri patsogolo pakuti wagera kale chizindikiro cha unaziri wake.
20 Wantsembe muyo ambayendese vinthu mwivo uku na uku ninge ntsembe yoperekewa kwa Yahova. Vinthu vimwivi vimbaperekewe kwa wantsembe muyo ninge mphaso yopatulika, pabodzi na nganga ya ntsembe yoyendesa uku na uku, na mwendo womwe ni gawo yopatulika. Patsogolo pake munthu yemwe wenze Mnaziri muyo angambamwe vinyu.
21 Lamulo yonena va Mnaziri yemwe wachita polomisi ni iyi: Peno adapolomisa ndipo angakwanise kupereka ntsembe kwa Yahova, kuingizira pa vomwe afunika kupereka ninge Mnaziri, ambakwanirise polomisi yake, pakuwonesa kuti ankulemekeza lamulo ya unaziri wake.’”
22 Patsogolo pake Yahova adauza Mose kuti:
23 “Uza Aroni na wana wake kuti: ‘Mukambadalisa Aizirayeli mumbawauze kuti:
24 Yahova akudaliseni ndipo akutetezeni.
25 Yahova awonese kuti ankukondwa namwe ndipo akukomereni ntima.
26 Yahova akunyang’aneni mokondwa ndipo akupaseni ntendere.”’
27 Aroni na wana wake ambaphatise basa dzina yangu pakudalisa Aizirayeli kuti inepano niwadalise.”
