Numeri 15:1-41
-
Malamulo yonena va ntsembe (1-21)
-
Malamulo yolingana kwa nzika na alendo (15, 16)
-
-
Ntsembe za machimo yomwe munthu wachita mosadziwa (22-29)
-
Chilango cha munthu yemwe wachimwa mwadala (30, 31)
-
Munthu yemwe alibe kubvera lamulo yonena va Satade adaphewa (32-36)
-
Vovala vimbakhale na usalu m’mphepete (37-41)
15 Yahova adayankhula pomwe na Mose kuti:
2 “Yankhula na Aizirayeli ndipo uwauze kuti: ‘Mukakafika mudziko yomwe ninkukupasani kuti mumbakakhalemo,
3 ndipo mukambakapereka kwa Yahova ntsembe yowotcha pamoto, peno ni ya ng’ombe panango ya nkhosa kuti ikhale ntsembe yoshoka, panango ntsembe yomwe munkuipereka ndawa ya polomisi yapadera, panango ntsembe ya ufulu, panango pomwe ntsembe yomwe mukuipereka panthawe ya vikondwerero vanu, kuti ikhale kapfungo kabwino* kwa Yahova,
4 munthu yemwe ankupereka ntsembe mwiyo, ambakapereke pomwe kwa Yahova ntsembe yambewu ya ufa wonyodoka wokwana gawo ibodzi pa magawo 10 ya mpimo wa efa.* Ufa muyo umbakakhale wothira mafuta yokwana gawo ibodzi pa magawo yanayi ya mpimo wa hini.*
5 Mumbakapereke pomwe vinyu kuti ukhale ntsembe yachakumwa. Umbakakhale wokwana gawo ibodzi pa magawo yanayi ya mpimo wa hini. Vinyu muyo mumbakaupereke pabodzi na ntsembe yoshoka, panango ya mwana wankhosa mwamuna.
6 Komasoti pakupereka ntsembe ya nkhosa imuna, mumbakaipereke pabodzi na ntsembe yambewu yokwana magawo yawiri pa magawo 10 ya ufa wonyodoka wa mpimo wa efa. Ufa muyo umbakakhale wothira mafuta yokwana gawo ibodzi pa magawo yatatu ya mpimo wa hini.
7 Mumbakapereke pomwe vinyu kuti ukhale ntsembe yachakumwa. Umbakakhale pomwe wokwana gawo ibodzi pa magawo yatatu ya mpimo wa hini, kuti ukhale ntsembe ya kapfungo kabwino* kwa Yahova.
8 Koma peno munkupereka ng’ombe imuna kuti ikhale ntsembe yoshoka, panango ntsembe yomwe munkuipereka ndawa ya polomisi yapadera, panango kuti ikhale ntsembe yachibverano kwa Yahova,
9 munthu yemwe ankupereka uyo ambakapereke ng’ombe imuna iyo pabodzi na ntsembe yambewu. Ntsembe yambewu mwiyo imbakakhale yokwana magawo yatatu pa magawo 10 ya ufa wonyodoka wa mpimo wa efa. Ufa muyo ambakauthire mafuta yokwana hafu ya mpimo wa hini.
10 Komasoti mumbakapereke vinyu kuti ukhale ntsembe yachakumwa. Vinyu muyo umbakakhale hafu ya mpimo wa hini.* Ukakhale ntsembe yowotcha pamoto, ya kapfungo kabwino* kwa Yahova.
11 Mwivi ndivo vomwe munkufunika kumbakachita pakupereka ng’ombe imuna iriyose, nkhosa iriyose imuna, mwana wa nkhosa aliyese mwamuna panango mbuzi iriyose.
12 Mumbakachite vimwevi na nyama iriyose yomwe munkuipereka ntsembe, olo vikhale vizinji tani.
13 Munthu aliyese yemwe ni nzika mu Izirayeli ambakachite vimwivi pakupereka ntsembe yowotcha pamoto, ya kapfungo kabwino* kwa Yahova.
14 Peno mulendo yemwe akukhala namwe panango yemwe wakhala namwe kwa mibadwomibadwo, ankufuna kupereka ntsembe yowotcha pamoto ya kapfungo kabwino* kwa Yahova, ambakachite ninge momwe imwepo munkuchitira.
15 Imwepo omwe ndimwe mpingo wa Izirayeli na mulendo yemwe ankukhala pakati panu, mukhale na malamulo yolingana. Mumbatewedze malamulo mwaya m’mibadwo yanu yose mpakana kalekale, mulendo na imwepo ni chibodzibodzi pamaso pa Yahova.
16 Pakhale malamulo na vigamulo volingana kwa imwepo na kwa alendo omwe ankukhala namwe.’”
17 Yahova adapitiriza kuyankhula na Mose kuti:
18 “Yankhula na Aizirayeli ndipo uwauze kuti: ‘Mukakangena mudziko yomwe ninkukuyendesani,
19 mumbakapereke chopereka kwa Yahova pa chakudya chirichose cha mudziko mwiyo, chomwe mumbakadye.
20 Mumbakapereke mikate yabololindo yoboola pakati ya ufa wamisere kuti yakhale chopereka cha vipaso voyambirira kukhuma. Mumbakayapereke ninge momwe muperekera chopereka chochokera populira mbewu.
21 Mumbakapereke kwa Yahova ufa wamisere wa vipaso vanu vinango voyambirira ku mibadwo yanu yose.
22 Koma mukaphonyesa vinthu nkukangira kusunga malamulo yose mwaya yomwe Yahova wayankhula kupitira mwa Mose,
23 vose vomwe Yahova wakulamulani kupitira mwa Mose, kuchokera pantsiku yomwe Yahova adalamula mpakana kutsogolo mu mibadwo yanu yose,
24 peno mwaphonyesa mosadziwa, ndipo gulu yose mwiyo iribe kudziwa, gulu yose mwiyo imbakapereke ng’ombe ing’ono imuna kuti ikhale ntsembe yoshoka ya kapfungo kabwino* kwa Yahova. Mumbakapereke ntsembe mwiyo pabodzi na ntsembe yake yambewu na ntsembe yake yachakumwa pakutewedza dongosolo ya nthawe zose. Mumbakapereke pomwe mbuzi ibodzi ing’ono kuti ikhale ntsembe yamachimo.
25 Wantsembe ambakapereke ntsembe yopsyimphirizira machimo yose ya gulu ya Aizirayeli. Akachita teno, wanthu mwawo adzakhululukiriwe ndawa adaphonyesa mosadziwa, ndawa apereka ntsembe yoshoka kwa Yahova komasoti apereka ntsembe yamachimo kwa Yahova ndawa ya vomwe adaphonyesa ivo.
26 Gulu yose ya Aizirayeli idzakhululukiriwe pabodzi na mulendo yemwe ankukhala nawo, ndawa wanthu wose mwawo adaphonyesa vinthu mosadziwa.
27 Munthu aliyese akachimwa mosadziwa, ambakapereke mbuzi ikazi yosapitirira gole ibodzi kuti ikhale ntsembe yamachimo.
28 Wantsembe ambakapereke ntsembe yopsyimphiriza chimo ya munthu yemwe waphonya pakuchimwira Yahova mosadziwa, ndipo adzakhululukiriwe.
29 Munthu akachita chimo mosadziwa, padzakhale lamulo yolingana kwa munthu yemwe ni nzika mu Izirayeli na kwa mulendo wokhala pakati pawo.
30 Koma munthu yemwe wachita chimo mwadala, peno akhale nzika panango mulendo, ndiye kuti wanyoza Yahova ndipo afunika kuphewa kuti osati akhale pomwe pakati pa wanthu wake.
31 Ndawa yakuti wanyoza mawu ya Yahova komasoti alibe kubvera lamulo yake, shuwadi munthu muyo ambaphewe. Ambadawire mulandu wa chimo yake mwiyo.’”
32 Ntsiku inango Aizirayeli ali muchipululu, adagumana munthu munango ankuthyola nkhuni pantsiku ya Satade.
33 Omwe adamugumana ankuthyola nkhuni awo adayenda naye kwa Mose na Aroni komasoti komwe kwenze gulu yose mwiyo.
34 Iwo adamufungira ndawa penze palibe lamulo yasitiriti ya vomwe ambafunika kuchita na munthu muyo.
35 Manje Yahova adauza Mose kuti: “Munthu muyo aphewe basi. Gulu yose ikamuphwanye na minyala kunja kwa nsasa.”
36 Pamwapo gulu yose mwiyo idayenda naye kunja kwa nsasa komwe adamuphwanya na minyala mpakana kufa, mobverana na vomwe Yahova adalamula Mose.
37 Yahova adauza pomwe Mose kuti:
38 “Yankhula na Aizirayeli ndipo uwauze kuti ambasonerere usalu m’mphepete mwa vovala vawo, ku mibadwo yawo yose. Ambasonerere pomwe chingwe chagirini* padzulu pa usalu wa m’mphepete mwa vovala mwivo.
39 ‘Vovala vanu vimbakhale na usalu kuti mukaviwona mumbakumbukire malamulo yose ya Yahova na kuyasunga. Ayi kumbandotewedza vofuna va mitima yanu na maso yanu, ndawa ndivo vikuchitisani kuti muleke kukhala wokhulupirika kwa inepano.*
40 Lamulo mwiyi ikuthandizeni kuti mumbakumbukire na kusunga malamulo yangu yose na kukhala wochena kwa Mulungu wanu.
41 Inepano ndine Yahova Mulungu wanu, yemwe nidakubulisani mudziko ya Iguputo, kuti niwonese kuti ndine Mulungu wanu. Inepano ndine Yahova Mulungu wanu.’”
Mawu ya m’nyantsi
^ Muchiyankhulo choyambirira adati: “kapfungo kokhazika ntima pasi.”
^ Gawo ibodzi pa magawo 10 ya mpimo wa efa ni yolingana na malitru 2,2. Onani vakumapeto B14.
^ Mpimo wa hini ni wolingana na malitru 3,67. Onani vakumapeto B14.
^ Muchiyankhulo choyambirira adati: “kapfungo kokhazika ntima pasi.”
^ Mpimo wa hini ni wolingana na malitru 3,67. Onani vakumapeto B14.
^ Muchiyankhulo choyambirira adati: “kapfungo kokhazika ntima pasi.”
^ Muchiyankhulo choyambirira adati: “kapfungo kokhazika ntima pasi.”
^ Muchiyankhulo choyambirira adati: “kapfungo kokhazika ntima pasi.”
^ Muchiyankhulo choyambirira adati: “kapfungo kokhazika ntima pasi.”
^ Panango kuti: “cha azul.”
^ Komwe ni kuchita uhule wauzimu, panango kutumikira milungu yanango.
