Numeri 32:1-42
-
Adayamba kukhala kumachibese kwa Yorodano (1-42)
32 Manje wana wa Rubeni na wana wa Gadi enze na vipfuwo vizinji ndipo adawona kuti dera ya Yazeri komasoti dera ya Giliyadi, yenze malo yabwino ya vipfuwo.
2 Pamwapo wana wa Gadi na wana wa Rubeni mwawo adayenda kwa Mose, wantsembe Eleazara na atsogoleri wa gulu mwiyo nkukawauza kuti:
3 “Ataroti, Diboni, Yazeri, Nimira, Hesiboni, Eleyale, Sebamu, Nebo, na Beoni,
4 ni madera yomwe Yahova adayawina kuti yakhale ya Aizirayeli. Madera mwaya ni yabwino kwa vipfuwo ndipo atumiki wanu ise tinavipfuwo vizinji.”
5 Adapitiriza pomwe kuti: “Peno mungatikomere ntima atumiki wanu ise, mutipase madera mwaya kuti yakhale yathu. Osati tiyambukembo Yorodano.”
6 Koma Mose pakudawira, adabvunza wana wa Gadi na wana wa Rubeni mwawo kuti: “Ko munkufuna kuti abale wanu ayende kunkhondo koma imwepo mukhale kuno?
7 Ndawa chani munkufuna kufokesa Aizirayeli kuti osati ayambukire kudziko yomwe Yahova adatsimikiza kuwapasa?
8 Ni vimwivi vomwe azibereki wanu adachitambo ku Kadesi-barinea panidawatuma kuti akayendeze dziko.
9 Iwo padafika kuchigwa cha Esikolo nkuiona dziko mwiyo, adafokesa Aizirayeli kuti osati akangene mudziko yomwe Yahova adatsimikiza kuwapasa.
10 Pantsiku mwiyo Yahova adakalipa maninge ndipo adalumbira kuti:
11 ‘Amuna omwe adabula mu Iguputo kuyambira wa magole 20 kuyenda kutsogolo adzaionelini dziko yomwe nidalumbira kuti nidzaipereke kwa Abulahamu, Isaki na Yakobo, ndawa alibe kunibvera na ntima wose.
12 Koma Kalebe mwana wa Yefune Mkenizi na Yoswa mwana wa Nuni adzaione dziko mwiyo ndawa akhala ankubvera Yahova na ntima wose.’
13 Yahova adakalipa nawo maninge Aizirayeli ndipo adachitisa kuti ambandofambafamba muchipululu kwa magole 40, mpakana m’badwo wose wochita voipa pamaso pa Yahova kumala.
14 Imwepo munkuchitambo voipa ninge momwe ambachitira azibereki wanu, ndipo munkuchitisa kuti ukali wa Yahova wogaka moto uingizirike pa Izirayeli.
15 Mukaleka kumubvera, shuwadi iye adzachitise kuti wanthu wose apitirize kukhala muchipululu muno ndipo mudzachitise kuti wanthu wose mwawa adzudzike maninge.”
16 Patsogolo pake iwo adayenda pomwe kwa iye nkunena kuti: “Tibvumizeni kuti timange makhola yaminyala ya vipfuwo vathu kunkuno na mathaundi ya wana wathu.
17 Koma isepano tikonzeke kukamenya nkhondo ndipo tikhale patsogolo pa Aizirayeli mpakana tikawafikise kumalo yawo. Koma wana wathu tiwasiye m’mathaundi yokhala na mipanda yolimba maninge kuti tiwateteze kwa wanthu wa dziko ino.
18 Tidzabwererelini kumuyi kwathu mpakana aliyese wa Aizirayeli atambire malo kuti yakhale yake.
19 Isepano tidzatambirelini nawo malo tsidya iyo ya Yorodano kuyenda kutsogolo ndawa tatambira kale malo yathu kutsidya yakumachibese kwa Yorodano.’
20 Mose adawauza kuti: “Viri bwino, koma vikwanisike peno mungachite ivi: Mutenge vitsulo nkukamenya nkhondo pamaso pa Yahova.
21 Komasoti peno aliyese wa imwepo atenge vitsulo vake vankhondo nkuyambuka Yorodano pamaso pa Yahova, mpakana kuthamangisa azondi wake pamaso pake,
22 komasoti mpakana dziko mwiyo kuwiniwa pamaso pa Yahova. Patsogolo pake mungadzabwerere ndipo mudzakhale mulibe mulandu kwa Yahova na kwa Aizirayeli. Patsogolo pake dziko mwiyi idzakhale yanu pamaso pa Yahova.
23 Koma mukaleka kuchita vimwivi mudzakhale kuti mwachimwira Yahova. Ndipo mukateno, dziwani kuti chimo yanu idzakulondoleni.
24 Manje mungamange mathaundi ya wana wanu na makhola ya vipfuwo vanu. Koma muchitedi vomwe mwapolomisa.”
25 Wana wa Gadi na wana wa Rubeni adadawira Mose kuti: “Isepano atumiki wanu tichite vomwe mwalamula mbuya wathu.
26 Wana wathu na akazi wathu akhale kuno m’mathaundi ya Giliyadi pabodzi na vipfuwo vathu vose.
27 Koma atumiki wanu ise tiyambuke, aliyese atenge vitsulo nkukamenya nkhondo pamaso pa Yahova, mobverana na vomwe imwepo mwanena mbuya wathu.”
28 Manje Mose adapereka lamulo yonena va iwo kwa wantsembe Eleazara, Yoswa mwana wa Nuni na kwa atsogoleri wa madzinza ya Izirayeli.
29 Iye adawauza kuti: “Peno wana wa Gadi na wana wa Rubeni ayambuke namwe pabodzi Yorodano, aliyese nkunyamula vitsulo kuti akamenye nkhondo pamaso pa Yahova, nkuwina dziko mwiyo pamaso panu, mudzawapase dziko ya Giliyadi kuti ikhale yawo.
30 Koma akaleka kunyamula vitsulo nkuyambuka namwe pabodzi, basi ambadzakhale namwe pabodzi mudziko ya Kanani.”
31 Wana wa Gadi na wana wa Rubeni padabva mawu mwaya adati: “Tidzachite vomwe Yahova wayankhula kwa atumiki wanu ise.
32 Tidzayambuke na vitsulo nkukamenya nkhondo pamaso pa Yahova mudziko ya Kanani. Koma tidzatambire malo yathu tsidya ino ya Yorodano.”
33 Pamwapo Mose adapereka malo kwa wana wa Gadi, wana wa Rubeni na hafu ya dzinza ya Manase mwana wa Yosefe. Adawapasa malo ya ufumu wa Sihoni mpfumu ya Aamori, malo ya ufumu wa Ogi mpfumu ya Basana na dera yose ya mathaundi na miyi yozungulira.
34 Ndipo wana wa Gadi adamanga* mathaundi ya Diboni, Ataroti, Aroweli,
35 Atiroti-sofani, Yazeri, Yogebeha,
36 Beti-nimira na Beti-harana. Mathaundi mwaya yenze na mipanda yolimba maninge komasoti yenze na makhola ya minyala ya vipfuwo.
37 Wana wa Rubeni adamanga mathaundi ya Hesiboni, Eleyale, Kiriataimu,
38 Nebo, Baala-meoni, na Sibima. Madzina ya mathaundi mwaya adayachinja, nkuyapasa madzina yanango yanyowani.
39 Wana wa Makiri mwana wa Manase, adamenyana na wanthu wa mu thaundi ya Giliyadi nkuitenga ndipo adathamangisa Aamori omwe ambakhala muthaundi mwiyo.
40 Pamwapo Mose adapereka thaundi ya Giliyadi kwa Makiri mwana wa Manase, ndipo iye adayamba kukhala mumo.
41 Yairi mwana wa Manase adamenyana na Aamori nkutenga mamiyi yawo yang’onoyang’ono. Mamiyi mwaya adayamba kuyachemera kuti Havoti-yairi.*
42 Noba nayembo adamenyana na wanthu wa muthaundi ya Kenati na miyi yake yozungulira. Thaundi mwiyo adaipasa dzina yake, yakuti Noba.
