Numeri 16:1-50
16 Patsogolo pake Kora mwana wa Izara, mwana wa Kohati, mwana wa Levi, adabverana na azizukulu wa Rubeni, omwe ni Datani na Abiramu wana wa Eliyabu, na Oni mwana wa Pelete, kuti aphinduke.
2 Iwo pabodzi na amuna wa Chiizirayeli okwana 250 adaphindukira Mose. Amuna mwawo enze atsogoleri wa wanthu mwawo, amuna osankhuliwa pakati pa Aizirayeli, amuna obvekera.
3 Pamwapo iwo adasonkhana nkuyamba kutsutsana na Mose na Aroni kuti: “Taneta namwe manje. Gulu yose mwiyi ni yochena, ndipo Yahova ali pakati pawo. Manje ndawa chani imwepo munkudzikwiza pampingo wa Yahova?”
4 Mose padabva vimwevi, nthawe mwiyoletu adagwada nkujolima mpakana nkhope yake pasi.
5 Manje Mose adauza Kora na wanthu wose omwe ambamulondola kuti: “Mangwana machibesebese, Yahova adzawonese munthu yemwe ni wake na yemwe ni wochena, yemwe ni woyenerera kufenderera pamaso pake. Ndipo wati adzamusankhule adzafenderere pamaso pake.
6 Mudzachite ivi: Iwepo Kora na wanthu wose omwe ankukulondola mudzabwerese vofukizira.
7 Mu vofukizira mwivo mudzaikhemo moto na vofukiza nkubwera navo pamaso pa Yahova mangwana. Munthu yemwe Yahova adzamusankhule, ndiye wochena. Mwanyanya imwepo wana wa Levi.”
8 Manje Mose adauza Kora kuti: “Tetekerani, imwepo wana wa Levi.
9 Ko munkuwona kuti ni nkhani ing’ono kuti Mulungu wa Izirayeli adakupatulani pakati pa Aizirayeli, nkukubvumizani kuti mumbafike pamaso pa Yahova kuti mumbatumikire pachihema chake na kutumikira gulu yose mwiyo?
10 Imwe wana wa Levi, ko munkuona ninge nkhani ing’ono kuti Mulungu adakubweresani pafupi na iye pabodzi na abale wanu wose? Ko manje munkufuna pomwe udindo wa untsembe?
11 Ndawa ya vomwe munkuchita ivi, iwepo pabodzi na wanthu wose omwe ankukulondola, munkuphindukira Yahova. Pakunena va Aroni, ko iye ni mbani kuti mumbadandaule va iye?”
12 Patsogolo pake, Mose adatuma munthu kuti akachemere Datani na Abiramu, wana wa Eliyabu. Koma iwo adadawira kuti: “Isepano tibwerekolini kumuko!
13 Ko unkuwona ninge nkhani ing’ono kuti udatichosa mudziko yomwe iyerera nkaka na uchi kuti udzatiphere muchipululu muno? Ko manje unkufuna pomwe kuti umbatitonge uli wekha basi?
14 Waona manje, ulibe kutifikisa kudziko iriyose yomwe iyerera nkaka na uchi panango kutipasa malo na minda ya uva. Ko unkufuna kuti amuna mwawo uwathopsyole maso? Kumuko tibwerekolini!”
15 Mose padabva vimwevi adakalipa maninge ndipo adauza Yahova kuti: “Ntsembe zawo zambewu ayi kuzinyang’ana. Inepano niribe kuwatengerako olo bulu m’bodzi, panango kuchitira aliyese chinthu choipa.”
16 Patsogolo pake Mose adauza Kora kuti: “Mangwana, iwepo na wanthu wose omwe ankukulondola mukaonekere pamaso pa Yahova. Mukaonekere, iwepo, wanthu mwawo na Aroni.
17 Aliyese adzatenge chofukizira chake nkuikhamo vofukiza, ndipo aliyese adzabwerese chofukizira chake pamaso pa Yahova. Vofukizira mwivo vidzakhale vokwana 250, komasoti iwepo na Aroni, aliyese adzakhale na chake.”
18 Pamwapo aliyese adatenga chofukizira chake nkuikhamo moto na vofukiza. Padateno, adayenda kukaima pansuwo wa chihema chogumanako pabodzi na Mose na Aroni.
19 Kora padasonkhanisa wanthu wose womulondola kuti atsutsane nawo pansuwo wa chihema chogumanako, ulemerero wa Yahova udaonekera ku gulu yose mwiyo.
20 Manje Yahova adauza Mose na Aroni kuti:
21 “Chokani pakati pa gulu mwiyi, kuti niwadzonge kabodzi na kabodzi.”
22 Wanthu mwawo padabva vimwivi adagwada nkujolima mpakana nkhope zawo pasi, nkunena kuti: “Pulizi Mulungu, imwepo Mulungu yemwe mupereka moyo kwa wanthu wose,* ko munkukalipira gulu yose mwiyi ndawa ya kuchimwa kwa munthu m’bodzi basi?”
23 Manje Yahova adauza Mose kuti:
24 “Uza gulu yose mwiyo kuti: ‘Ayi kufenderera matenti ya Kora, Datani na Abiramu!’”
25 Patsogolo pake Mose adanyamuka nkuyenda kwa Datani na Abiramu, ndipo akulu wa Izirayeli adayenda naye pabodzi.
26 Padafika adauza gulu mwiyo kuti: “Pulizi, chokani kumatenti ya wanthu oipa awa, ndipo ayi kugumirira chinthu chawo chirichose, kuti osati muphewe nawo pabodzi ndawa ya chimo yawo.”
27 Nthawe mwiyoletu wanthu mwawo adachoka kumbali zose za matenti ya Kora, Datani na Abiramu. Pavidateno, Datani na Abiramu adabula nkuima pansuwo wa matenti yawo, pabodzi na azikazi wawo, wana wawo amuna na wana wawo ang’onoang’ono.
28 Pamwapo Mose adati: “Mudziwire ivi kuti Yahova ndiye wanituma kuti nichite vose mwivi, komasoti kuti ni vamunsololini mwangu:*
29 Peno wanthu mwawa angafe ninge momwe wanthu wose afera, komasoti peno alangiwe ninge momwe wanthu wose alangiriwa, ndiye kuti Yahova alibe kunituma.
30 Koma peno Yahova angawachitire chinthu chachilendo, kuti pasi pang’ambike* nkuwameza na vose vomwe anavo, mwakuti iwo nkuyenda ku Manda* wamoyo, vikakhala teno mudziwedi kuti amuna mwawa anyoza Yahova.”
31 Mose padandomaliza kuyankhula mawu mwaya, pasi pomwe iwo adaponda padang’ambika.
32 Pasi mwapo padang’ambika* nkuwameza pabodzi na mabanja yawo na wanthu anango wose omwe enze kumbali ya Kora pabodzi na katundu wawo wose.
33 Pamwapo iwo pabodzi na wose omwe enze kumbali yawo adangena m’Manda* wamoyo. Dothi idawafuchira, mwakuti iwo adadzongewa pakati pa mpingo wose.
34 Aizirayeli wose omwe enze pamalo mwayo adayamba kuthawa padabva kukuwa kwawo, ndipo adati: “Tinkugopa kuti pasi pangatimeze!”
35 Patsogolo pake moto udachokera kwa Yahova ndipo udashoka amuna 250 omwe ambapereka ntsembe zofukiza wale.
36 Manje Yahova adauza Mose kuti:
37 “Uza Eleazara, mwana wa wantsembe Aroni, kuti achose pamoto vofukizira mwivo ndawa ni vopatulika. Umuuze pomwe kuti awaze moto muyo kutali.
38 Vofukizira va amuna omwe adafa ndawa ya kuchimwa kwawo avipfule kuti vikhale tumalata twathasalala ndipo mukukutidzire guwa yantsembe. Vofukuzira mwivo vidakhala vopatulika ndawa adafika navo pamaso pa Yahova. Manje tumalata muto tukhale chikumbuso kwa Aizirayeli.”
39 Pamwapo wantsembe Eleazara adatenga vofukizira vakobre vomwe wanthu adapsa na moto wale adabweresa, ndipo adavipfula nkukonza tumalata tokukutidzira guwa yantsembe,
40 mobverana na vomwe Yahova adamuuza kupitira mwa Mose. Tumalata muto twenze chikumbuso kwa Aizirayeli kuti munthu wamba* yemwe ni mbadwalini ya Aroni osati ambafenderere kwa Yahova kuti akapereke ntsembe zofukiza. Adachita vimwevi kuti pasagumanike aliyese wochita vomwe Kora pabodzi na wanthu omwe ambamulondola adachita.
41 Koma mangwana yake, gulu yose ya Aizirayeli idayamba kung’ung’uzika motsutsana na Mose komasoti Aroni kuti: “Mwapha wanthu wa Yahova imwe.”
42 Wanthu mwawo adasonkhana pabodzi kuti aphindukire Mose na Aroni, patsogolo pake adachungunuka nkunyang’ana kuchihema chogumanako. Padateno adandowona kuti ntambo wabisa chihema mwicho ndipo ulemerero wa Yahova wayamba kuwonekera.
43 Manje Mose na Aroni adayenda kukaimirira patsogolo pa chihema chogumanako,
44 ndipo Yahova adauza Mose kuti:
45 “Amuna imwe, chokani pakati pa wanthu mwawa kuti niwadzonge kabodzi na kabodzi.” Padabva vimwivi, iwo adagwada nkujolima mpakana nkhope zawo pasi.
46 Patsogolo pake Mose adauza Aroni kuti: “Tenga chofukizira ndipo uikhemo moto wochokera paguwa yantsembe. Uikhemo pomwe ntsembe yofukiza nkuyenda kwa wanthu mwakankulumize kuti ukawapsyimphirizire machimo yawo. Chita vimwivi ndawa Yahova wakalipa maninge ndipo muliri wayamba kale!”
47 Nthawe mwiyoletu Aroni adatenga chofukizira mwicho mobverana na vomwe Mose adamuuza, nkuthamanga kukangena pakati pa mpingo muyo. Koma muliri wenze udayamba kale pakati pawo. Pamwapo Aroni adaikha ntsembe yofukiza ire pa chofukizira mwicho nkuyamba kupsyimphirizira machimo wanthu mwawo.
48 Aroni adapitiriza kuima pakati pa wanthu wakufa na wamoyo, ndipo paidapita nthawe muliri muyo udaleka.
49 Omwe adafa na muliri muyo adakwana 14 700, osawerengera omwe adafa ndawa ya vochita va Kora wale.
50 Panthawe yomwe Aroni ambabwerera kwa Mose pansuwo wa chihema chogumanako, muliri muyo wenze udaleka.
Mawu ya m’nyantsi
^ Muchiyankhulo choyambirira adati: “Mulungu wa mizimu ya vamoyo vose.”
^ Muchiyankhulo choyambirira adati: “ni vamuntima mwangulini.”
^ Muchiyankhulo choyambirira adati: “pasi pafungule pakamwa pake.”
^ Yamwaya ni manda ya wanthu wose. Onani matanthauzo ya mawu yanango.
^ Muchiyankhulo choyambirira adati: “pasi pafungule pakamwa pake.”
^ Yamwaya ni manda ya wanthu wose. Onani matanthauzo ya mawu yanango.
^ Muchiyankhulo choyambirira adati: “mulendo.”
