Onlad karga

Onlad saray karga

Siopa si Abraham?

Siopa si Abraham?

 Siopa si Abraham?

PIGPIGARA labat so singa sikato ya walaay balbaleg ya impluensyad relihyon diad interon mundo. Si Abraham * et rerespetoen na saray Judio, Muslim, tan Kristiano, adeskribin “sakey ed saray importantin karakter ed Kasulatan,” tan “makapadinayew ya alimbawa na pananisia.” Diad Biblia, sikatoy tinukoy ya “ama na amin a walaan na pananisia.”​—Roma 4:11.

Akin et baleg so respeto na totoo ed si Abraham? Say sakey a rason et sikato labat so alenleneg a direktan tinukoy na Biblia ya kaaro na Dios​—tan amitlon beses ni ingen!​—2 Awaran 20:7; Isaias 41:8; Santiago 2:23.

Balet, diad tua et ordinaryon too met si Abraham a singa sikatayo. Dakel met so dinalan ton subok tan problema a singa naeeksperiensya tayo natan​—tan alampasan to iratan. Labay mon naamtaan no panon ton agawaan itan? Nengnengen tayoy ibabagay Biblia nipaakar ed sayan makapadinayew a too.

Say Nanlapuan tan Sisiaen To

Si Abraham et nianak nen 2018 B.C.E., tan binmaleg ed Ur. (Genesis 11:27-31) Say Ur et baleg tan mayaman a syudad. Saray totoo ditan et grabe so panagdayew dad imahen. Ompan anggan say ama nen Abraham ya si Tera et nandayew met ed saratan. (Josue 24:2) Balet, say dinayew nen Abraham et si Jehova * aliwan saray andiay-bilay ya imahen.

Akin et ontan so desisyon nen Abraham? Nianak si Abraham 150 a taon sakbay na impatey na anak nen Noe a si Sem. No bilang ta apiulopan to iyan mas maedad a laki, anto kasi epektod sikato? Nayarin naistorya nen Sem ed sikato no antoy liknaan na makaliktar ed sankamundoan a Delap. Naamtaan to met so kaimportantian na pandayew ed si Jehova, say Dios ya angiliktar ed si Sem tan ed pamilya tod satan a Delap.

Siopaman bilang so akaamtaan nen Abraham nipaakar ed tuan Dios, sikatoy kinmiwas unong ed satan. Uusisaen nen Jehova so puso, kanian diad impangusisa tod puso nen Abraham, anengneng toy kamaongan ed sayan too, tan tinulongan to pian diad ontan et lalon nipanengneng nen Abraham iyan kualidad.​—Uliran 17:3; 2 Awaran 16:9.

Say Bilay To

Maliket tan napnoy aksion so bilay nen Abraham. Makabkabaliksan so bilay to anggano dakel so dinalan ton subok. Nia ra ay so pigaran naeksperiensya to.

Sanen manaayam nid Ur si Abraham, sikatoy ingganggan na Dios ya taynan toy binalegan ton lugar tan onlad bansa ya pangibakian ed sikato. Ag-amta nen Abraham tan Sara so amin a detalye, no iner so laen da odino akin ya onla ra diman, balet ta siansian tinmulok ira. Diad saginonor, nanayam irad tolda diad dalin na Canaan, a ditan et nambilay iran miaayam labat legay bilay da.​—Gawa 7:2, 3; Hebreos 11:8, 9, 13.

Sanen anggapo ni anak di Abraham tan Sara, insipan nen Jehova a gawaen ton baleg a nasyon so poli nen Abraham. Inyarum ni nen Jehova ya diad panamegley nen Abraham et nabendisyonan so amin a pamilyad dalin. (Genesis 11:30; 12:1-3) Kalabas na pigaran taon, pinaletan nen Jehova iyan sipan  to. Imbaga tod si Abraham ya ondakel so ilalak to, a singa karakel na saray bitewen ed tawen.​—Genesis 15:5, 6.

Sanen 99 años nen Abraham tan ngalngali 90 años nen Sara, insipan nen Jehova a nawalaan iray anak a laki. No parad too, singa imposible itan, balet apaneknekan di Abraham tan Sara ya anggapoy ‘bengatlan mairap ed si Jehova.’ (Genesis 18:14) Kayari sakey taon, sanen 100 años la nen Abraham, inilalak toy sakey ya ugaw a laki, a nginaranan ton Isaac. (Genesis 17:21; 21:1-5) Espisipikon insipan na Dios a panamegley nen Isaac et naawat na totoo so dakel a bendisyon.

Kayari pigaran taon, walay nikadkaduman pagagawa nen Jehova ed si Abraham: Kinerew tod si Abraham ya ibagat toy inad-aro ton Isaac, anta kalangweran ni tan anggapo ni asawa tan ilalak to. * Anggano ansaki-sakit parad si Abraham so pakaandi anak to, sikatoy namparaan pian unoren so kerew na Dios. Mabiskeg so pananisia nen Abraham a no nakaukolan et sarasarag na Dios ya bilayen lamet si Isaac pian natoor Toy sipan To. (Hebreos 11:19) Sanen kuan to lan ibagat so anak to, sinmalet so Dios, kanian asalbay bilay nen Isaac. Inapresya na Dios so makapadinayew ya intulok nen Abraham. Insan diad satan et inulit lamet nen Jehova iray sipan tod si Abraham.​—Genesis 22:1-18.

Inatey si Abraham sanen 175 años to. Ibabaga na Biblia ya sikatoy inatey a ‘masiken tan napnek na taotaon.’ (Genesis 25:7, 8) Tinoor na Dios sirin so sananey nin sipan tod si Abraham​—ya andukey so bilay to.​—Genesis 15:15.

Say Pakanodnonotan Tayod Sikato

Si Abraham et aliwa labat lan karakter ed Biblia odino kabkabat a toon nambilay nensaman. Anggad panaon tayo, say istorya na bilay to et maabig ya alimbawa ed sikatayo. (Hebreos 11:8-10, 17-19) Diad onsublay iran artikulo, naamtaan tayoy apatiran maabig a kualidad nen Abraham. Igapo tayod samay kualidad ya talagan ditan akabkabat si Abraham​—pananisia.

[Saray paimano ed leksab]

^ par. 2 Say datin ngaran nen Abraham et Abram tan say asawa ton si Sara et Sarai. Balet, sinalatan na Dios so ngaran da. Say ngaran nen Abram et nagmaliw ya Abraham, ya say kabaliksan to et “Ama na Karaklan,” tan say ngaran nen Sarai et nagmaliw a Sara, a mankabaliksay “Prinsesa.” (Genesis 17:5, 15) Pian mas mainomay, usaren tayo so ngaran ya Abraham tan Sara diad sarayan artikulo.

^ par. 6 Ibabaga na Biblia a say ngaran na Dios et Jehova.

[Kahon ed pahina 4]

Importantin Karakter ed Biblia

Diad unonan samploran kapitulo na libro na Biblia a Genesis, nabasa so istoryay bilay na pigaran matoor a lalaki, kaibay Abel, Enoc, tan Noe. Balet, say onsublay ya 15 kapitulo na satan a libro et nipaakar labat ed saksakey a laki​—si Abraham.

Ontan met, diad Biblia, wala ray importantin ideya a say unonan pakabasaan et diad istoryay bilay nen Abraham. Singa bilang, diad istoryay bilay to so pakabasaan na . . .

unonan impanukoy ed Dios bilang Kinlong odino Salimbeng na saray lingkor to.​—Genesis 15:1; nengnengen so Deuteronomio 33:29; Salmo 115:9; Uliran 30:5.

unonan impanalambit ed pananisia ed Dios.​Genesis 15:6.

unonan impangusar ed salitan propeta.​Genesis 20:7.

unonan impanukoy ed panangaro na ateng.​—Genesis 22:2.