“Manalwar Kayo ed Lebadura na Saray Fariseo”

Pinasakbayan nen Jesus iray disipulo to: “Manalwar kayo ed lebadura na saray Fariseo, a saya et pansimpisimpitan.” (Luc. 12:1) Sayan pasakbay et insulat met nen Mateo, tan impalinew to ya say kokondenaen nen Jesus et say “bangat” na saray Fariseo.​—Mat. 16:12.

No maminsan, uusaren ed Biblia so “lebadura,” odino pampalebag, bilang simbolo na kaugsan. Akaimpluensya iray bangat tan kagagawa na saray Fariseo ed dakel ya totoo. Akin et mapeligro so bangat da?

1 Inlastog na saray Fariseo ya matunong ira, tan minelmelag da ray ordinaryon totoo.

Impaimano nen Jesus iyan pantunongtunongan diad sakey ed saray parabolo to. Inkuan to: “Akaalagey so Fariseo tan onia iray impikasi to diad inkasikaton dili, ‘O Dios, misalamat ak ed sika ta aliwa ak a singa saray arum a totoo, a matatakew, agmatunong, managkalugoran, odino anggan singa sayan managsingil na buis. Mamidua ak a manaayunal ed sakey simba, iiter koy kakaplo na amin a nanaalmoan ko.’ Balet say managsingil na buis ya akaalagey ed arawi et agto labay so anggan ontangay ed tawen, balet tatapoktapoken toy pagew to, ya ibabaga ton, ‘O Dios, kasian mo ak a sakey a managkasalanan.’”​—Luc. 18:11-13.

Inabobonan nen Jesus so inkamapaabeba na managsingil na buis, ya inkuan to: “Ibagak ed sikayo, Sayan laki et sinmempet ed abung to ya apaneknekan a mas matunong nen samay [Fariseo]; lapud balang too a mangiyaatagey ed inkasikato et niyabeba, balet say mangiyaabeba ed inkasikato et niyatagey.” (Luc. 18:14) Anggaman kabkabat ya mansasaol iray managsingil na buis, tinulongan nen Jesus iramay dinmengel ed sikato. Tan duara ed sikara so nagmaliw ya patumbok to, si Mateo tan Zaqueo.

Panon to no iisipen tayon mas maong ti ni nen saray arum ta maabilidad tayo, wala ray pribilehyo tayo, odino wala ray kalilingoan tan kakapuyan na arum. Nepeg ya ekalen tayo itan a tampol ed nonot, ta oniay ibabaga na Biblia: “Say aro et walaan na andukey a panag-anos tan mapangasi. Say aro et aliwan maimon, agmanlalastog, agmanpapaatagey, ag-onkikiwas a mabanday, agmanaanap na pankaabigan ton dili, aliwan misasanok. Ag-itan manbibilang na impakasakitan. Ag-itan manliliket ed ag-inkatunong, noagta manliliket ed katuaan.”​—1 Cor. 13:4-6.

Nepeg tayon aligen so awawey nen apostol Pablo. Kayari ton imbaga ya “si Kristo Jesus et linma ed mundo pian ilaban to iray managkasalanan,” inyarum to: “Diad saraya et siak so sankamanunaan.”​—1 Tim. 1:15.

Saray tepet parad pandalepdep:

Kasin bibidbiren ko a makasalanan ak tan akadepende ed agnaparaan a kaabigan nen Jehova so kilalaban ko? Odino ipapasen kon mas atagey ak nen say arum lapud abayag ak lan manlilingkor, lapud wala ray pribilehyok ed organisasyon na Dios, odino lapud maabilidad ak?

  2 Impangta na saray Fariseo so inkatunong da pian pabilibey arum. Pabidbir ira tan labalabay day patawag ed ataragey iran titulo.

Balet impasakbay nen Jesus: “Amin a gawa ra et gagawaen da pian nanengneng na totoo, ta papalaparen da iray filacteria [pananginay kasulatan] ya isusulong da bilang salimbeng, tan paparukeyen da iray palagaygay na saray kawes da. Labalabay day sankamanunaan a pasen diad saray ponsia tan no walara ed sinagoga et labalabay day onyurong ed arapan, tan labalabay day paibano diad saray tindaan tan patawag na Rabbi ed saray totoo.” (Mat. 23:5-7) Miduman tuloy so awawey nen Jesus ed sikara. Anggaman perpekton Anak na Dios, sikatoy mapaabeba. Sanen tinawag na sakey a laki si Jesus ya “maong,” inkuan to: “Akin et tatawagen mo ak a maong? Anggapoy arum a maong, noag say Dios labat.” (Mar. 10:18) Diad sananey ya inkagawa, inurasan nen Jesus so kasalian na saray disipulo to, sirin et angipanengneng na alimbawa na kapaabebaan ed saray papatumbok to.​—Juan 13:1-15.

Saray tuan Kristiano et nepeg dan panlingkoran iray kaagian da. (Gal. 5:13) Importante iyan kualidad lalo lad saray malabay ya onkualipika bilang manangasikaso ed kongregasyon. Duga labat no say sakey et ‘dadampoten to so betang na manangasikaso,’ balet nepeg ya say gagala to et pian panlingkoray arum. Sayan “betang” et aliwan posisyon pian nakabat odino nawalaay autoridad. Kaukolan ya saray manlilingkor et “mapaabeba,” a singa si Jesus.​—1 Tim. 3:1, 6; Mat. 11:29.

Saray tepet parad pandalepdep:

Kasin walay tendensiak ya mangalay lupa ed saray walaay responsabilidad ed kongregasyon pian nabidbir odino naikdan na kaaruman a pribilehyo? Kasin mas labay ko imay pribilehyon nakabkabat tan nirayew ak? Kasin sasalien kon daegen so arum?

 3 Lapud saray totontonen tan tradisyon na saray Fariseo, nagmaliw a maka- pabelat so Ganggan ed saray totoo.

Intarya so Mosaikon Ganggan pian amta na saray Israelita no panon dan dayewen si Jehova. Balet, ag-intarya na satan iray angkekelag ya detalye. Singa bilang, insebel na Ganggan so pankimey ed Sabaton, ingen ta ag-indetalye na satan no anto ray nepeg tan agnepeg a gawaen ed satan ya agew. (Exo. 20:10) Kanian inaruman itan na saray Fariseo na sarili dan ganggan tan tradisyon. Tinumbok nen Jesus so Mosaikon Ganggan, balet agto inunor iray mapegpeget ya totontonen na saray Fariseo. (Mat. 5:17, 18; 23:23) Atalosan to so gagala na ganggan na Dios, tan amta ton labay na Dios ya ipanengneng na totoo so panangasi tan panangabagey. Makatunongan si Jesus, anggan sanen sikatoy dinismaya na saray papatumbok to. Alimbawa, sanen binagaan toy taloran apostol to ya manbantay tan ag-onuugip diad samay labi na pangaresto ed sikato, aminpiga ran akaugip. Anggaman ontan, mapangasi ton inkuan ed sikara: “Magunaet so espiritu, balet maletey so laman.”​—Mar. 14:34-42.

Saray tepet parad pandalepdep:

Kasin manggagawa ak na istrikto iran totontonen tan labay kon unoren iratan na arum? Kasin lanang kon ipipilit so opinyon ko? Kasin atagtagey so iilaloan kod arum?

Isip mo pay pandumaan na bangat nen Jesus tan na saray Fariseo. Kasin wala ray kaukolan mon gawaen pian lalom a naalig si Jesus? No ontan, gawam so anggaay nayarian mo.

[Litrato ed pahina 28]

Insulong na saray Fariseo iray pananginay kasulatan.​—Mat. 23:2, 5

[Saray litrato ed pahina 29]

Aliwan singa saray malastog ya Fariseo, panlilingkoran na saray mapaabeban elder so arum

[Litrato ed pahina 30]

Makatunongan ka kasi a singa si Jesus, odino atagtagey so iilaloan mod arum?