1. Anton paraan na panagaral so ginawa nen Brother Russell tan saray kaiba to, tan akin ya epektibo itan?

MASULOK ya 100 a taon lay apalabas, si Brother Charles Taze Russell tan saray kaiba to et ginmapon nantitipon pian aralen so Salita na Dios. Labay dan naamtaan no anton talaga so ibabangat na Biblia nipaakar ed si Jehova, si Jesu-Kristo, say kipapasen na inaatey, tan say dondon. Simpli labat so paraan na panagaral da. Walay mantepet ed sakey ya topic, insan da aralen so kada teksto ya mikonektaan ed satan ya topic. No asumpal la ra, isulat dan amin so naaralan da. Tinulongan nen Jehova irayan lalaki ya natalosan iray importantin katuaan ed Biblia ya papablien tayo anggad natan.

2. Anto ray rason no akin ya aliway pakatalos tayo no maminsan ed sakey ya propesiya ed Biblia?

² Anengneng balet na sayan grupo ya saray propesiya ed Biblia et mas mairap a talosan nen saray manunan bangat na Biblia. Akin? Say sakey a rason et natalosan labat a maong iray propesiya ed Biblia sano nagagawa la iratan odino asumpal la. Balet wala ni sananey a rason. Pian natalosan so sakey a propesiya, kaukolan ya ikonsidera so konteksto. No manpokus tayo labat ed saksakey ya kabiangan na propesiya tan ibaliwala tayo so konteksto, ompan aliway natalosan tayo. Ontan so agawa ed pakatalos tayo ed sakey a propesiya ed libro na Joel. Repasoen tayo itan ya propesiya tan pantongtongan tayo no akin ya kaukolan ya umanen so datin pakatalos tayo ed satan.

3-4. Antoy pakatalos tayo ed propesiya ya walad Joel 2:7-9?

³ Basaen so Joel 2:7-9. Impropesiya nen Joel ya deralen na saray duron so dalin na Israel. Saray ngipen tan panga na  sarayan duron et mipara ed ngipen tan panga na leon, tan kanen da so amin ya nanengneng da! (Joel 1:4, 6) Abayag tayon panisiaan ya ontutukoy iyan propesiya ed panagpulong a kimey na saray totoo nen Jehova, ya singa ra amungkog a duron ya agnapatunda. Imbaga tayo ya say kimey tayo et makaderal so epekto to ed “dalin” odino totoon kontrolado na saray lider na relihyon. *

⁴ No say basaen tayo labat et Joel 2:7-9, singa duga met itan ya eksplinasyon. Balet no aralen tayo so konteksto, nanengneng tayo ya walay duman eksplinasyon na satan. Amtaen tayoy apatiran rason no akin.

5-6. Anto ray nitepet tayo no ikonsidera tayo so (a) Joel 2:20? (b) Joel 2:25?

⁵ Unona, imanoen so insipan nen Jehova ya gawaen tod saray duron: “Pataynanen kod sikayo imay taga amianen [saray duron].” (Joel 2:20) No say isisimbolo na saray duron et saray Tasi nen Jehova ya manguunor ed ganggan nen Jesus ya manpulong tan manbangat, akin et ibaga nen Jehova ya pataynanen to ra? (Eze. 33:7-9; Mat. 28:19, 20) Agbalot pataynanen nen Jehova iray matoor ya lingkor to. Say pataynanen to et saray mamapairap ed totoo to.

⁶ Komadua, imanoen so nabasa ed Joel 2:25. Imbaga nen Jehova: “Ipawil kod sikayo so naandi ed saray taon sanen saray tanem yo et kinan na saray amungkog a duron, andiay-payak a duron, masisiban duron, tan managderal a duron, say baleg ya armadak ya imbakik ed sikayo.” Imanoen ya insipan nen Jehova ya ‘ipawil to’ so antokaman ya dineral na saray duron. No say isisimbolo na saray duron et saray mangipupulong ed Panarian, agta ompapaway laingen ya makaderal so mensahe ra? Balet diad tua, say mensahe ra et mangisalba na bilay ta napapakiwas ya magbabawi iray mauges. (Eze. 33:8, 19) Maong sirin so epekto na mensahe ra, aliwan makaderal!

7. Akin et nepeg tayon imanoen iray salitan “kayari na satan” diad Joel 2:28, 29?

⁷ Basaen so Joel 2:28, 29. Imanoen so komatlon rason​—say pantutumbokan na saray nagawa ed satan ya propesiya. Kasin naimanom imay imbaga nen Jehova ya, “Kayari na satan et ikalbok so espirituk”? Ontutukoy itan ed panaon sano asumpal la na saray duron so ipapagawa tod sikara. No say isisimbolo na saray duron et saray mangipupulong ed Panarian na Dios, akin ya say pangikalbo nen Jehova na espiritu to ed sikara et dia nid pakasumpal da ed kimey ya panagpulong? Diad tua, ikakalbo to la natan ed sikara so masanton espiritu to, ta no andi, agda nituloy so panagpulong da ed dakel ya taon lapud grabe so isusumpa tan pananebel ed kimey da.

8. Siopa so isisimbolo na saray duron ya adeskribe ed Apocalipsis 9:1-11? (Nengnengen so litrato ed apis.)

⁸ Basaen so Apocalipsis 9:1-11. Imanoen tayo natan so komapat ya rason. Inisip tayo ya say inlusob na saray duron ya binitla nen Joel et ontutukoy ed panagpulong lapud mipara itan ed propesiya ya walad libro na Apocalipsis. Adeskribe ed satan ya propesiya so amungkog a duron ya “say lupa ra et singa lupa na too” tan “diad ulo ra et wala ray singa koronan balitok.” (Apo. 9:7) Pinairap da iray kalaban na Dios odino saray  “totoon anggapoy tatak na Dios ed saray moling da” diad loob na limay bulan, say normal ya karukey na bilay na duron. (Apo. 9:4, 5) Mapatnag ya ontutukoy itan ya propesiya ed saray alanaan ya lingkor nen Jehova. Makpel dan iyaabawag so panangukom na Dios ed mundo nen Satanas kanian singa da papairapen so amin ya onsusuporta ed satan.

9. Anto ray pandumaan na saray duron ya anengneng nen Joel tan anengneng nen Juan?

⁹ Talagan wala ray pamparehoan na samay propesiya ed Apocalipsis tan samay propesiya nen Joel. Balet diad tua et baleg so pandumaan da. Singa bilang, diad propesiya nen Joel, dineral na saray duron iray tanaman tan kakiewan. (Joel 1:4, 6, 7) Balet diad Apocalipsis ya insulat nen Juan, imbaga ed saray duron ya ‘agda sasakitan iray dika, tanaman, odino kiew.’ (Apo. 9:4) Saray duron ya anengneng nen Joel et nanlapud amianen. (Joel 2:20) Saray duron balet ya anengneng nen Juan et nanlapud kaaralman. (Apo. 9:2, 3) Saray duron ya anengneng nen Joel et pinataynan nen Jehova. Balet diad Apocalipsis, saray duron et agpinataynan nen Jehova noagta inabuloyan to ran sumpalen day gagawaen da tan anggapoy nabasa ya kabusol to ra.​—Nengnengen so kahon ya “ Saray Propesiya Nipaakar ed Duron​—Walay Pamparehoan Da Balet Mandumaan.”

10. Mangiter na alimbawa ed Biblia a mangipapanengneng ya mandumaan so isisimbolo na saray duron ya anengneng nen Joel tan Juan.

 ¹⁰ Lapud baleg so pandumaan na sayan duaran propesiya, malinew ya ag-ira mankonektaan. No ontan sirin, kasin saray duron ed propesiya nen Joel et duma ed saray duron ya nabasa ed libro na Apocalipsis? On. Diad Biblia, wala ray simbolo ya no maminsan et mandumaan so kabaliksan da, depende ed pangusaran. Singa bilang, diad Apocalipsis 5:5, si Jesus et tinawag ya “Leon a nanlapud tribu nen Juda,” balet diad 1 Pedro 5:8, say Diablo et adeskribe ya “managlem a leon.” Base ed apatiran rason ya inaral tayo, kaukolan sirin ya umanen so eksplinasyon ed propesiya nen Joel. Anton talagay labay ya ibaga na satan?

11. Panon ya makatulong so Joel 1:6 tan 2:1, 8, 11 pian natalosan tayo no siopay isisimbolo na saray duron?

¹¹ No aralen tayon maong so konteksto na propesiya nen Joel, nanengneng tayo ya say ipapasakbay na propeta et nipaakar ed ilusob na saray sundalo. (Joel 1:6; 2:1, 8, 11) Imbaga nen Jehova ya usaren to so ‘baleg ya armada’ to (saray sundalo na Babilonia) pian dusaen iray benger ya Israelita. (Joel 2:25) Sarayan sundalo et deneskribe ya “taga amianen,” tan matukoy itan lapud lusoben day Israel manlapud amianen. (Joel 2:20) Sayan armada et inkompara ed nandarasig ya duron. Oniay imbaga nen Joel: “Balang [sundalo] et onaabante ed direksion to. . . . Ondadagsa rad saray syudad, ombabatik irad tapew na padir. Onsesegep irad kaabungan, a singa ra matakew ya ondadalan ed saray bintana.” (Joel 2:8, 9) Kasin naiimadyin mo itan? Agaylay karakel na sundalo na Babilonia. Anggapoy napanamotan. Anggapoy makatakas!

12. Panon ya asumpal so propesiya nen Joel nipaakar ed saray duron?

¹² Saray taga Babilonia (odino Caldeo) et singa ra duron ya linmusob ed syudad na Jerusalem nen 607 B.C.E. Oniay agawa: “[Akilaban] ed sikara so ari na saray Caldeo, a pinapatey tod espada iray kalangweran a lalaki ra . . . ; ag-akaliknay panangasi ed kalangweran a laki odino bii, matatken odino mansasakit. Amin et inyawat na Dios ed lima to. Pinoolan toy abung na tuan Dios, inggeba toy padir na Jerusalem, pinoolan toy amin a malet a tori ditan, tan dinederal toy amin a mablin bengatla.” (2 Awa. 36:17, 19) Nen asumpal la na saray taga Babilonia so inlusob tan impaneral da ed Israel, oniay imbaga na totoo: “Ag-itan napanayaman na too tan ayayep, tan niyawat la itan ed saray Caldeo.”​—Jer. 32:43.

13. Antoy labay ya ibaga na Jeremias 16:16, 18?

¹³ Manga 200 taon kayari na impanpropesiya nen Joel, impasakbay nen Jehova panamegley nen Jeremias so arum nin detalye ed ilusob na Babilonia. Imbaga to ya anapen tan erelen na saray sundalo na Babilonia so amin ya Israelita ya manggagaway mauges. “‘Patawag ko so dakel a sumisigay,’ so imbaga nen Jehova, ‘tan saraya so mangerel ed sikara. Insan ko patawag so dakel a manag-erel na ayep, tan anapen da ra ed amin a palandey tan amin a pukdol tan diad saray letak na angkakabaleg a bato. Ibales ko . . . ed sikara so kasimbangan na lingo ra tan say kasalanan da.’” Anggan iner ni batikan na saray agmagbabawin Israelita, anggan diad dayat o palandey, agdan balot niyamotan iray sundalo na Babilonia.​—Jer. 16:16, 18.

14. Kapigan agawa so propesiya ed Joel 2:28, 29?

¹⁴ Wala met so maong a balita ya impropesiya nen Joel. Imbaga to ya walay nagawan panangipawil tan magmaliw lamet ya mabuna so dalin. (Joel 2:23-26) Tan onsabi panaon ya niwalay dakel ya espiritual a naakan. “Ikalbok so espirituk ed amin a klase na laman,” so imbaga nen Jehova, “tan manpropesiya iray ananak yon lalaki tan bibii . . . Tan anggan diad saray ariripen kon lalaki tan ariripen kon bibii et ikalbok so espirituk.” (Joel 2:28, 29) Satan ya pangikalbo nen Jehova na espiritu to et ag-agawa kapawil na saray Israelita ed dalin da manlapud Babilonia. Linmabas ni pigaran lasus ya taon insan agawa itan ya propesiya diad agew na Pentecostes 33 C.E. Panon tayon amta?

15. Base ed Gawa 2:16, 17, antoy inuman nen Pedro ed samay propesiya diad Joel 2:28, tan antoy ipapanengneng na satan?

¹⁵ Diad tulong na masanton espiritu na Dios, imbaga nen apostol Pedro ya samay propesiya ed Joel 2:28, 29 et agawa ed saman ya agew na Pentecostes. Manga alas-nuebe na kabuasan ed saman, tan walay makapakelkelaw ya agawa. Inkalbo na Dios so masanton espiritu to, tan saramay akaawat ed satan et nansalita “nipaakar ed makapadinayew iran gawa na Dios” diad nanduruman lenguahe. (Gawa 2:11) Diad panangigiya na masanton espiritu, walay sinalatan nen Pedro ed samay inkisalita na propesiya nen Joel. Imanom no anto itan. (Basaen so Gawa 2:16, 17.) Imbes ya say ibaga nen Pedro et “kayari na satan,” say imbaga to et: “Diad kaunoran iran agew,” ya say tutukoyen to et samay panaon antis ya naderal so Jerusalem tan say templo. Diad satan a panaon, inkalbo na Dios so espiritu to ed “amin a klase na laman.” Ipapanengneng  na satan ya linmabas ni dakel a taon insan asumpal so propesiya nen Joel.

16. Diad tulong na espiritu na Dios, panon ya inmaligwas so panagpulong a kimey nen inmunan siglo tan diad panaon tayo?

¹⁶ Kayari na makapakelkelaw ya impangikalbo na Dios ed espiritu to nen inmunan siglo, say panagpulong a kimey et tuloytuloy ya linmaknab. Nen sinulatan nen apostol Pablo iray taga Colosas nen manga 61 C.E., imbaga to ya say maong a balita et nipulong la ed “amin a pinalsa diad silong na tawen.” (Col. 1:23) Say tutukoyen nen Pablo ya “amin a pinalsa” et saray lugar ya nampulongan to tan asabi na totoo ed saman a panaon. Diad tulong na masanton espiritu nen Jehova, mas malaknab la natan so panagpulong tayo ta ‘angga lad saray sampot na dalin’!​—Gawa 13:47; nengnengen so kahon ya “ Ikalbok so Espirituk.”

17. Antoy nauman ed pakatalos tayo ed propesiya nen Joel nipaakar ed saray duron?

¹⁷ Antoy anguman? Mas malinew la natan so pakatalos tayo ed propesiya ya walad Joel 2:7-9. Sarayan bersikulo et ag-ontutukoy ed maseseg ya pampupulong tayo, noagta diad samay inlusob na saray sundalo na Babilonia ed Jerusalem nen 607 B.C.E.

18. Antoy ag-anguman ed saray lingkor nen Jehova?

¹⁸ Antoy ag-anguman? Tuloytuloy ya ipupulong na saray lingkor nen Jehova so maong a balita ed interon mundo, diad amin ya posiblin paraan. (Mat. 24:14) Anggano sebelan itayo na gobierno, agtayo ontundan manpulong. Lapud panamendisyon nen Jehova, nagmaliw tayon mas maseseg tan mas makpel ed pangipupulong tayod maong a balita na Panarian! Mapaabeba tayon kekerewen so tulong nen Jehova pian tuloytuloy tayon natalosan iray propesiya ed Biblia, tan matalek tayo ya diad dugan panaon et ‘iwanwan to tayo diad amin a katuaan’!​—Juan 16:13.