Marcos 6:1-56

6  Et sikatoy tinmaynan diman tan linma ed dilin baley to, tan akila iray disipulo to.  Sanen asabi so sabaton, sikatoy ginmapon nambangat diad sinagoga, tan nikelkelawan so karaklan ed saramay onderengel ed sikato, a kuan da: “Iner so angalaan na sayan too ed sarayan bengatla? Tan akin a niiter ed sayan too so onian karunongan, tan nagagawaan to iratan a makapanyarin gawa?  Agta saya imay karpentero ya anak nen Maria tan agi nen Santiago tan Jose tan Judas tan Simon? Tan agta wadian kaiba tayo iray agagi ton bibii?” Kanian agla ra manisia ed sikato.  Balet inkuan nen Jesus ed sikara: “Say sakey a propeta et napagalangan ed anggan iner nilikud ed dilin baley to tan ed saray kakanayon to tan ed dilin abung to.”  Kanian anggapoy ginawa ton makapanyarin gawa diman nilikud ed impangitapew to na saray lima to ed pigaran mansasakit tan pinaabig to ra.  On, sikatoy mankelaw lapud anggapoy pananisia ra. Et niliber to iray baryo diad saman a lugar tan nambabangat.  Natan et tinawag to so labindua, tan imbaki to ran sanderwa, tan inikdan to ray pakauley ed saray marutak ya espiritu.  Ontan met, binilin to ra ya ag-ira mangaawit na antokaman diad pambiahe ra nilikud ed sakey labat a baston, tan ag-ira mangaawit na tinapay, supot na tagano, odino gansa a kuarta diad saray ibabalkes dan pananginan,  noagta isulong da so sandalyas da, tan ag-ira mangaawit na duaran lalatopan a kawes. 10  Niarum ni, inkuan to ed sikara: “Inerman so looban yon ayaman, mansiansia kayo diman anggad itaynan yo ed saman a lugar. 11  Tan inerman a lugar a sikayoy agda awaten odino dengelen, ipagpag yoy dabok na saray dapan* yo sano ompaway kayo ditan pian onkanan pantasi ed sikara.” 12  Kanian linma ra tan nampulong ira ta pian saray totoo et magbabawi; 13  tan pinapaway da so dakel a demonyo tan pinupuyokan da na larak so dakel a mansasakit tan pinapaabig da ra. 14  Natan et nadngelan iya nen Arin Herodes, lapud kabkabat lay ngaran nen Jesus, tan ibabaga na saray totoo: “Si Juan a managbautismo so apaoli manlapud inaatey, tan lapud satan et nagagawaan to iray makapanyarin gawa.” 15  Balet ibabaga na arum: “Saya si Elias.” Say kuan ni na arum: “Sikatoy singa sakey ed saray propeta.” 16  Balet sanen nadngel itan nen Herodes, inkuan to: “Si Juan ya impaputot koy ulo to et apaoli.” 17  Ta si Herodes et impaerel toy Juan tan impaipriso to nisengeg ed si Herodias ya asawa na agi ton si Felipe, ta inasawa to. 18  Ta aminpigan imbaga nen Juan ed si Herodes: “Aliwan manepeg ya alaen moy asawa na agim.” 19  Balet si Herodias et nanem-em na sakit na linawa ed sikato tan labay ton pateyen, balet agto nayarian. 20  Ta antakot si Herodes ed si Juan, lapud amta ton sikatoy matunong tan masanto a too, kanian iyaagel to. Tan agto amtay gawaen to kapagno narengel toy Juan, ingen ta siansia nin maliket ya ondedengel ed sikato. 21  Balet sinmabi so pankanawnawa sanen nampaponsia si Herodes diad agew na inkianak to parad saray totoo to ya atagey so posisyon da tan saray komandante na militar tan saray manunaan a totoo ed Galilea. 22  Tan say marikit na sayan Herodias so linmoob tan sinmayaw tan apaliket toy Herodes tan saramay karungo to. Et inkuan na ari ed marikit: “Kerew ka’d siak na antokaman a labay mo, tan iter ko itan ed sika.” 23  On, sinambaan to ed sikato: “Antokaman so kerewen mo ed siak, iter ko itan ed sika, angga ed kapaldua na panarian ko.” 24  Et sikatoy pinmaway tan tinepetan toy ina to: “Antoy kerewen ko?” Inkuan to: “Say ulo nen Juan a managbautismo.” 25  Tampol a sikatoy nanapuran linma ed ari tan kinmerew, a kuan to: “Labay kon iter mo’d siak a tampol so ulo nen Juan a Bautista ya akakarga ed bandihado.” 26  Anggaman nanermen a maong so ari, agto labay a pabaingan so marikit, makasengeg ed saray sinambaan to tan ed saramay akarungo ed lamisaan. 27  Kanian imbakin tampol na ari so sakey a managbantay tan ingganggan ton awiten to so ulo nen Juan. Et sikatoy linma tan pinutot toy ulo nen Juan diad prisoan 28  tan inawit toy ulo nen Juan a walad bandihado, tan inter to itan ed marikit, insan inter itan na marikit ed ina to. 29  Sanen nadngel itan na saray disipulo to, sikaray linman angala ed bangkay to tan inyan da ed sakey a pakanodnonotan a lubok. 30  Et pinmapawil iray apostol ed si Jesus tan imbalita ra ed sikato so amin ya agawaan da tan imbangat da. 31  Tan inkuan to ed sikara: “Ti’la, ta onla itayo ed sakey a nisulinek a pasen pian makapanpainawa itayon magano.” Ta diad karakel na onsasabi tan onsisipot, ngalngali anggapoy panaon da anggan mangan. 32  Kanian nambaloto ran amaarap ed sakey a nisulinek a pasen, a siksikara labat. 33  Balet anengneng na totoo so iyaalis da tan naamtaan itan na dakel, kanian saray totoon nanlapud amin a syudad et nanuulop a binmatik tan naunaan da ra. 34  Sanen akaepas la et anengneng to so dakel a totoo, tan naabagey to ra lapud singa ra karnero ya andian na managpastol. Tan imbangat to ira na dakel a bengatla. 35  Ngarem la ed saman kanian inmasingger ed sikato iray disipulo to, a kuan da: “Sayan pasen et nisulinek, tan onlalabi la. 36  Pasempet mo la ra, ta pian makakar ira ed kaumaan tan diad saray baryo ed kaliberliber, tan makasaliw iray naakan da.” 37  Et inkuan to ed sikara: “Ikdan yo ray naakan.” Diad saya et inkuan da ed sikato: “Onla kamin manaliw na tinapay a mankantidad na duanlasus a denario* pian ipakan mi ed totoo?” 38  Inkuan to ed sikara: “Pigaran tinapay so awit yo? La kayo ta nengneng yo!” Kayari ran naamtaan itan, inkuan da: “Limara, nilikud ed duaran sira.” 39  Et ingganggan toy amin a totoo a mankukumpog iran onyurong diad birdin karikaan. 40  Tan sikaray yinmurong ya agrupo-grupo na tunggal lasus tan tunggal limamplo. 41  Et inala toy limaran tinapay tan duaran sira, tan tinmangay ed tawen tan impabendisyonan to, insan pinisagpisag to iray tinapay tan inter to iratan ed saray disipulo, ta pian nibunog da ed saray totoo, tan inapag-apag to so duaran sira parad amin. 42  Kanian angan iran amin tan napsel ira, 43  tan tinipon da iray apisagpisag a tinapay, a napno so labinduan buksot, nilikud ed saray sira. 44  Niarum ni, saramay angan na tinapay et limanlibo a lalaki. 45  Tan pinalugan to lan tampol iray disipulo to diad baloto tan pinauna to la ra ed biek a baybay a paarap ed Betsaida, legan ton papasempeten iray totoo. 46  Balet kayari ton nampatanir ed sikara, sikatoy linma ed palandey pian manpikasi. 47  Sanen asabi lay labi, say baloto et walad pegley na dayat, balet bukbukor toy walad dalin. 48  Tan sanen anengneng to ran naiirapan a manbebegsay, ta susubaen ira na dagem, nila to ra nen ngalngali la komapat a panagbantay ed labi,* a nanakar ed tapew na dayat; balet singano labay to ran labsanan. 49  Kanengneng da ed sikato a manaakar ed tapew na dayat et inisip da: “Sakey iyan payawar!” tan inmeyag ira. 50  Ta sikatoy anengneng dan amin tan ataktakot ira. Balet tampol a nansalita, tan inkuan to ed sikara: “Manpakpel kayo, ta siak iya; agkayo natatakot.” 51  Tan sikatoy akilugan ed sikara diad baloto, tan tinmunday dagem. Lapud saya et nikelawan iran maong, 52  ta agda atalosan so kabaliksan na saray tinapay, noagta siansia nin naiirapan a makatalos so kapusoan da. 53  Tan sanen akabaliw la ra, sinmakbit ira ed Genesaret tan inyangkla ra so baloto ed asingger. 54  Balet kaepas da ed baloto, sikatoy abidbir na totoo, 55  tan batik ira ed kaliberliber na satan a pasen tan inawit da iramay mansasakit ed panamegley na saray melag a dukolan diad pasen a nadngelan dan kawalaan to. 56  Tan inerman so looban ton baryo odino syudad odino uma, iyaakar da ed saray tindaan iray mansasakit, tan mikakasi ra ed sikato a nadiwit da komon so anggan say saloy labat na kawes to. Et inmabig so amin ya aniwit ed satan.

Paimanod leksab

Mar 6:11 * Nengnengen so paimano ed leksab na Mat 10:14.
Mar 6:37 * Nengnengen so paimano ed leksab na Mat 18:24.
Mar 6:48 * Nengnengen so paimano ed leksab na Mat 14:25.