Marcos 8:1-38

8  Diad saraman ya agew, sanen amayamay lamet so totoo tan anggapoy naakan da, tinawag to iray disipulo tan inkuan to ed sikara:  “Nakakasian ko iray totoo, lapud taloy agew la ran kaibak tan anggapoy naakan da;  tan no pasempeten ko ran narnarasan, onkapuy ira diad dalan. Arawrawi pa ni met so nanlapuan na arum ed sikara.”  Balet oniay inkuan ed sikato na saray disipulo to: “Iner ed sayan nisulinek a pasen so napangalaan na siopaman na tinapay a mamesel ed sarayan totoo?”  Ingen ta tinepetan to ra: “Pigaran tinapay so awit yo?” Inkuan da: “Pitora.”  Tan pinayurong to ed dalin iray totoo, tan inala toy pitoran tinapay, akisalamat, pinisagpisag to, tan inter to iratan ed saray disipulo to pian ibunog da, tan imbunog da iratan ed saray totoo.  Wala met so pigaran angkekelag a sira ra; tan kayari ton impabendisyonan iraya, imbaga to met ed sikara ya ibunog da.  Kanian angan tan napsel ira, tan tinipon da iray sulok a pisagpisag, ya apano so pitoran buksot.  Ingen ta apat a libon lalaki so wadman. Diad kaunoran et pinasempet to la ra. 10  Et sikatoy linmugan a tampol ed baloto a kaiba iray disipulo to tan linma ra ed saray pasen na Dalmanuta.* 11  Ditan et pinmaway iray Fariseo tan akisuppiatan ira ed sikato, a kinerew da a panengnengan to ray sakey a tanda manlapud tawen, pian suboken da. 12  Kanian naermenan a maong si Jesus, tan inkuan to: “Akin et manaanap na tanda iyan kailalakan? Ibagak so tua, Anggapoy tanda a niiter ed sayan kailalakan.” 13  Diad saman et tinaynan to ra, a nambaloto lamet, tan linma ed biek a baybay. 14  Et alingwanan ed saman na saray disipulo so angawit na saray tinapay, tan anggapoy arum ya awit dan naakan ed baloto nilikud ed saksakey a tinapay. 15  Tan binilibilin to ra ya inkuan to: “Manbantay kayo, manalwar kayo ed lebadura na saray Fariseo tan ed lebadura nen Herodes.” 16  Kanian nansasangsangan ira lapud anggapoy tinapay da. 17  Sanen naimano to iya, inkuan to ed sikara: “Akin et pansasangsangan yoy agyo impangawit na tinapay? Agyo ta ni natetebek tan natatalosan so kabaliksan na saya? Kasin naiirapan a makatalos so kapusoan yo? 18  ‘Anta walaray mata yo, agkayo makanengneng, tan anta walaray layag yo, agkayo makarengel?’ Tan agyo ta nanonotan, 19  sanen pinisagpisag koy limaran tinapay parad limanlibo a lalaki, pigaray atipon yon buksot a napno na saray pisagpisag?” Inkuan da ed sikato: “Labindua.” 20  “Sanen pinisagpisag ko so pitora parad apat a libon lalaki, pigaray atipon yon buksot a napno na saray pisagpisag?” Et inkuan da ed sikato: “Pitora.” 21  Diad saman et inkuan to ed sikara: “Agyo ta ni natatalosan so kabaliksan na saya?” 22  Natan et sinmabi ra ed Betsaida. Dia et inyakar na totoo ed sikato so sakey a bulag a laki, tan akikasi ra a sikatoy bembenan to. 23  Tan intabin to so bulag a laki, ya inyakar to ed paway na baryo, tan kayari ton nilutdaan iray mata to et intapew to iray lima to ed sikato, insan tinepetan to: “Wala lay nanenengneng mo?” 24  Et tinmangwa so laki tan inkuan to: “Walay nanenengneng kon totoo. Singa ra kakiewan, balet ta onaakar ira.” 25  Insan intapew to lamet iray lima to ed saray mata na laki, tan sikatoy akanengneng la a malinew, tan inmabig la, tan maliwliwawa lay pakanengneng to ed amin a bengatla. 26  Tan sikatoy pinasempet to, ya inkuan to: “Agka ni balet onloloob ed baryo.” 27  Natan, si Jesus tan saray disipulo to et linma ed saray baryo ed Cesarea Filipos, tan diad dalan et tinepetan to iray disipulo to, a kuan to: “Siopa ak, unong ed ibabaga na totoo?” 28  Et inkuan da: “Si Juan a Bautista, tan unong ed arum, Si Elias, say arum met, Sakey ed saray propeta.” 29  Tan intepet to met ed sikara: “Balet siopa ak unong ed sikayo?” Et inmebat si Pedro: “Sika so Kristo.” 30  Diad saman et binilibilin to ra ya agda ibabaga ed anggan siopa so nipaakar ed sikato. 31  Ontan met, imbangat to ed sikara a say Anak na too et nepeg a managmak na dakel ya irap tan ipulisay na saray mamasiken tan saray manunan saserdote tan saray eskriba, tan pateyen da, tan onoli kayari na taloy agew. 32  On, diretsaan to iyan imbaga. Balet sikatoy inyakar nen Pedro ed pireg tan binano to. 33  Et sikatoy binmeneg, a ninengneng to iray disipulo to tan binaat toy Pedro, a kuan to: “Arawi ka’d siak, Satanas, ta say iisipen mo et kanonotan na totoo, aliwan kanonotan na Dios.” 34  Pinaasingger to natan iray totoo tan saray disipulo to, tan inkuan to ed sikara: “Siopaman a labay toy ontumbok ed siak, iburi toy inkasikato tan sakbaten toy panamairapan a kiew* to tan mantultuloy ya ontumbok ed siak. 35  Ta siopaman a malabay a mangisalba ed kamarerwa* to et nabalang to itan, balet siopaman a nabalang toy kamarerwa to nisengeg ed siak tan ed maong a balita et nisalba to itan. 36  On, anto so nagunggona na sakey a too no nakayarian to so interon mundo balet nabalang to so kamarerwa to? 37  Anto so iter na sakey a too a kasalat na kamarerwa to? 38  Ta siopaman a mangibaing ed siak tan saray salitak diad sayan agmatoor tan makasalanan a kailalakan, sikato so ibaing met na Anak na too sano onsabi ed gloria na Ama to a kaiba iray masanton anghel.”

Paimanod leksab

Mar 8:10 * Posiblen sananey nin ngaran na Magadan (nengnengen so paimano ed leksab na Mat 15:39) odino nayarin sakey a pasen ya asingger ditan.
Mar 8:34 * Nengnengen so Apendise 6.
Mar 8:35 * Odino, “bilay.” Nengnengen so Apendise 7.