Marcos 10:1-52
10 Manlapu diman et sikatoy inmalagey tan linma ed saray ketegan na Judea tan diad biek na Jordan, tan dinmadago lamet ed sikato iray totoo, tan imbangat to ra lamet a singa niyugali to lan gawaen.
2 Natan et inmasingger ed sikato iray Fariseo ta pian suboken da, tan tinepetan da no kasin manepeg ya idiborsyo na sakey a laki so asawa to.
3 Et sikatoy inmebat ed sikara: “Anto so ingganggan nen Moises ed sikayo?”
4 Inkuan da: “Inabuloyan nen Moises so panggawa na sakey a kasulatan na pangidiborsyo tan pamataynan ed asawan bii.”
5 Balet inkuan nen Jesus ed sikara: “Lapud inkaawet na puso yo et insulat to iyan ganggan parad sikayo.
6 Anggaman ontan, diad gapo na impamalsa et ‘ginawa to ran laki tan bii.
7 Nisengeg ed saya et taynan na laki so ama tan ina to,
8 tan sikaran dua et magmaliw a sakey a laman,’ kanian aliwa la ran duara, noagta sakey a laman.
9 Sirin say impankasakey* na Dios, agnepeg a pansianen na too.”
10 Sanen wala lamet ed loob na abung et sikatoy tinepetan na saray disipulo nipaakar ed saya.
11 Tan inkuan to ed sikara: “Siopaman a lakin mangidiborsyo ed asawa to tan mangasawa na sananey et mankasalanan na pikakalugoran* ed samay inmuna,
12 tan no say sakey a bii et miasawa ed sananey kayari ton indiborsyo so asawa to, sikatoy mankasalanan na pikakalugoran.”
13 Natan et inyakar na totoo ed sikato iray angkekelag ya ugugaw pian ipabemben da ra ed sikato; balet sikaray binano na saray disipulo.
14 Sanen anengneng itan nen Jesus, agto agustoan itan tan inkuan to ed sikara: “Paulyan yo iray angkekelag ya ugugaw ya onasingger ed siak. Agyo ra aamperen, ta saray akankayarian na panarian na Dios et singa sarayan ugugaw.
15 Tua kuan ko ed sikayo, Siopaman ya agmangawat ed panarian na Dios a singa sakey a melag ya ugaw et agbalot makaloob ditan.”
16 Tan nilalakap to iray ugugaw tan benebendisyonan to ra, ya intapew toy lima to ed sikara.
17 Tan sanen sikatoy onla la, walay laki a binmatik ed sikato tan tinmalimukor ed arap to tan intepet to: “Maong a Managbangat, antoy nepeg kon gawaen ta pian natawir ko so bilay ya andi-anggaan?”
18 Inkuan nen Jesus ed sikato: “Akin et tatawagen mo ak a maong? Anggapoy arum a maong, noag say Dios labat.
19 Amtam iray ganggan ya, ‘Agka mamapatey, Agka mikakalugoran, Agka mantatakew, Agka mantitila ed panagtasim, Agka mansasaol, Igalang mo so amam tan inam.’”
20 Inkuan na laki ed sikato: “Managbangat, uunoren ko la irayan amin manlapud inkaugaw ko.”
21 Ninmengneng si Jesus ed sikato tan alikna toy panangaro ed sikato tan inkuan to: “Walay sakey ya agmo ni agawaan: La ka, ilakom so antokaman a kayarian mo tan iter mo ed saray mairap-bilay, pian nawalaan ka na kayamanan ed tawen, tan gala, magmaliw kan patumbok ko.”
22 Balet lapud saya et abaliw so lupa to tan tinmaynan a maer-ermen, ta dakel so kaykayarian to.
23 Kayarin ninmengneng si Jesus ed kaliberliber, inkuan to ed saray disipulo to: “Agaylay irap ya onloob ed panarian na Dios iramay makuarta!”
24 Balet abigla iray disipulo ed imbaga to. Kanian inkuan lamet nen Jesus ed sikara: “Ananak, agaylan irap so onloob ed panarian na Dios!
25 Mas mainomay nin onlabot ed abot na dagum so sakey a kamelyo nen say pakaloob na sakey a mayaman a too ed panarian na Dios.”
26 Sikaray lalon nikelawan tan inkuan da ed sikato: “Siopa sirin so peteg a nilaban?”
27 Ninengneng ira nen Jesus tan inkuan to: “Diad too et imposible itan, balet aliwan ontan ed Dios, ta amin a bengatla et posible ed Dios.”
28 Inkuan nen Pedro ed sikato: “Nia! Tinaynan mi so amin a bengatla tan tutumboken mi ka la.”
29 Inkuan nen Jesus: “Tua kuan ko ed sikayo, Siopaman ya anaynan na abung to odino agagi ton lalaki odino agagi ton bibii odino ina to odino ama to odino ananak to odino kaumaan to nisengeg ed siak tan nisengeg ed maong a balita
30 et mangawat na tunggal lasus ed sayan panaon, saray abung tan agagin lalaki tan agagin bibii tan kainaan tan ananak tan kaumaan, pati saray panamasegsegang, tan diad onsabin mundo* et bilay ya andi-anggaan.
31 Balet, dakel so unaan a magmaliw ya unor, tan unor a magmaliw ya unaan.”
32 Natan et ontatatdang la ra ed dalan a paarap ed Jerusalem, tan si Jesus et makakauna ed sikara, tan nikelawan ira, balet saramay ontutumbok et tinmakot. Tan imbiig to lamet so labindua tan imbaga to ed sikara irayan bengatla a nepeg a nagawa ed sikato:
33 “Nia, ontatatdang itayo la ed Jerusalem, tan say Anak na too so iyawat ed saray manunan saserdote tan saray eskriba, tan sikatoy sentensiaan da na patey tan iyawat da ed saray totoo na nasyones,
34 tan sikatoy elek-elekan da tan lutlutdaan da tan sipsiplatan da tan pateyen da, balet kayari na taloy agew et sikatoy onoli.”
35 Tan inmasingger ed sikato si Santiago tan si Juan, say duaran ananak nen Zebedeo, tan inkuan da ed sikato: “Managbangat, labay mi komon a gawaen mo ed sikami so antokaman a kerewen mi.”
36 Inkuan to ed sikara: “Antoy labay yon gawaen ko ed sikayo?”
37 Inkuan da ed sikato: “Abuloyan mo kamin onyurong diad gloriam, sakey diad nikawanan mo tan sakey diad nikawigim.”
38 Balet inkuan nen Jesus ed sikara: “Agyo amtay kekerewen yo. Sarag yo kasi so oninum ed kopa ya inuman ko, odino nabautismoan ed bautismo ya akabautismoan ko?”
39 Inkuan da ed sikato: “Sarag mi.” Et inkuan nen Jesus ed sikara: “Oninum kayo ed kopa ya inuman ko, tan nabautismoan kayo ed bautismo ya akabautismoan ko.
40 Balet, sayay iyurong diad kawanan ko odino diad kawigik et aliwan siak so mandesisyon, noagta para itan ed saramay angiparaanan ed satan.”
41 Et sanen nadngelan itan na samplora, asyodotan ira ed si Santiago tan Juan.
42 Balet sanen tinawag ira nen Jesus, inkuan to ed sikara: “Amta yo a saramay ipapasen a manuley ed saray nasyon et pakakatawan ed saray totoo ra tan saray manunaan da et uusaren day autoridad da ed sikara.
43 Aliwan ontan balet ed sikayo, ta siopaman a labay toy magmaliw a manunaan ed sikayo et nepeg a magmaliw a lingkor yo,
44 tan siopaman a labay toy magmaliw ya unaan ed sikayo et nepeg a magmaliw ya aripen na amin.
45 Ta anggan say Anak na too et linma dia, ya aliwan panlingkoran, noagta manlingkor tan iter toy kamarerwa to a panondon ed amayamay.”
46 Et linma ra ed Jerico. Balet sanen sikato tan saray disipulo to tan say dakerakel a totoo et ompapaway la ed Jerico, si Bartimeo (ya anak nen Timeo) a sakey a bulag a mipapayabol et akayurong ed gilig na dalan.
47 Sanen nadngel to a si Jesus a Nazareno iman, sikatoy inmeyag tan inkuan to: “Jesus, Anak nen David, kasian mo ak!”
48 Lapud saya et sikatoy binano na dakel pian mandeen, balet lalon inyeyag to: “Anak nen David, kasian mo ak!”
49 Kanian tinmunday Jesus tan inkuan to: “Tawag yo.” Tan tinawag da so bulag a laki, a kuan da ed sikato: “Manpakpel ka, alagey ka ta tatawagen to ka.”
50 Et imbantak toy latop ton kawes, inmalagey a tampol tan linma ed si Jesus.
51 Et inmebat si Jesus ed sikato: “Antoy labay mon gawaen ko ed sika?” Inkuan na bulag a laki: “Rab·boʹni, ipawil moy pakanengneng ko.”
52 Tan inkuan nen Jesus ed sikato: “La ka la, say pananisiam so amaabig ed sika.” Et tampol a pinmawil so pakanengneng to, tan sikatoy tinmumbok ed sikato diad dalan.
