Marcos 11:1-33
11 Natan sanen asingger la ra ed Jerusalem, diad Betfage tan Betania diad Palandey na saray Olibo, imbaki toy duara ed saray disipulo to
2 tan inkuan to ed sikara: “La kayo ed baryo a sankabantag yo, tan kaloob yo diman et naromog yoy akasinger a kilaw ya asno, ya agni aluganan na too; ukbaran yo itan tan iyakar yo dia.
3 Tan no walay mangibaga ed sikayon, ‘Akin, antoy gagawaen yo?’ ibaga yon, ‘Nakaukolan iya na Katawan, tan ipawil to dia a tampol.’”
4 Kanian linma ra tan aromog da so kilaw ya asno ya akasinger ed puerta, diad paway ed gilig a dalan, tan inukbaran da itan.
5 Balet arum ed saramay wadman ya akaalagey so angikuan ed sikara: “Akin et uukbaran yo itay kilaw ya asno?”
6 Imbaga da ed saraya imay inkuan nen Jesus; tan inabuloyan da ra.
7 Tan inyakar da ed si Jesus so kilaw ya asno tan sinapinan da itan na saray ilalatop dan kawes, tan sikatoy linmugan ed satan.
8 Ontan met, inyaaplag na dakel a totoo iray ilalatop dan kawes diad dalan, balet arum so nampuputer na mabulong a sangasanga diad kaumaan.
9 Tan onkekelyaw iramay makakauna tan saramay manumtumbok: “Ilaban mo, ipikasi mi! Narayew imay onsasabi ed ngaran nen Jehova!
10 Narayew komon imay onsabin panarian na ama tayon David! Ilaban mo, ipikasi mi, sika a walad sankatagyan!”
11 Tan sikatoy linmoob ed Jerusalem, diad templo. Tan ninengneng to so amin a bengatlan walad kaliberliber, tan lapud mansirunget la, sikatoy pinmaway ya amaarap ed Betania, a kaiba toy labindua.
12 Diad tinmumbok ya agew, sanen akapaway la ra ed Betania, sikatoy narasan.
13 Tan arawi ni et anengneng toy sakey a kiew ya igos a walaan na saray bulong, tan inasinggeran to pian nengnengen to no kasin walay bunga. Balet, sanen naasinggeran to la et anggapoy aromog to noagta kabulobulong, ta aliwa nin panagbungay igos.
14 Kanian, inkuan to ed satan: “Manlapud natan et anggapo lan balot so naalan bunga ed sika.” Tan onderengel iray disipulo to.
15 Natan et akasabi la ra ed Jerusalem. Diman et sikatoy linmoob ed templo tan pinapaway to iramay manlalako tan mansasaliw diad templo, tan imbabalintuag to iray lamisaan na saray managsalat na kuarta tan saray yurongan na saramay manlalako na malapati;
16 tan agto inabuloyan so siopaman a mangawit na kagawaan ya idalan to itan ed templo,
17 tan sikatoy nantultuloy a nambangat tan inkuan to: “Agta nisulat, ‘Say abung ko et natawag ya abung a pampikasian na amin a nasyones’? Balet ginawa yo itan ya ungib na matatakew.”
18 Et nadngel itan na saray manunan saserdote tan saray eskriba, tan nannonot ira no panon dan pateyen, ta natatakot ira ed sikato, lapud nikekelawan so amin a totoo ed ibabangat to.
19 Tan sano mansirunget la, sikaray ompapaway ed syudad.
20 Balet sanen manaakar ira a kabkabuasan, anengneng da so kiew ya igos ya amagaan la manlapud lamot.
21 Kanian sanen anonotan itan nen Pedro, inkuan to ed sikato: “Rabbi, nengneng mo! amagaan imay kiew ya igos ya insambam.”
22 Tan inmebat si Jesus, a kuan to ed sikara: “Nawalaan kayoy pananisia ed Dios.
23 Tua kuan ko ed sikayo a siopaman a mangibaga ed sayan palandey, ‘Ekal ka dia tan nibantak ka ed dayat,’ tan agmanduaruwa ed puso to noagta walaan na pananisia a nagawa so ibabaga to, nagawa itan.
24 Saya so makasengeg no akin ya ibabagak ed sikayo, Amin a bengatlan ipipikasi tan kekerewen yo, manisia kayo a singano inawat yo la, tan nagamoran yo iratan.
25 Tan sano manpipikasi kayon akaalagey, perdona yo so antokaman a lingon agawaan ed sikayo na arum, ta pian perdonaen met na Ama yon walad tawen iray impakalingo yo.”
26* ——
27 Et linma ra lamet ed Jerusalem. Tan legan a sikatoy manaakar diad templo, inmasingger iray manunan saserdote tan saray eskriba tan mamasiken
28 tan inkuan da ed sikato: “Anto so autoridad mon manggawa ed sarayan bengatla? odino siopa so angiter ed sika na sayan autoridad pian gawaen mo irayan bengatla?”
29 Inkuan nen Jesus ed sikara: “Wala pay tepeten ko ed sikayo. No ebatan yo ak, ibagak met ed sikayo no anto so autoridad kon manggawa ed sarayan bengatla.
30 Kasin say autoridad nen Juan a manbautismo et nanlapud tawen odino nanlapud totoo? Ebatan yo ak.”
31 Kanian nantotongtong ira, a kuan da: “No ibaga tayon, ‘Nanlapud tawen,’ ibaga ton, ‘Akin balet et agyo anisiaan?’
32 Balet sarag tayo kasin ibagan, ‘Nanlapud totoo’?”—Antakot ira ed totoo, ta ipapasen na sarayan amin a si Juan et peteg a propeta.
33 Kanian inmebat ira ed si Jesus: “Agmi amta.” Tan inkuan nen Jesus ed sikara: “Agko met sirin ibaga ed sikayo no anto so autoridad kon manggawa ed sarayan bengatla.”
