Marcos 1:1-45
1 Say gapo na maong a balita nipaakar ed si Jesu-Kristo:
2 Unong a nisulat ed libro nen propetan Isaias: “(Nia! Ibakik nin unona so mensaherok pian mangiparaan na dalanen mo;)*
3 dengel kayo! wala so onkekelyaw diad kalawakan, ‘Sikayoran totoo, iparaan yo so dalanen nen Jehova, gawa yon maptek iray basbas to.’”
4 Lapud satan, si Juan a managbautismo et linma ed kalawakan, a mangipupulong ed bautismo bilang simbolo na panagbabawi parad kaperdona na saray kasalanan.
5 Kanian linma ed sikato iray totoo ed interon teritorya na Judea tan amin a manaayam ed Jerusalem, tan binautismoan to ra diad Ilog Jordan, ya impapatua da iray kasalanan da.
6 Et si Juan so akasulong na kawes a gawa ed bago na kamelyo tan akabalkes na katat, tan say kakanen to et duron tan dilo ed takel.
7 Tan sikatoy nampupulong, a kuan to: “Walay sakey ya onsabin katumbokan ko a mas mabiskeg nen siak, tan agak makanepegan ya onyuko pian mangukbar ed saray singer na saray sandalyas to.
8 Siak so nambautismo ed sikayo ed danum, balet sikato so manbautismo ed sikayo ed masanton espiritu.”
9 Diad saraman ya agew et sinmabi si Jesus a nanlapud Nazaret na Galilea tan sikatoy binautismoan nen Juan diad Jordan.
10 Kaimwas to ed danum et anengneng to so tawen a nalulukasan, tan say espiritu a singa malapati et ondadapo ed sikato,
11 tan walay boses a nadngel manlapud tawen: “Sika so Ana’ko, say inad-arok; sika so inabobonan ko.”
12 Et tampol a sikatoy pinakiwas na espiritu ya onla ed kalawakan.
13 Kanian sikatoy nansiansia ed kalawakan ed loob na apataplon agew, a tutuksoen nen Satanas, tan kaiba to iray atap ya ayayep, balet sikatoy nilingkoran na saray anghel.
14 Natan sanen narel si Juan, linma si Jesus ed Galilea, ya impupulong to so maong a balita na Dios
15 tan inkuan to: “Asabi la so aturon panaon, tan asingsingger la so panarian na Dios. Magbabawi kayo, sikayoran totoo, tan manisia kayo ed maong a balita.”
16 Sanen sikatoy manaakar ed gilig na dayat na Galilea, anengneng to si Simon tan say agi ton si Andres a mangipepelag na saray iket da diad dayat, lapud sumisigay ira.
17 Kanian inkuan nen Jesus ed sikara: “Tumbok kayo ed siak, tan gawaen ta kayon sumisigay na totoo.”
18 Et tampol a tinaynan da iray iket da tan tinmumbok ira ed sikato.
19 Tan kaarawi toy daiset et anengneng to si Santiago tan say agi ton si Juan ya ananak nen Zebedeo, legan a wala ra ed baloto ra a mangaapiger na saray iket da,
20 tan tinawag to ran tampol. Kanian tinaynan da ed baloto si Zebedeo ya ama ra tan saray inupaan a lalaki, tan tinmumbok ira ed sikato.
21 Tan amaarap ira ed Capernaum.
Ag-abayag sanen asabi so sabaton, sikatoy linmoob ed sinagoga* tan ginmapon nambangat.
22 Tan nikelawan ira ed paraan na panagbangat to, ta binangatan to ra a singa panagbangat na sakey a walaan na autoridad, ya aliwan singa saray eskriba.*
23 Diad saman met lanlamang ya oras et wadman ed sinagoga ra so sakey a toon walad pakayari na sakey a marutak ya espiritu, tan sikatoy inmeyag,
24 a kuan to: “Anto so pibabali mi ed sika, Jesus a Nazareno? Linma ka dia pian deralen mo kami? Amtak no siopa ka, sika so Masanto na Dios.”
25 Balet binano itan nen Jesus, a kuan to: “Agka maingal, paway ka ed sikato!”
26 Tan pinmaway so marutak ya espiritu kayari ton pinankaykayerker so too tan inmeyag a makmaksil.
27 Et mandinayew a maong so amin a totoo kanian inkuan da ed sakey tan sakey: “Anto ’ya? Sakey a balon bangat! Walay autoridad ton mangiganggan ed anggan saray marutak ya espiritu, tan ontutulok ira ed sikato.”
28 Kanian say balita nipaakar ed sikato et kinmayat a tampol ed amin a pasen diad interon dalin na Galilea.
29 Et tampol a pinmaway ira ed sinagoga tan linma ra ed abung di Simon tan Andres a kaibay Santiago tan Juan.
30 Natan say biin katulangan nen Simon et akarukol ta walay petang to, tan imbaga ran tampol ed si Jesus so kipapasen to.
31 Kanian sikatoy inasinggeran to tan pinaalagey to, a binembenan to ed lima; tan naandi lay petang to, tan nanserbi ed sikara.
32 Sanen mansirunget la, a sinmelek lay agew, inyakar na totoo ed sikato iray amin a mansasakit tan saramay aselepan na demonyo;
33 tan atiptipon diad arap na puerta so totoo ed interon syudad.
34 Kanian pinaabig to so dakel a walaay nanduruman sakit, tan pinapaway to so dakel a demonyo, balet agto pansalitaen iray demonyo, ta amta ra a sikato so Kristo.
35 Tan diad kabkabuasan, legan ya ambilunget ni, sikatoy binmangon insan linma ed sakey a nisulinek a pasen, tan nampikasi diman.
36 Balet, sikatoy inanap nen Simon tan saramay kaiba to
37 tan sanen aromog da, inkuan da ed sikato: “Aanapen kay amin a totoo.”
38 Balet inkuan to ed sikara: “Onla itayo ed arum a pasen, diad asingger iran balbaley, pian makapanpulong ak met diman, ta saya so gagala na inyakar ko dia.”
39 Tan sikatoy linma, a nampupulong ed saray sinagoga ra diad interon Galilea tan nampapaway na saray demonyo.
40 Wala met so sakey ya akating ya inmasingger ed sikato, a tinmalimukor ya akikasi ed sikato, a kuan to: “Sarag mo ak a linisan no labay mo.”
41 Diad saman et naabagey to, kanian inyunat toy lima to tan diniwit to, tan inkuan to: “Labay ko. Nalinisan ka.”
42 Et tampol a naandi so kating to, tan alinisan.
43 Niarum ni, sikatoy binilibilin to tan pinaonla to lan tampol,
44 tan inkuan to ed sikato: “Agmon balot ibabaga iya ed anggan siopa, balet la ka, manpanengneng ka ed saserdote tan mangiyapay ka na saray bengatla ya ingganggan nen Moises lapud alinisan ka la, bilang paneknek ed sikara.”
45 Balet kaalis na samay laki et lalon inyabawag to itan tan inkayat to so agawa, kanian si Jesus et agla makaloob a maparungtal ed sakey a syudad, noagta sikatoy nansiansia ed paway diad saray nisulinek a pasen. Ingen ta nantultuloy a linma ed sikato iray totoon nanlapud nanduruman pasen.
