Marcos 2:1-28
2 Balet kayari na pigaran agew, sikatoy linmoob lamet ed Capernaum tan nibalita a sikatoy walad sakey ya abung.
2 Lapud saya et dakdakel so dinmadago ditan kanian anggapo lay lugar, anggan diad puerta, tan impulong to ed sikara so salita.
3 Tan walaray totoon angiyakar ed sikato na sakey a paralitiko, ya inalsa na apatira.
4 Balet lapud karakel na totoo, sikatoy agda niyasingger ed si Jesus, kanian binungawan da so atep a walad petek to, insan da inleksab ditan so paralitiko a walad melag a dukolan.
5 Tan sanen anengneng nen Jesus so pananisia ra, inkuan to ed paralitiko: “Ana’ko, aperdona la iray kasalanan mo.”
6 Et wadman so arum ed saray eskriba, ya akayurong tan ikakatunongan da ed kapusoan da:
7 “Akin et oniay panagsalita na sayan too? Agto papagalangan so Dios. Siopa so makaperdona na saray kasalanan noag say Dios labat?”
8 Balet lapud atebek a tampol nen Jesus ya ontan so ikakatunongan da, inkuan to ed sikara: “Akin et ikakatunongan yo iraya ed kapusoan yo?
9 Dinan so mas mainomay ya ibaga ed paralitiko, ‘Aperdona la iray kasalanan mo,’ odino, ‘Alagey ka tan libit moy dukolan mo tan manakar ka’?
10 Balet ta pian naamtaan yo a say Anak na too et walay autoridad to diad dalin a mamerdona na saray kasalanan,”—inkuan to ed paralitiko:
11 “Ibagak ed sika, Alagey ka, libit moy dukolan mo, tan sempet ka la.”
12 Diad saman et sikatoy inmalagey, tan nilibit ton tampol so dukolan to tan pinmaway a nanakar ed arap dan amin, kanian nikelawan iran amin, tan inggloria ra so Dios, a kuan da: “Anggapo nin balot so anengneng min singa onia.”
13 Sikatoy pinmaway lamet diad gilig na dayat; tan dinmadago ed sikato so amin a totoo, tan imbangat to ra.
14 Balet sanen sikatoy ondadalan, anengneng to si Levi ya anak nen Alfeo ya akayurong ed panagsingilan na buis, tan inkuan to ed sikato: “Magmaliw kan patumbok ko.” Et inmalagey tan tinmumbok ed sikato.
15 Diad saginonor, si Jesus et walad abung nen Levi tan akarungo ed lamisaan, tan dakel a managsingil na buis tan managkasalanan so karungo to tan saray disipulo to, ta amayamay ed sikara so tinmumbok ed sikato.
16 Balet sanen anengneng na saray eskriba na saray Fariseo a karungo to iray managkasalanan tan managsingil na buis, inkuan da ed saray disipulo to: “Pidudungoan to iray managsingil na buis tan saray managkasalanan?”
17 Sanen nadngel iya nen Jesus, inkuan to ed sikara: “Agmankaukolan na managtambal iramay maksil so laman da, noagta saramay mansasakit. Linma ak dia pian manawag ed saray managkasalanan, aliwan saray matunong.”
18 Saray disipulo nen Juan tan saray Fariseo et naynay a manaayunal.* Kanian linma ra ed sikato tan inkuan da: “Akin et naynay a manaayunal iray disipulo nen Juan tan saray disipulo na saray Fariseo, balet saray disipulom et andi?”
19 Et inkuan nen Jesus ed sikara: “Nayari kasin manayunal iray kaaro na nobyo legan a sikatoy kaiba ra? Ag-ira nayarin manayunal sano kaiba da ni so nobyo.
20 Balet onsabi iray agew sano alaen la ed sikara so nobyo, insan manayunal la ra ed satan ya agew.
21 Anggapoy siopaman a mangisakab na balon abel diad daan ya ilalatop a kawes, ta no gawaen to itan, guyoren na balon abel imay daan lapud elet na satan, tan lalon napilat laingen.
22 Ontan met, anggapo so siopaman a mangiyan na balon alak diad daan iran panagkargaan,* ta no gawaen to itan, betagen na alak iray panagkargaan, tan naperdi so alak pati saray panagkargaan. Balet iiyan na totoo so balon alak diad balo iran panagkargaan.”
23 Natan et sikatoy ondadalan diad katrigoan legan na sabaton, tan saray disipulo to et nan-arurot na saray dawa na trigo.
24 Kanian inkuan ed sikato na saray Fariseo: “Nengneng mo ’ya! Akin et gagawaen da so sebel ed sabaton?”
25 Balet inkuan to ed sikara: “Agyo ta’n balot abasa so ginawa nen David sanen sikato tan saray kaiba ton lalaki et mankakkaukolan tan narnarasan?
26 A sikatoy linmoob ed abung na Dios, unong ed salaysay nipaakar ed si Abiatar a manunan saserdote, tan kinan to iray tinapay ya akaapay, ya agmanepeg a kanen na siopaman noag saray saserdote labat, tan inikdan to met iray kaiba ton lalaki?”
27 Tan inkuan to ni ed sikara: “Say sabaton et ginawa parad too, tan aliwan say too so ginawa parad sabaton;
28 no ontan sirin, say Anak na too so Katawan na anggan say sabaton.”
