Marcos 15:1-47

15  Et tampol sanen palbangon la et nantutuplegan iray manunan saserdote a kaiba iray mamasiken tan saray eskriba, pati say interon Sanhedrin, tan binalor day Jesus tan inyakar da ed si Pilato.  Kanian sikatoy tinepetan nen Pilato: “Sika so ari na saray Judio?” Et sikatoy inmebat: “Sikan mismo so angibaga ed satan.”  Balet dakel so inyakusa ed sikato na saray manunan saserdote.  Natan et sikatoy tinepetan lamet nen Pilato, a kuan to: “Anggapoy iyebat mo? Nengneng mo, dakdakel so iyaakusa ra ed sika.”  Balet agla inmebat si Jesus, kanian nikelawan si Pilato.  Diad kada piesta et sikatoy mangibubulos na sakey a priso parad sikara, samay labay dan paibulos.  Diad saman et wadman imay tatawagen a Barabas ya aprison kaiba na saramay nanrebelde ed gobierno, tan amatey ira diad impanrebelde ra.  Kanian inmasingger iray totoo tan kinerew da ed sikato imay dati lan gagawaen to parad sikara.  Et inkuan nen Pilato ed sikara: “Labay yon ibulos ko ed sikayo so ari na saray Judio?” 10  Ta amta to a makakaibeg iray manunan saserdote ed si Jesus kanian sikatoy inyawat da. 11  Balet saray totoo et sinugsogan na saray manunan saserdote a say paibulos da et si Barabas. 12  Et inkuan lamet nen Pilato ed sikara: “Anto sirin so gawaen ko ed sayay tatawagen yon ari na saray Judio?” 13  Et inyeyag da lamet: “Ipasak!” 14  Balet inkuan nen Pilato ed sikara: “Akin, antoy mauges a ginawa to?” Ingen ta lalon inkasil day eyag da: “Ipasak!” 15  Diad saman, lapud labay a pagustoan nen Pilato iray totoo, imbulos to ed sikara si Barabas, tan kayari ton impasiplatan si Jesus, sikatoy inyawat to pian nipasak. 16  Natan et sikatoy inyakar na saray sundalo diad lolooban, salanti, diad palasyo na gobernador, tan tinipon da so interon ulop na saray sundalo, 17  tan inkolibemben da ed sikato so kawes a purpura tan nanlaga ray koronan sabisabit tan inyan da itan ed ulo to. 18  Tan sikatoy imbano ra: “Maabig ya agew, Ari na saray Judio!” 19  Ontan met, pinekpek da na tanubong so ulo to tan nilutlutdaan da, tan tinmatalimukor ira pian mangigalang ed sikato. 20  Kayari ran inelek-elekan, inekal day kawes ton purpura tan insulong da ed sikato iray ilalatop ton kawes. Tan sikatoy impaway da pian ipasak. 21  Ontan met, pinasoot dan manlingkor so sakey a toon ondadalan a nanlapud uma, si Simon a taga Cirene, ya ama nen Alejandro tan si Rufo, pian sakbaten toy panamairapan a kiew* nen Jesus. 22  Kanian sikatoy inyakar da ed Golʹgo·tha, a sano ipatalos et mankabaliksay, Pasen na Lapislapis na Ulo. 23  Ditan et sikatoy sinali ran painumen na alak a nilaokan na druga a mira, balet agto ininum. 24  Tan sikatoy impasak da tan nanaapagan da iray ilalatop ton kawes, a nampapalaranan* da no antoy naala na kada sakey. 25  Natan et komatlon oras* la, tan sikatoy impasak da. 26  Tan akasulat diad uloan to imay ipapalsa ra ed sikato, “Say Ari na saray Judio.” 27  Niarum ni, walay duaran matakew ya impasak dan kaiba to, sakey ed kawanan to tan sakey ed kawigi to. 28*  —— 29  Tan sikatoy balbalawen na saramay ondadalan, a manpeyeng ira, a kuan da: “O! Sika a mangibabagan igebam so templo tan ipaalagey mo itan ed loob na taloy agew, 30  isalbam so inkasika, tan epas ka ed satan a panamairapan a kiew.” 31  Ontan met so ginawa na saray manunan saserdote, pati saray eskriba, a sikatoy inelek-elekan da, a kuan da: “Insalba toy arum, agto balet nisalbay inkasikato! 32  Abuloyan yon onepas natan ed panamairapan a kiew so Kristo ya Ari na Israel, pian nanengneng tayo tan manisia tayo.” Anggan saramay impasak a kaiba to et mamabalaw ed sikato. 33  Sanen asabi so komanem ya oras,* binmilunget so interon dalin anggad komasiam ya oras.* 34  Tan diad komasiam ya oras et inmeyag si Jesus, a kuan to: “Eʹli, Eʹli, laʹma sa·bach·thaʹni?” a no ipatalos et mankabaliksay: “Dios ko, Dios ko, akin et pinaulyanan mo ak?” 35  Tan sanen nadngel itan na arum ed saramay akaalagey ed asingger, inkuan da: “Nengneng yo! Tatawagen toy Elias.” 36  Balet walay sakey a binmatik, ya angipasepsep na sakey ya espongha ed anakseng ya alak tan inyan to ed tanubong, insan ipapainum to ed sikato, a kuan to: “Paulyan yo! Nengnengen tayo no kasin onsabi si Elias a mangiyepas ed sikato.” 37  Balet si Jesus et inmeyag insan la nauyos so linawa to. 38  Tan say kurtina na santuaryo et apilat tan nankadua manlapud tagey anggad leksab. 39  Natan sanen say opisyal na armada ya akaalagey a manbabantay ed sikato et anengneng ton nauyos lay linawa to kaleganan na sarayan inkagawa, inkuan to: “Petepeteg a sayan too et Anak na Dios.” 40  Diad bandad arawi et wala met iray maniimaton a bibii, a kaiba ed saratan si Maria Magdalena ontan met ed si Maria ya ina di Santiago a Melag tan Joses, tan si Salome, 41  a mimila tan manlilingkor ed sikato sanen walad Galilea, tan say dakel nin bibii ya akiulop ed sikaton tinmatdang ed Jerusalem. 42  Natan sanen ngarngarem la, tan lapud Panagparaan la, salanti, say agew antis na sabaton, 43  sinmabi si Jose a taga Arimatea, sakey a gagalangen a membro na Konsilyo,* a manaalagar met ed panarian na Dios. Sikatoy nampakpel a linma ed si Pilato tan kinerew toy bangkay nen Jesus. 44  Balet manduaruwa si Pilato no kasin sikatoy inatey la, kanian impatawag toy opisyal na armada pian tepeten to no kasin inatey la. 45  Kanian sanen aseguro to itan ed opisyal na armada, inabuloyan toy Jose a mangala ed bangkay. 46  Diad saman et analiw si Jose na pinon lienzo tan sikatoy inyepas to, binalkot toy pinon lienzo tan imparukol to ed sakey a lubok ya inungib ed abalbaleg a bato, tan impatulin toy sakey a bato ed puerta na pakanodnonotan a lubok. 47  Balet babantayan nen Maria Magdalena tan si Maria ya ina nen Joses so pasen ya angiparukolan ed sikato.

Paimanod leksab

Mar 15:21 * Nengnengen so Apendise 6.
Mar 15:24 * Nengnengen so paimano ed leksab na Mat 27:35.
Mar 15:25 * Alas-9 na kabuasan, no igapo ed imbutay na agew.
Mar 15:28 * Nengnengen so paimano ed leksab na Mat 17:21.
Mar 15:33 * Alas-12 na kaagwan, no igapo ed imbutay na agew.
Mar 15:33 * Alas-3 na ngarem, no igapo ed imbutay na agew.
Mar 15:43 * Odino, “say Sanhedrin.”