Marcos 4:1-41

4  Et nambangat lamet si Jesus diad gilig na dayat. Tan dinmago ed sikato so dakdakel a totoo, kanian sikatoy linmugan ed sakey a baloto a walad dayat tan yinmurong ditan, bangta say amin a totoo et walad gilig na dayat.  Tan dakel a bengatla so imbangat to ed sikara diad panamegley na saray ilustrasyon tan oniay inkuan to legan a babangatan to ra:  “Dengel kayo. Nia! Walay tomatanem a linman mangisibwag na saray bini.  Tan sanen mansisibwag la, walaray bini a naplag ed gilig na dalan, tan sinmabi iray manok tan tinoktok da iratan.  Tan say arum a bini et naplag ed kabatoan, a ditan et daiset so dalin, tan tinmubo iran tampol lapud aliwan aralem so dalin.  Balet amagaan ira sanen asinagan na agew, tan nalnes ira lapud ag-ira linmamut.  Tan say arum a bini et naplag ed kasabitan, tan binmaleg iray sabit tan inamper da ra, kanian ag-ira nambunga.  Balet say arum et naplag ed maong a dalin, tan sanen ombabaleg tan ondarakel ira et nambunga ra, tan say bunga ra et tunggal talomplo, anemaplo, tan sanlasus.”  Kanian inyarum to ni iyan salita: “Say walaan na saray layag a pandengel et nepeg ya ondengel.” 10  Natan sanen bukbukor to la, saramay akapaliber ed sikato pati saray labindua so nantepet nipaakar ed saray ilustrasyon. 11  Tan inkuan to ed sikara: “Niiter ed sikayo so sagradon sekreto na panarian na Dios, balet diad saramay walad paway et dedengelen da labat iray ilustrasyon, 12  ta pian anggano onnenengneng ira et agda met lanlamang nanengneng, tan anggano ondedengel ira et agda met lanlamang natalosan so kabaliksan na satan, tan sikaray ag-ompawil tan agnaperdona.” 13  Niarum ni, inkuan to ed sikara: “Agyo natatalosan iyan ilustrasyon, kanian panon yo kasin natalosan so arum niran ilustrasyon? 14  “Say tomatanem so mantatanem na salita. 15  Sirin, saramay walad gilig na dalan ya akataneman na salita et sikara imay akadngel ed satan balet ta sinmabi si Satanas tan inekal to so salita a nitanem ed sikara. 16  Ontan met, saramay nitanem ed kabatoan et sikara imay akadngel ed salita tan maliket ya angawat ed satan. 17  Ingen ag-ira linmamut, balet ta nansiansia iran agano, tan sanen sinmabi so kairapan odino panamasegsegang nisengeg ed salita, agapol ira. 18  Wala met iray arum a nitanem ed kasabitan, sikara imay akadngel ed salita, 19  balet saray kapagaan ed sayan mundo* tan say mapalikdon pakayari na kaykayamanan tan say pampipilalek ed arum niran bengatla so mangapekta tan mangamper ed salita, kanian ag-itan makapanbunga. 20  Diad kaunoran, saramay nitanem ed maong a dalin et saramay onderengel ed salita tan maliket a mangaawat ed satan tan manbubunga na tunggal talomplo, anemaplo, tan sanlasus.” 21  Tan intuloy ton imbaga ed sikara: “Agta say sakey a lamparaan et ag-iiyan ed dalem na baskit odino diad silong na dukolan? Agta iiyan itan diad panangipatoonan? 22  Ta amin a bengatla so inyamot ta pian nipatnag lanlamang, tan amin a bengatla so maalwar a sinakoban ta pian niparungtal lanlamang. 23  Siopaman a walaan na saray layag a pandengel et nepeg ya ondengel.” 24  Inkuan to ni ed sikara: “Imano yo so narerengel yo. Ta say sukat a panusukat yo, satan so panukatan ed sikayo, on, mas dakel ni so niarum ed sikayo. 25  Ta samay walaan et naikdan ni na dakel, balet samay andian, anggan say walad sikato et alaen.” 26  Kanian intuloy to nin inkuan: “Say panarian na Dios et aliling toy sakey a toon angisibwag na bini diad dalin, 27  tan sikatoy unuugip no labi tan ombabangon no agew, legan a saray bini et ontutubo tan ombabaleg, ya agto amta no panon a nagagawa itan. 28  Say dalin a mismo so kalkalnan mamapawala na bunga, unona say bulong, insan say pugnel, tan diad kaunoran et say binmuyag lan dawa. 29  Balet sano tinmakken lay bunga, iparaan to lay palot, lapud asabi lay panag-ani.” 30  Tan intuloy ton inkuan: “Anto so pangiyalilingan tayo ed panarian na Dios, odino panon tayon iyilustra itan? 31  Singa itan bukel na mustasa, a diad panaon ya intanem itan et sankamelagan ed amin a bukel a walad dalin— 32  balet sano akatanem la, satan so ontubo tan magmaliw a balbaleg nen say arum niran pising tan mansanga na angkakabaleg, kanian ditan so uubongan na saray ontitikyab a manok.” 33  Kanian diad panamegley na dakel ya ilustrasyon a singa satan et isasalaysay to ed sikara so salita, unong ed nasarag dan dengelen. 34  On, sikatoy naynay a manguusar na ilustrasyon sano mansasalita ed sikara, balet no siksikara labat la et ipapaliwawa to ed saray disipulo to so amin a bengatla. 35  Tan diad saman ya agew, sanen labi la, inkuan to ed sikara: “Onla tayo ed biek a gilig na dayat.” 36  Kanian, sanen apasipot da la iray totoo, linmugan ira ed baloton niluganan to, tan binmuat la ran tampol, tan wala met iray arum a baloton akibansag. 37  Natan et sinmabi so makmaksil a bagyo, tan saray daluyon et onsisipwak ed baloto, kanian ngalngali la onlereg so baloto. 38  Balet sikatoy akadanganan a nanaugip diad beneg na baloto. Kanian sikatoy binangon da tan inkuan da: “Managbangat, agka napapagaan a ngalngali tayo la ompatey?” 39  Diad saman et sikatoy binmangon tan binano to so dagem tan inkuan to ed dayat: “Tunda ka! Deen ka!” Tan kinmepa so dagem, tan nagmaliw a marendeen. 40  Kanian inkuan to ed sikara: “Akin et tinmalaw kayo? Anggapo ta ni pananisia yo?” 41  Balet akalikna ray nikadkaduman takot, tan inkuan da ed sakey tan sakey: “Siopa kasi iya, ta anggan say dagem tan say dayat et ontutulok ed sikato?”

Paimanod leksab

Mar 4:19 * Odino, “sistema na bengabengatla.”