8 DECEMBER, 2022
NKHANI ZA PADZIKO LONSE

M’bale Dubovenko ndi M’bale Litvinyuk Awagamula Kuti Akakhale Kundende Zaka 6

YAMBANI

Pa 30 November 2022, khoti la mumzinda wa Armyanskiy m’chigawo cha Crimea linapereka chigamulo kwa M’bale Aleksandr Dubovenko ndi M’bale Aleksandr Litvinyuk. Abale awiriwa anawalamula kuti akakhale kundende zaka 6 ndipo nthawi yomweyo anawapititsa kundende.

Zokhudza Abalewa

Aleksandr Dubovenko

Chaka chobadwa: 1973 (Ku Ochakiv ku Ukraine)

Mbiri yake: Ankagwira ntchito yowotcherera zinthu, yokonza zinthu zamagetsi komanso ya ukalipentala. Anakwatira Irina mu 1999

Mayi ake anaphunzira choonadi n’kukhala a Mboni za Yehova kenako anamuphunzitsa iyeyo. Anasangalala kudziwa lonjezo la m’Baibulo lakuti dziko lapansi lidzakhala paradaiso. Anabatizidwa mu 1999

Zimene Ananena a

Kodi munakwanitsa bwanji kupirira ukaidi wosachoka panyumba?

Kwa chaka ndi mwezi umodzi, sindinkaloledwa kulankhulana ndi wina aliyense kunja kwa nyumba yanga koma apolisi ndi maloya okha basi. Mpaka pano sindiloledwa kulankhulana ndi abale ndi alongo amene anaperekera umboni pa mlandu wanga. Komabe, ndinkaganizira za chitsanzo cha Eliya. Iye anali m’chipululu ndipo anali ndi nkhawa kwambiri. Yehova analimbitsa Eliya ndipo anamutsimikizira kuti sanali yekha. Yehova sanasiye Eliya ndipo nanenso ndine otsimikiza kuti sangandisiye ndekha.

Aleksandr Litvinyuk

Chaka chobadwa: 1960 (Ku Amangeldi ku Kazakhstan)

Mbiri yake: Ankagwira ntchito pafakitale ina yopanga mankhwala komanso ankagwira ntchito yowotcherera zinthu. Anakwatira Nadezhda mu 1979 ndipo ali ndi ana aamuna awiri ndi wamkazi mmodzi

Ankadzifunsa chifukwa chake Mulungu amalola zoipa kuchitika komanso kuti anthu azivutika. Anapeza yankho lake pamodzi ndi mkazi wake atayamba kuphunzira Baibulo ndi a Mboni za Yehova ndipo anabatizidwa mu 1993

Zimene Ananena b

Kodi munakonzekera bwanji kuti mupirire kuzunzidwa?

Nditangoyamba kumva zimene zikuchitikira abale ndi alongo, ndinkadzifunsa ngati ndinali wokonzeka kupirira kuzunzidwa. Ndipo ndinaona kuti sindinali wokonzeka. Choncho ndinayamba kuwerenga komanso kusinkhasinkha nkhani za m’Baibulo za anthu amene anapirira mavuto aakulu. Ndinkaganizira kwambiri za kupirira kwawo komanso kudalira Yehova. Ndinafufuza za nkhanizi n’kumaziyerekezera kuti zikuchitikira ineyo. Ine ndi mkazi wanga tinkaonanso mbiri za abale ndi alongo okhulupirika amasiku ano. Zimenezi zinalimbitsa chikhulupiriro chathu ndipo zinatithandiza kukhala okonzeka pa zinthu zomwe tingakumane nazo.

Kodi mapemphero a abale akuthandizani bwanji?

Ndimagwetsa misozi ndikamva kuti abale ndi alongo amandipempherera, kumupempha Yehova kuti andithandize kukhala wodekha, wolimba komanso andipatse mphamvu zomwe ndikufunikira. Nthawi ina iliyonse tisanalowe m’khoti kuti limvetsere mlandu wanga, m’bale mmodzi ankandifunsa kuti ndinene zimene zikundidetsa nkhawa zomwe ndinazitchula m’pemphero langa zokhudza mlanduwo. Kenako nayenso ankatchula nkhawa zangazo m’pemphero lake pa nthawi yomwe akudikirira panja. Zimenezi zinandilimbikitsa kwambiri.

Timalimbikitsidwa kudziwa kuti Yehova ali nafe nthawi zonse kulikonse komwe tili komanso nthawi iliyonse imene tikukumana ndi mavuto.—Salimo 139:7-12.

Nthawi Komanso Zimene Zinachitika

2 August 2021

Mlandu unayamba kuzengedwa. Abale onse awiri anaimbidwa mlandu wogwiritsa ntchito mapulogalamu a kompyuta pavidiyokomfelensi polimbikitsa kagulu kochita zinthu zoopsa
5 August 2021

Apolisi anakafufuza zinthu m’nyumba za mabanja 8 za a Mboni za Yehova kuphatikizapo nyumba ya a Dubovenko ndi a Litvinyuk. M’bale Litvinyuk anamumanga ndi kumuika m’ndende yongoyembekezera
6 August 2021

M’bale Litvinyuk anamutulutsa m’ndende yongoyembekezera ndi kumuika pa ukaidi wosachoka panyumba
9 August 2021

Apolisi anakafufuza kachiwiri zinthu m’nyumba ya a Dubovenko ndipo anawafunsa mafunso ndi kuwaika pa ukaidi wosachoka panyumba
11 August 2021

M’bale Litvinyuk anaimbidwa mlandu wotsogolera kagulu kochita zinthu zoopsa
8 February 2022

M’bale Dubovenko anaimbidwa mlandu wotsogolera kagulu kochita zinthu zoopsa
29 April 2022

Mlandu unayamba kuzengedwa. Jaji anakana pempho la a Litvinyuk lakuti akaonane ndi dokotala kuti akalandire thandizo pa nthawi yomwe anali pa ukaidi wosachoka panyumba
8 September 2022

Pa tsiku, abale onse awiri ankaloledwa kuchoka panyumba zawo pakati pa 7 koloko m’mawa ndi 7 koloko madzulo
30 November 2022

Abale onse awiri anagamulidwa kukakhala kundende za 6

a b Ndemanga zawo zonse zinalembedwa asanalandire chigamulo.

Mwina Mungakondenso Kudziwa Izi

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI