1, 2. UJehova wathuma uMosi ukuthi enzeni, njalo wamqinisa njani?

 UNGEZWA njani nxa kungathiwa ume phambi kombusi olamandla kulabo bonke emhlabeni ukhulumele abantu bakaJehova? Akuthandabuzwa ukuthi ungahlalela ovalweni, ubone angani umsebenzi lo ulabanikazi futhi uzizwe usesaba kakhulu. Ubungalungiselela njani lokho ozakutsho? Ubungenzani ukuze ukhulume into ezwakalayo njengoba uyabe ungummeli kaNkulunkulu usomandla?

² Yikho kanye okwake kwenzakala kuMosi. UJehova wathuma indoda le ‘eyayithobeke kakhulu, ukwedlula wonke amadoda asemhlabeni’ ukuthi ihambe kuFaro iyemtshela ukuthi akhulule abantu bakaNkulunkulu ababesebugqilini eGibhithe, bedliswa imbuya ngoluthi. (AmaN. 12:3) UFaro wayeyindoda engahloniphiyo njalo eyayizikhukhumeza. (Eks. 5:1, 2) Lanxa kunjalo, uJehova wayefuna ukuthi uMosi atshele uFaro ukuthi akhulule izigqili zakhe ezingaba yizigidi ezintathu ziphume eGibhithe. Kuyazwisiseka-ke ukuthi kungani uMosi wathi kuJehova: “Kambe ngingubani ukuba ngiye kuFaro ukuyakhupha abako-Israyeli elizweni laseGibhithe na?” Kumele ukuthi uMosi wayebona angani umsebenzi lo kawumfanelanga, ulabanikazi bawo. Kodwa uNkulunkulu wamqinisa ngokumtshela ukuthi kasoze amtshiye yedwa. Wathi: “Ngizakuba lawe.”​—Eks. 3:9-12.

3, 4. (a) UMosi wayesesabani? (b) Lathi kungenzakala yini ukuthi sesabe njengoMosi? Chaza.

 ³ UMosi wayesesabani? Kuyazicacela ukuthi wayesesaba ukuthi uFaro wayengasoze amamukele kumbe amlalele umuntu owayethunywe nguJehova uNkulunkulu. Wayesesaba lokuthi abantu bakibo babezacabanga ukuthi uqamba amanga ukuthi uJehova umbeke ukuthi abakhokhele baphume eGibhithe. Yikho wabuza uJehova wathi: “Pho bangayekela ukungikholwa loba ukulalela engikutshoyo bathi, ‘UJehova kazange abonakale kuwe?’”​—Eks. 3:15-18; 4:1.

⁴ Sonke sithola isifundo esiqakatheke kakhulu kulokho okwake kwenzakala kuMosi kanye lakulokho akutshelwa nguJehova. Mhlawumbe wena awusoze ume phambi kwesiphathamandla sikahulumende. Loba kunjalo, ukubona kunzima yini ukuthi utshumayeze abantu ohlala uhlangana labo ubatshela ngoNkulunkulu langoMbuso wakhe? Nxa kunjalo ungafundani kulokho okwenzakala kuMosi?

5. UJehova wamuphani uMosi, njalo lokhu kwakuzamnceda njani ukuthi angesabi? (Khangela umfanekiso osekuqaliseni.)

⁵ UMosi watshela uNkulunkulu ukuthi wayesesaba ukuthi abantu abasoze bamlalele. Yikho-ke uNkulunkulu wamncedisa ukuthi alungiselele okwakuphambili. Indaba ­eku-Eksodusi ithi: “UJehova wathi kuye, ‘Kuyini lokho okusesandleni sakho?’ Waphendula wathi, ‘Yinduku.’ UJehova wathi, ‘Iphosele phansi emhlabathini.’ UMosi wayiphosa phansi yasiphenduka yaba yinyoka, wayibalekela. UJehova wasesithi kuye, ‘Yelula isandla sakho uyidobhe ngomsila.’ UMosi welula isandla wayibamba inyoka yasiphenduka yaba yinduku esandleni sakhe. UJehova wathi, ‘Lokhu yikwenzela ukuthi bakholwe ukuthi uJehova . . . ubonakale kuwe.’” (Eks. 4:2-5) Siyabona-ke ukuthi uNkulunkulu wapha uMosi lokho ayezakusebenzisa ukuze atshengise ukuthi umlayezo wakhe wawuvela kuJehova. Induku le yayingakhanya ingatsho lutho, kodwa yantshintsha yaba yinto ephilayo kusetshenziswa amandla kaNkulunkulu. Isimangaliso lesi sasizakwenza ukuthi abantu bamkholwe sibili uMosi njalo kukhanye lokuthi wayesekelwa nguJehova. Yikho uJehova wamtshela wathi: “Phatha induku le esandleni sakho ukuze wenze izimangaliso ngayo.” (Eks. 4:17) UMosi wayesengahamba-ke elesibindi sokuyamela uNkulunkulu weqiniso phambi kwabantu bakibo lakuFaro ngoba wayephethe induku eyayizatshengisa ukuthi uthunywe nguNkulunkulu.​—Eks. 4:29-31; 7:8-13.

6. (a) Kuyini okumele kube sezandleni zethu nxa sitshumayela, njalo kungani? (b) Chaza ukuthi kutshoni ukuthi “ilizwi likaNkulunkulu liyaphila,” kanye lokuthi “liyasebenza.”

⁶ Umbuzo othi: “Kuyini lokho okusesandleni sakho?” uyasebenza lakithi nxa sisiyatshela abanye umlayezo oseBhayibhilini. Siyabe siphethe iBhayibhili ukuze silivule loba nini. Lanxa abanye bengalibona lilibhuku nje, uJehova uyalisebenzisa iLizwi lakhe elaphefumulelwayo ukuze akhulume lathi. (2 Phet. 1:21) Liphethe lokho uNkulunkulu asithembisa ukuthi uzasenzela khona nxa sekubusa uMbuso wakhe. Yikho umphostoli uPhawuli wabhala wathi: “Ilizwi likaNkulunkulu liyaphila njalo liyasebenza.” (Bala uHebheru 4:12.) Ukuthi liyaphila kutsho ukuthi uJehova ulokhu esebenza ukuze lokho asithembisa khona kugcwaliseke konke. (Isaya. 46:10; 55:11) Kanti njalo liyasebenza ngoba nxa umuntu angananzelela ukuthi iLizwi likaJehova liyaphila, lokho akubala eBhayibhilini kungantshintsha ukuphila kwakhe.

7. Singenzani ukuze ‘siliphathe kuhle ilizwi leqiniso’?

⁷ Ngakho-ke uJehova usiphe iLizwi lakhe eliphilayo esingalisebenzisa ukuze abantu bawukholwe umlayezo wethu njalo babone ukuthi uvela kuye. Yikho uPhawuli wathi esebhalele amaHebheru wakhuthaza umfana ayemqeqetsha, uThimothi, ukuthi ‘enze ubungcono bakhe ukuba aliphathe kuhle ilizwi leqiniso.’ (2 Tim. 2:15) Thina singawasebenzisa njani amazwi kaPhawuli? Ngokukhetha kuhle  imibhalo ukwenzela ukuthi nxa sesiyibalela abantu, ithinte izinhliziyo zabo. Amaphetshana esawathola ngo-2013 enzelwe ukuthi asincede ukuthi senze lokho.

8. Omunye umbonisi wenkonzo wathini ngamaphetshana amatsha?

⁸ Wonke amaphetshana la amatsha ayahambelana. Yikho-ke nxa usukwazi ukusebenzisa elilodwa, usungenelisa ukuwasebenzisa wonke. Kulula yini ukuwasebenzisa? Omunye umbonisi wenkonzo waseHawaii, e-U.S.A., wabhala wathi: “Sasingananzeleli ukuthi amaphetshana la amatsha azasinceda kakhulu enkonzweni yendlu ngendlu lalapho sitshumayela obala.” Usebone ukuthi indlela amaphetshana la abhalwe ngayo yenza abantu baphendule masinya njalo kanengi lokhu kwenza ukuthi ingxoxo ibe mnandi. Uthi lokhu kungenxa yokuthi umuntu otshunyayezwayo uyabe evele ephiwe izimpendulo angakhetha kuzo ezisekuqaliseni kwephetshana. Yikho kakhathazeki ngokuthi uzakhuluma okungayisikho.

9, 10. (a) Amaphetshana ethu asinceda njani ukuthi sisebenzise iBhayibhili nxa sitshumayela? (b) Phakathi kwamaphetshana amatsha, yiwaphi akusebenzela kuhle, njalo kungani?

⁹ Wonke amaphetshana la asinceda ukuthi sibale umbhalo ozathinta inhliziyo. Ngokwesibonelo, khangela elithi Ukuhlupheka Kuzaphela Yini? Kungelani lokuthi umuntu ukhetha “u-ye,” “u-hatshi” loba “u-engxenye,” vula ikhasi eliphakathi ungatshongo lutho ubususithi, “Nanku okutshiwo liBhayibhili.” Ngemva kwalokho bala iSambulo 21:3, 4.

¹⁰ Nxa ususebenzisa elithi Uyini Umbono Wakho NgeBhayibhili? akulandaba ukuthi umuntu ukhetha yiphi impendulo phakathi kwezintathu ezisekuqaliseni. Vula ikhasi eliphakathi ubususithi, “IBhayibhili lithi ‘iMibhalo yonke yaphefumulelwa nguNkulunkulu.’” Ubususithi, “Kodwa kulokunye esikutshelwayo.” Vula iBhayibhili lakho ku-2 Thimothi 3:16, 17, ubusuyibala yonke.

11, 12. (a) Kuyini okungakuthokozisa enkonzweni? (b) Amaphetshana angakunceda njani ukuthi ulungiselele ukubuyela emuntwini oxoxe laye?

¹¹ Lokho elizakubala kanye lalokho elizaxoxa ngakho kuya ngokuthi umuntu omtshumayezayo uthini. Kungelani lokuthi uyabe etheni, okungakuthokozisa yikuthi uyabe umnike iphetshana njalo umbalele iLizwi likaNkulunkulu lanxa uyabe ubale ivesi elilodwa loba amabili ngoba phela liyabe liqalisa ukufunda. Liyabe lizaxoxa okunengi ngelinye ilanga.

¹² Wonke amaphetshana la alombuzo  ngemuva, ngaphansi kwesihloko esithi “Okumele Ucabange Ngakho,” kanye lemibhalo elingaxoxa ngayo nxa usubuyela emuntwini oxoxe laye. Kuphetshana elithi Uyini Umbono Wakho Ngekusasa? umbuzo elingaxoxa ngawo nxa usubuyela uthi: “UNkulunkulu uzawuntshintsha njani umhlaba wethu ubengcono?” Kufakwe uMathewu 6:9, 10 loDanyeli 2:44. Nxa usebenzisa elithi Abafileyo Bangaphinda Baphile Yini? kulombuzo othi “Kuyini okwenza siguge njalo sife?” Kufakwe uGenesisi 3:17-19 loRoma 5:12.

13. Ungawasebenzisa njani amaphetshana esikhulume ngawo nxa ufuna ukuqalisa izifundo zeBhayibhili?

¹³ Sebenzisa amaphetshana esikhulume ngawo ukuze uqalise izifundo zeBhayibhili. Amaphetshana la aqamba isifundo esithile esisebhukwini elithi Izindaba Ezinhle Ezivela KuNkulunkulu! ongaya kuso ukuze uqalise izifundo. Ngokwesibonelo iphetshana elithi “Ngubani Obusa Umhlaba Sibili?” liqamba isifundo 5 esisebhukwini lelo. Elithi “Kuyini Okungenza Imuli Ithokoze?” liqamba isifundo 9. Kanti njalo umuntu osebenzisa i-QR code * engamuva kwephetshana uzangena kuWebhusayithi yethu lapho azathola khona okuthile okungamkhuthaza ukuthi afunde iBhayibhili. Nxa ungawasebenzisa kuhle amaphetshana la, uyabe uzajayela ukuhlala usebenzisa iBhayibhili nxa uqalisa ukuhlangana lomuntu lanxa usubuyela kuye. Lokhu kuzakwenza ukuthi ube lezifundo ezinengi. Kuyini okunye ongakwenza ukuze ulisebenzise kuhle iLizwi likaNkulunkulu enkonzweni yakho?

14, 15. Ungamlingisela njani uPhawuli nxa utshumayela?

¹⁴ UPhawuli wayelesifiso esikhulu sokuthi abazwisise abantu “abanengi uma kusenzeka” ukuze abatshumayeze kuhle. (Bala u-1 Khorinte 9:19-23.) Nanzelela ukuthi wayefuna ‘ukuzuza amaJuda, ukuzuza labo abangaphansi komthetho, ukuzuza labo abangelamthetho, lokuzuza ababuthakathaka.’ Wayehlose ukutshumayeza ‘abantu bonke ukuze kuthi ngazo zonke izindlela ezingenzakala asilise abanye.’ (ImiSeb. 20:21) Ungamlingisela njani uPhawuli nxa ulungiselela ukuyatshela “abantu bonke” abasensimini yethu iqiniso?​—1 Tim. 2:3, 4.

¹⁵ Okunye ongakwenza yikuzama ukusebenzisa izintshumayelo eziku-Nkonzo Yethu YoMbuso eziphuma inyanga ngayinye. Kodwa nxa kuyikuthi kulokunye okukhathaza abantu abasensimini yenu, zama ukulungiselela ukuthi ukhulume ngakho ngoba yikho okuzakwenza ukuthi bafune ukuzwa okunengi. Cabanga ngendawo ohlala kuyo, ngabantu abahlala khona langezinto ezibahlupha kakhulu. Ngemva kwalokho usungacabanga ngombhalo ongabanceda. Omunye umbonisi wesiqinti uyachasisa ukuthi yena lomkakhe balisebenzisa njani iBhayibhili. Uthi: “Abantu abanengi bayasivumela ukuthi sibale ivesi elilodwa nxa singasoze silandise izinto ezinenginengi. Siqala sibabingelele siphethe amaBhayibhili ethu siwavulile, besesibabalela umbhalo.” Abanye sebeke basebenzisa ezinye izihloko, imibuzo kanye lemibhalo ethile ukuze bathinte izinhliziyo zabantu. Yikho-ke asikhangeleni ukuthi lathi singakwenza njani lokhu.

16. Chasisa ukuthi singamsebenzisa njani u-Isaya 14:7 ekutshumayeleni.

¹⁶ Nxa uhlala endaweni ejayele ukuba lodlakela ungabuza umuntu ukuthi: “Ubona angani kungenzakala yini ukuthi onozindaba bavuke besakaza indaba elesihloko esithi: ‘Amazwe wonke selokuphumula lokuthula’? Yikho okukhulunywa liBhayibhili ku-Isaya 14:7. Phela iBhayibhili limumethe lokho esikuthenjiswa nguNkulunkulu mayelana lokuthula esizakuba lakho kwelizayo.” Ngemva kwalokho, bala ivesi elikhuluma ngokuthile esikuthenjiswayo.

17. Ungamsebenzisa njani uMathewu 4:4 nxa uxoxa lomuntu?

¹⁷ Lapho ohlala khona, kulula yini ukuthi amadoda amanengi athole imali yokunakekela  izimuli zawo? Nxa kunzima, ungaqalisa ngokubuza umuntu ukuthi: “Indoda kumele ithole imali enganani ukuze imuli yayo ithokoze?” Nxa angaphendula, usungathi: “Amanye amadoda athola enengi ukwedlula lapho, kodwa izimuli zawo ziyabe zilokhu zingathokozi. Manje kuyini okuyabe kusilela?” Ngemva kwalokhu bala uMathewu 4:4 ubusucela ukufunda laye iBhayibhili.

18. Ungamsebenzisa njani uJeremiya 29:11 ukuze ududuze abanye?

¹⁸ Endaweni yakini, kungabe kulengozi ethile yini esanda kwehlela abantu? Nxa kunjalo, ungaqalisa intshumayelo yakho ngokuthi: “Ngilande ukuzokutshela okuthile okungakududuza. (Bala uJeremiya 29:11.) Uzibonile yini izinto ezintathu uNkulunkulu afuna ukusenzela zona? Ufuna ‘ukusiphumelelisa,’ ‘ukusinika ithemba,’ kanye ‘lesikhathi esizayo.’ Uzwa njani nxa usizwa ukuthi uNkulunkulu ufuna sibe lempilo enhle? Kodwa kungenzakala yini lokho?” Ngemva kwalokho, selingakhangela isifundo esihambelana lengxoxo yenu ebhukwini elithi Izindaba Ezinhle Ezivela KuNkulunkulu!

19. Chasisa ukuthi uSambulo 14:6, 7 angasetshenziswa njani nxa sixoxa labantu abasontayo.

¹⁹ Lapho ohlala khona, abantu abanengi bayasonta yini? Nxa kunjalo, ungaqalisa ingxoxo ngokubuza ukuthi: “Nxa ingilosi ibingafika ikhulume lawe, ubungayilalela yini? (Bala iSambulo 14:6, 7.) Evesini le ingilosi ithi: ‘Mesabeni uNkulunkulu limdumise, yena owadala amazulu, lomhlaba.’ Uyalazi yini ibizo lalowo owadala amazulu lomhlaba?” Ngemva kwalokho bala iHubo 124:8 elithi: “Usizo lwethu lusegameni likaJehova uMenzi wezulu lomhlaba.” Nxa usubalile, cela ukumchasisela okunengi okuphathelane loJehova uNkulunkulu.

20. (a) UZaga 30:4 angasetshenziswa njani nxa sifuna ukufundisa othile ibizo likaNkulunkulu? (b) Yiwuphi umbhalo ojayele ukuwusebenzisa umuntu azwisise sibili?

²⁰ Nxa ungahlangana losakhulayo, ungaqalisa ingxoxo ngokuthi: “Ngicela ukukubalela umbhalo olombuzo oqakatheke kakhulu. (Bala iZaga 30:4.) Akulamuntu owake wakwenza lokho okusevesini le. Lokhu kutshengisa ukuthi ivesi leli likhuluma ngoMdali wethu. * Singalithola ngaphi ibizo lakhe? Ngicela ukukutshengisa lona eBhayibhilini.”

21, 22. (a) Chaza ukuthi umbhalo okhethwe kuhle ungakuntshintsha njani ukuphila komuntu. (b) Kuyini ozimisele ukukusebenzisa ekutshumayeleni?

²¹ Ukubala umbhalo okhethwe kuhle kungamntshintsha umuntu. Ngokwesibonelo, oFakazi ababili abahlala e-Australia baqoqoda emnyango womunye umama. Omunye wabo wambuza wathi, “Uyalazi yini ibizo likaNkulunkulu?” wasembalela uHubo 83:18. Umama lo uthi, “Uyazi ngamangala! Bathi sebesukile ngathatha imota ngahamba amakhilomitha angu-56 ngisiya kwesinye isitolo samabhuku ukuze ngihlole ukuthi amanye amaBhayibhili alihumutsha njani ibizo leli, ngasengilikhangela kwesinye isichazamazwi. Ngathi sengikholiwe sibili ukuthi ibizo likaNkulunkulu nguJehova ngazibuza ukuthi pho kuyini okunye engingakwaziyo.” Ngemva kwalokho, yena lejaha ayezatshada lalo bahle baqalisa ukufunda iBhayibhili basebebhaphathizwa.

²² ILizwi likaNkulunkulu liyakuntshintsha ukuphila kwalabo abalibalayo besebekholwa ukuthi lokho uJehova asithembisa khona kuzagcwaliseka sibili. (Bala u-1 Thesalonika 2:13.) Umlayezo weBhayibhili usebenza kakhulu ukwedlula loba yini esingazama ukuyitsho nxa sifuna ukuthinta izinhliziyo zabantu. Yikho kumele sizame sibili ukusebenzisa iLizwi likaNkulunkulu zikhathi zonke ngoba liyaphila.