Dewteronomju 32:1-52
32 “Isma’ sema, u jien nitkellem,U ħa tismaʼ l-art dak li ngħid jien.
2 L-istruzzjoni tiegħi tinżel bħax-xita,Kliemi joqtor bħan-nida,Bħal irxiex fuq il-ħaxixU bħal ħalbiet tax-xita spissi fuq il-ħdura.
3 Għax jien se niddikjara l-isem taʼ Ġeħova.
Nitkellem dwar il-kobor tal-Alla tagħna!
4 Hu l-Blata, dak li jagħmel hu perfett,Għax triqatu kollha huma ġusti.
Hu Alla taʼ min jafdah li qatt mhu inġust;Hu ġust u sewwa.
5 Intom aġixxejtu b’mod mill-agħar.
M’intomx it-tfal tiegħu, it-tort hu tagħkom stess.
Intom ġenerazzjoni qarrieqa u mgħawġa!
6 Hekk għandek tittrattah lil Ġeħova,Poplu stupidu u bla għerf?
Mhuwiex hu Missierek li ħalqek,Il-Wieħed li għamlek u saħħek?
7 Ftakar f’jiem il-qedem;Ikkunsidra s-snin tal-ġenerazzjonijiet tal-passat.
Staqsi lil missierek u jgħidlek;Lil uħud imdaħħlin fiż-żmien u jinformawk.
8 Meta l-Iktar Għoli ta lill-popli l-wirt tagħhom,Meta fired lit-tfal t’Adam* minn xulxin,Hu għamel il-fruntiera tal-popliSkont kemm kienu t-tfal t’Iżrael.
9 Għax sehem Ġeħova hu l-poplu tiegħu;Ġakobb hu l-wirt tiegħu.
10 Hu sabu fid-deżert,U f’deżert vojt, li fih kien jinstemaʼ l-għajjat.
Hu pproteġieh, ħa ħsiebu,U ddefendieh bħall-mimmi t’għajnejh.
11 Bħalma ajkla tgħallem il-frieħ tagħha jtiru,Ittir fuq il-frieħ tagħha,Tiftaħ ġwinħajha, taqbadhom,U ġġorrhom fuq ġwinħajha,
12 Ġeħova waħdu baqaʼ jmexxih;*Ma kien hemm ebda alla barrani miegħu.
13 Hu rikkbu fuq il-postijiet għoljin tal-art,U b’hekk kiel il-prodott tal-għelieqi.
Tah jiekol l-għasel mill-irdumU ż-żejt minn blata taż-żnied,
14 Butir mill-merħla tal-baqar u ħalib mill-merħla tan-nagħaġ,Flimkien mal-aqwa* nagħaġ,U mtaten tal-Basan, u bdabad,Flimkien mal-aqwa* qamħ;U tah jixrob l-inbid mid-demm* tal-għeneb.
15 Meta Ġesurun* ħxien, hu rribella kontra sidu.
Hu ħxien, simen, u mtela.
Għalhekk, hu abbanduna lill-Alla li għamlu,U stmerr il-Blata tas-salvazzjoni tiegħu.
16 Hu ġiegħlu jirrabja billi qiem allat barranin;Beda joffendih b’affarijiet moqżieża.
17 Beda joffri sagrifiċċji lid-demonji, u mhux lil Alla,Lill-allat li ma kienx jaf,Allat ġodda li daħlu dan l-aħħar,Lill-allat li missirijietu ma kinux jafu.
18 Hu nesa l-Blata, lil Missieru,U ma ftakarx fl-Alla li welldu.
19 Meta Ġeħova ra dan, hu warrbu,Għax it-tfal tiegħu subien u bniet offendewh.
20 Għalhekk qal, ‘Jien se naħbi wiċċi minnhom;Ħa nara x’se jiġri minnhom.
Għax huma ġenerazzjoni mħassra,Tfal li ma tistax tafdahom.
21 Huma ġegħluni nirrabja* billi qiemu allat foloz;Offendewni bl-idoli tagħhom li ma jiswew għal xejn.
Allura jien se nqanqalhom jgħiru għal nies li mhumiex poplu;B’poplu stupidu se noffendihom.
22 Għax ir-rabja tiegħi qabbdet narLi se jaqbad sal-qiegħ tal-Qabar,*U se jeqred l-art u l-prodott tagħhaU jagħti n-nar lil kulma hemm taħt il-muntanji.
23 Se nżid il-gwaj tagħhom;Se nuża l-vleġeġ tiegħi fuqhom.
24 Huma jkunu dgħajfin minħabba l-ġuħ,Jittieklu minn deni qawwi, u jinqerdu għalkollox.
Se nibgħat snien il-bhejjem kontrihomU l-velenu tas-sriep* tat-trab.
25 Barra, ix-xabla se tiħdilhom it-tfal;Ġewwa, se jkun hemm twerwirKemm għaż-żagħżugħ u kemm għall-verġni,Kemm għat-tarbija u kemm għal dak b’xagħru abjad.
26 Kieku kont ngħid: “Inxerridhom;Sabiex in-nies ma jiftakruhomx iktar,”
27 Imma m’għedtx hekk għax bżajt mir-reazzjoni tal-għadu,Għax l-għedewwa jistgħu jinterpretaw dan ħażin.
Forsi jgħidu: Bil-qawwa tagħna rbaħna;Ma kienx Ġeħova li għamel dan kollu.”
28 Għax Iżrael hu poplu nieqes mill-għaqal,*U fosthom m’hemmx min hu kapaċi jifhem.
29 Mhux li kienu għorrief! Kieku kienu jirriflettu dwar dan.
Kienu jaħsbu dwar il-konsegwenzi tagħhom.
30 Kif jistaʼ wieħed jiġri wara 1,000,U tnejn iġiegħlu 10,000 jaħarbu,Li kieku ma kienx għax il-Blata tagħhom kien biegħhomU Ġeħova kien tahom f’idejn l-għedewwa?
31 Għax il-blata tagħhom mhijiex bħall-Blata tagħna,Anki l-għedewwa tagħna fehmu dan.
32 Għax id-dielja tagħhom hi mid-dielja taʼ SodomaU mill-għelieqi tad-dwieli taʼ Gomorra.
L-għeneb tagħhom għeneb velenuż,L-għenieqed tagħhom morri.
33 L-inbid tagħhom hu l-velenu tas-sriep,Il-velenu qattiel tal-kobri.
34 Mhuwiex dak kollu li għamlu maħżun għandi,Magħluq sew fil-maħżen tiegħi?
35 Il-vendetta hi tiegħi, anki t-tpattija,Għaż-żmien stabbilit meta sieqhom togħtor,Għax jum id-diżastru tagħhom hu qrib,U dak li qed jistenniehom ġej malajr.’
36 Għax Ġeħova se jiġġudika lill-poplu tiegħu,U se jitħassar* lill-qaddejja tiegħu,Meta jara li s-saħħa tagħhom naqset,U li fadal biss dawk bla ħila u dgħajfin.
37 Imbagħad hu jgħid, ‘Fejn huma allathom,Il-blata li fittxew il-kenn fiha,
38 Li kienu jieklu x-xaħam tas-sagrifiċċji* tagħhomU jixorbu l-inbid tal-offerti tax-xorb tagħhom?
Ħa jqumu jgħinukom.
Ħa jsiru għalikom post taʼ kenn.
39 Araw issa li jien—jien Alla,U m’hemmx allat ħliefi.
Jien nagħti l-mewt, u jien nagħti l-ħajja.
Jien nagħmel ferita, u jien infejjaq,U ħadd ma jistaʼ jeħles lil ħaddieħor minn idi.
40 Għax nerfaʼ idi lejn is-sema,U naħlef: “Daqskemm jien ħaj għal dejjem,”
41 Jekk insinn ix-xabla tleqq tiegħi,U nlesti idi għall-ġudizzju,Jien nagħmel vendetta mill-avversarji tiegħiU npattiha lil dawk li jobogħduni.
42 Inġiegħel il-vleġeġ tiegħi jiskru bid-demm,Bid-demm tal-maqtulin u tal-ilsiera.
U x-xabla tiegħi tiekol il-laħamMill-irjus tal-mexxejja tal-għadu.’
43 Nies ta’ popli oħra, ifirħu mal-poplu tiegħu,Għax hu se jitħallas għad-demm tal-qaddejja tiegħu,U jagħmel vendetta mill-avversarji tiegħuU jagħmel tpattija għall-art* tal-poplu tiegħu.”
44 B’hekk Mosè, flimkien maʼ Ħosegħa* bin Nun, mar u reġaʼ qal il-kliem kollu taʼ din l-għanja biex jisimgħuh in-nies.
45 Wara li Mosè spiċċa jgħid dan il-kliem kollu lill-Iżraelin kollha,
46 hu qalilhom: “Ħudu bis-serjetà l-kliem kollu li llum qed ngħidilkom bħala twissija, sabiex tikkmandaw lit-tfal tagħkom biex ikunu ċerti li jagħmlu l-kliem kollu taʼ din il-Liġi.
47 Għax dan mhux kliem vojt, imma jfisser ħajjitkom, u b’dan il-kliem tistgħu tgħixu ħajja twila fl-art li se taqsmu l-Ġordan biex tiħduha f’idejkom.”
48 Ġeħova kellem lil Mosè dakinhar stess u qallu:
49 “Itlaʼ fuq din il-muntanja t’Għabarim, il-Muntanja Nebo, li qiegħda fl-art taʼ Mowab faċċata taʼ Ġeriko, u ħares lejn l-art taʼ Kangħan, li qed nagħti lill-Iżraelin biex tkun tagħhom.
50 Imbagħad int tmut fuq il-muntanja li se titlaʼ fuqha u tinġabar maʼ niesek,* bħalma miet ħuk Aron fuq il-muntanja Ħor u nġabar maʼ niesu,
51 għax it-tnejn li intom ma kontux leali lejja fost l-Iżraelin ħdejn l-ilmijiet taʼ Meriba taʼ Kades fid-deżert taż-Żin, għax ma qaddistunix quddiem il-poplu t’Iżrael.
52 Se tara l-art mill-bogħod, imma m’intix se tidħol fl-art li qed nagħti lill-poplu t’Iżrael.”
Noti taʼ taħt
^ Jew forsi “lir-razza umana.”
^ Jiġifieri lil Ġakobb.
^ Letteralment “max-xaħam taʼ.”
^ Letteralment “max-xaħam tal-kilwa taʼ.”
^ Jew “mill-meraq.”
^ Ifisser “Wieħed Ġust,” titlu onorarju għal Iżrael.
^ Jew “ngħir.”
^ Jew “taʼ Xeol,” jiġifieri l-qabar komuni tan-nies. Ara Termini tal-Bibbja Spjegati.
^ Jew “tar-rettilli.”
^ Jew forsi “li ma jismax il-parir.”
^ Jew “jiddispjaċih għal.”
^ Jew “jieklu l-aqwa sagrifiċċji.”
^ Jew “inaddaf l-art.”
^ L-isem oriġinali taʼ Ġożwè. Ħosegħa hu forma mqassra taʼ Ħosajja li jfisser “Salvat minn Jah; Jah Salva.”
^ Din hi espressjoni poetika li tirreferi għall-mewt.
