YÃMB sã n dat n bãng sẽn yaa lɛɛr ninga, bõe la y maanda? Tõe tɩ y na n gesa montrẽ. Y zoa sã n sok yãmb tɩ yaa lɛɛr bʋg n be, wãn to la y na n leok-a? Nebã sẽn togsd lɛɛrã to-to wã yaa toor-toore.

D rɩk makr ne wĩndg wakat a 1:30. Nina na n yeelame tɩ yaa wakat a ye wã sẽn loog minit pis-tã, bɩ wakat 13 sẽn loog minit 30, tɩ nina me yeel tɩ yaa wĩndg wakat a yiibã sẽn ket minit 30. Bee ne sẽn yaa tẽng ningẽ la y be.

La tõe tɩ y sokda y meng yaa: ‘Biiblã gʋlsg wakatẽ wã, nebã sã n da rat n togs sẽn yaa lɛɛr ninga, wãn to la b yeta?’ Bãmb me sẽn da togsd lɛɛrã to-to wã yaa toor-toore. Biiblã babg ning b sẽn da gʋls ne ebre wã pʋgẽ, b gomda “yibeoog” yelle, “wĩnto-sʋka,” “zaabre,” la “yʋng” yelle. (Sɩng. 8:11; Tõo. 28:29; Bʋ. 19:9; 1 Rĩm. 18:26) La wakat ninga, b tolgd n togs n welgame.

Yʋʋm kobs sẽn deng a Zeezi rogmã, Israyɛll nebã welga yʋngã babs a tãabo, n da boond tɩ “yʋng gũudum wakate.” (Wiis. 2:19) Bʋ-kaoodb 7:19 wã pʋgẽ, b gomda ‘yʋn-sʋk’ yelle, n yetẽ tɩ “yaa wakat ninga b sẽn tekd gũudbã.” La a Zeezi rogmã wakat tɩ zʋɩf-rãmbã ra welga yʋngã babs a naas masã, wa gɛrk-rãmbã la Rom nebã.

Evãnzill-dãmbã pʋgẽ, b gomda yʋngã wakat kãens yell naoor wʋsgo. Wala makre, yaa “beoogã sẽn waa n kolg vẽegre,” sẽn yaa yʋngã babg a naas-n-soabã wakat la a Zeezi sẽn kẽn koomã zug n babs a karen-biisã sẽn da be koglg pʋgẽ wã. (Mat. 14:25) A Zeezi yel-bũnd a ye pʋgẽ me, a yeelame tɩ “yir soab sã n dag n bãngẽ wagdr sẽn na n wa yʋngã wakat ninga, a dag n na n gũume la a ka na n bas-a t’a poog a roogã ye.”—Mat. 24:43.

A Zeezi goma yʋngã babg a naasã fãa yelle, a sẽn wa n sagend a karen-biisã tɩ b wɩng ne gũubã. A yeel-b lame yaa: “Yãmb ka mi wakat ning yirã soab sẽn na n wa wã ye. Tõe n yɩɩ zĩ-sobdo, wall yʋn-sʋka, wall no-kɛleng wakate, wall yibeoogo.” (Mark 13:35) ‘Zĩ-sobdã’ bɩ yʋng pipi babgã sɩngda wĩndgã lʋɩɩse, n tɩ tãag yʋng wakat a wɛ wã. ‘Yʋn-sʋkã’ bɩ babg a yiib-n-soabã sɩngda yʋng wakat a wɛ wã, n tãag yʋng midi. ‘No-kɛleng wakatã’ sẽn yaa babg a tãab-n-soabã sɩngda yʋng midi, n tãag tõd-beoog wakat a 3. Yʋng ning b sẽn wa n yõk a Zeezi wã, wõnda yaa yʋngã babg a tãab-n-soabã sasa la no-raoog sẽn kelmã. (Mark 14:72) ‘Yi-beoogã’ bɩ yʋngã babg a naas-n-soabã yaa tõd-beoog wakat a 3 n tãag wĩndgã pukri.

Dẽnd baa b sẽn da pa tar monta wa rũndã-rũndã wã, bãmb me sã n da rat n togs ned wakatã, b ra tara b sẽn yete.