RAO yʋʋr sẽn boond t’a Alɛn * yik n tɩ bee tiging sẽn be kilo 1400 zĩigẽ ne a sẽn da be tẽng ningã. Ad a sẽn yeele: “M sẽn wa n wat ka wã, rabeem n da tar-ma. M da pa mi m sã n na n paama zo-rãmba, wall tigingã neb sã n na n nonga m zĩigẽ ye.”

Yãmb me sã n toeema tiginga, tõe tɩ rabeem tar-y lame. Bõe n na n sõng-y tɩ y wa minim y tigin-paallã? Yɩl n minimã sã n yaa toog n yɩɩd y sẽn da tẽedã, y maanda wãna? Y sã n pa toeem tiging me, bõe la y tõe n maan n sõng sẽn wa-b yãmb tigingã pʋgẽ paalmã?

D rɩk makre. B sã n võog tɩɩg n tɩ sel zĩig a to, namsda tɩɩgã bilfu. Naoor wʋsgo, b sã n võog tɩɩga, pa tõe tɩ yẽgã fãa tũ ye. B sã n tɩ sel-a, yaa tɩlɛ tɩ tɩɩgã le pus yẽga. Yãmb me sẽn toeem tigingã, tõe tɩ nams-y-la bilfu. Y pĩnd tigingã pʋgẽ, y ra paama zo-rãmba, la y ra tar bũmb kẽer y sẽn minim n maand a Zeova tũudmã pʋgẽ. Y ra yaa wa tɩɩg sẽn kɩ yẽga. Y sẽn toeem tigingã, y yaa wa tɩɩg sẽn tog n le pus yẽga. Yaa tɩlɛ tɩ y modg n minim y tigin-paallã. Rẽ la y na n paam sũ-noogo. Bõe n na n sõng-yã? Biiblã saglsã tũubu. Ad sagls a wãna:

Ned sẽn karemd Wẽnnaam Gomdã daar fãa yaa “wa tɩɩg sẽn be kʋɩlg noore, n womd a biis a womb wakate, t’a vãadã ka tol n kʋɩtẽ ye. Yẽnda paamda tõogr bũmb ning fãa a sẽn maandã pʋga.”—Yɩɩn. 1:1-3.

Yaa tɩlɛ ne tɩɩg t’a paamd koom wakat fãa sẽn na yɩl n da kʋɩ ye. Woto me, kiris-ned segd n karemda Wẽnnaam Gomdã wakat fãa, n tõog n kell n tall zood sõma ne Wẽnnaam. Rẽ wã, ket-y n karemd-y Biiblã daar fãa, la y kẽnd tigissã n pa vaandẽ ye. Ket-y n wɩngd-y ne zak pʋgẽ Biibl zãmsgã, la y zãmsd Biiblã y yembr me. Yaa tɩlɛ tɩ y ket n maand bũmb nins fãa y sẽn da maand y tẽebã kengr yĩng y sẽn wa n be y pĩnd tigingẽ wã.

“Sẽn kõt-a koom me na n paama koom n yũ n tɩge.”—Yel. 11:25.

Y sã n nong n yit koɛɛgã mooneg ne y tigin-paallã neba, na n kenga y pɛlga, la sõng-y tɩ y minim-b tao-tao. A Kevin sẽn yaa kãsem-soabã yeelame: “Maam ne m pagã sẽn ta tigingã pʋgẽ paalmã, bũmb sẽn sõng tõnd n tɩ yɩɩd yaa d sẽn dɩk sõngr so-pakrã tao-tao wã. Kɩtame tɩ pa kaoos la d bãng saam-biisã, sẽn yaa-b so-pakdbã, la moonegã zĩigẽ nebã.” A Rooze me yaa saam-biig sẽn yik n kẽng tiging sẽn be sẽn yɩɩd kilo 1600 zĩigẽ. A yeelame: “Ned sã n dat n minim tigin-paalga, bũmb sẽn na n sõng-a n tɩ yɩɩd yaa a sẽn na n wae n yit koe-moonegã. Maan-y tɩ kãsem-dãmbã bãng tɩ sẽn wa n yaa tʋʋmd ning fãa la b rat tɩ ned tʋme, b tõe n togs-y lame. Wala makre, y tõe n sõngd n pɩɩsda Rĩungã roogo, n mi n ledg ned n wɛgs sõsga, pa rẽ bɩ n tɩ rɩk ned t’a wa tigsgã. Y tẽed-n-taasã sã n neẽ tɩ baa y sẽn nan wa paalmã, y sakd n mongda y meng n sõngd y taabã, b na n nonga y zĩigẽ.”

‘Pak-y y sũurã yalengo.’—2 Kor. 6:13, Sebr Sõngo.

Pak-y y sũurã yaleng n nong y tẽed-n-taasã. A Melisa ne a zakã rãmb sẽn wa n toeem tigingã, b yãka yam n na n yõg zood ne tigin-paallã neba. Ad a sẽn yeele: “Nand tɩ tigissã sɩnge, la tigissã poore, d sõsda ne nebã. Sõngdame tɩ d paam n sõs sõma,  tɩ pa d we n pʋʋs taab bal ye.” Kɩtame me tɩ b zakã rãmb bãng tigingã neb yʋy tao-tao. Sẽn paase, b ra mi n boonda tigingã neb tɩ b naagd taab n kokd pemsem, tɩ rẽ paasd b zoodã. A Melisa paasame: “D kõ-b-la d nimero-rãmbã, tɩ bãmb me kõ tõnd b rẽndã. Kɩtame tɩ b sã n wa rat n naag taab n maan bũmbu, yaa tũudmã yĩng tɩ yaa bũmb a to, b boonda tõndo.”

Y sẽn na n wa tɩ be ne neb y sẽn pa mi wã sã n kẽesd-y-la rabeem, bãng-y tɩ y tõe n sɩnga bilf-bilfu. Wala makre, yõgemd-y y noor ne nebã, baa y yam ka laado. Y nengã sã n be laado, nebã na n baoo y zĩigẽ. Sɩd me, Biiblã yeelame: “Ned sã n yõgemd a noor ne foom, a noogda f sũuri.” (Yel. 15:30) Saam-bi-poak a Rasɛll yik n tɩ bee zĩig sẽn zãr ne tẽng ning a sẽn zĩnd n tãag a bɩʋʋngã. Ad a sẽn yeele: “Mam yaa yãn-zoɛta. Wakat ninga, yɩl n sõs ne m tigin-paallã nebã, yaa tɩlɛ tɩ m wõr m menga. M geta Rĩungã roogẽ, n bao ned sẽn zĩ n pa sõsd ne neda. M ningda m yamẽ tɩ tõe t’a soab yaa yãn-zoɛt wa maam.” Y tõe n yãka yam tɩ nand tɩ tigsg sɩng wall tigsg poor bɩ y sõs ne ned y sẽn zɩ n sõs ne. Mak-y n ges-y!

La sã n mik tɩ y sẽn na n paam n yõg zood ne neb y sẽn pa mi wã nooma yãmba? Tõe tɩ semen a wãn pʋgẽ, y sũur na n yɩɩ noogo. La tarẽ-n-tarẽ, y tõeeme n wa pa le baood nebã zĩigẽ ye. Wakat kãnga, yaa tɩlɛ tɩ y ket n maood n baood neb a taab zoodo.

B sã n võog tɩɩg n tɩ sel zĩig a to, tõe n kaoosame t’a yaool n kɩ yẽg sõma. Woto me, nina sã n toeem tiginga, kaoosdame t’a yaool n minimi. Y sã n toeema tiging tɩ kaoos tɩ y ket n pa minimi, sagls n be Biiblã pʋgẽ n tõe n sõng-yã. Ad sagls a wãna:

“Bɩ d da yɛ ne tʋʋm-sõama maaneg ye. Bala, wakat sã n ta, tõnd na n tigsame, a sã n yaa tɩ tõnd ka bas n vʋʋs ye.”—Gal. 6:9.

Baa y sã n getame tɩ yɩl n minimã kaoosd n yɩɩda y sẽn da tẽedã, bɩ y kell n maan sũ-mare, n bas tɩ kaoos bilfu. Wala makre, misioneer-dãmb wʋsg paada b sẽn tʋm-b zĩig ningã n maan yʋʋm a wãn n yaool n tɩ ges b ba-yir dãmbã. Woto sõngd-b lame tɩ b minim tẽngã neb vɩɩmã, la b yõg zood sõma ne beenẽ saam-biisi.

A Alehãndro toeema tiging naoor wʋsgo. A sak n deegame tɩ ned pa tõe n wõr yɛlã, tɩ minungã yɩ tao-tao ye. Ad a sẽn yeele: “So-kãnga wã, mam pagã yeelame yaa: ‘Mam zo-rãmbã fãa bee tõnd pĩnd tigingẽ wã!’” A tẽega a pagã tɩ b sẽn wa n na n toeem tiging yʋʋm a yiib sẽn loogã, a ra yeela woto bal kɛpɩ. La yʋʋm a yiibã pʋgẽ, a tõog n yõga zood ne neb a taaba, hal tɩ neb a sẽn da pa mi lebg a zo-rãmb meng-menga.

“Bɩ f ra sok tɩ yaa wãn tɩ wakat sẽn loog poorẽ wã yaa sõama n yɩɩd moasã ye. Bala, fo sã n sok woto, ka yam sokr ye.”—Koɛ. 7:10.

Ra mak-y y tigin-paallã ne tigin-kʋdrã ye. Wala makre, tõe tɩ tigin-paallã neb nonga sõsg n yɩɩd y pĩnd tigingã nebã, wall b pa tolg n kẽed nebã woto ye. Yɩta sõma tɩ y get b zʋg-sõma wã n yɩɩda, wa yãmb me sẽn dat tɩ b get y zʋg-sõma wã. Kẽer sẽn toeem tiging wa n pa bãng la b sok b meng yaa: ‘Rẽ yĩnga, mam sɩd nonga “ba-biisã” fãa sɩda?’—1 Pɩy. 2:17.

 “Mam yeta yãmb tɩ y kose la b na kõ yãmba.”—Luk 11:9.

Ket-y n pʋʋsd n kot sõngre. A Davɩɩd yaa kãsem-soaba. Ad a sẽn yeel rẽ wɛɛngẽ: “Ra tags-y tɩ y na n tõoga ne y meng pãng ye. Bũmb wʋsg d sẽn tõogd n maandẽ yaa ne a Zeova sõngr bala. Pʋʋs-y-yã-a n togs yellã!” A Rasɛll, pag ning yell d sẽn zoe n gomã yeelame: “Maam ne m sɩdã sã n wa getẽ tɩ yaa wa d pa tigingã neba, d pʋʋsda a Zeova n yeel-a t’a sõng-d tɩ d bãng sã n pa tõnd n maand bũmb sẽn kɩt tɩ yaa toog ne nebã tɩ b nong d zĩigẽ. Rẽ poore, d modgdame n bao weer n naag tigingã neb n maan bũmb kẽere.”

Roagdba, sã n yaa toog ne y kambã tɩ b minim tigin-paallã bɩ y naag-b n pʋʋs a Zeova, n togs-a yellã. Bao-y segb n mi n naag neb kẽer n kok pemsem, tɩ sõng y kambã tɩ b paam zo-rãmba.

Bõe la y tõe n maan n sõng neb sẽn wa y tigingã pʋgẽ paalem? Tall-y manesem sẽn wilgd tɩ y yaa b zoa, hal baa b waoongã paalem. Sẽn na yɩl n bãng y sẽn tõe n maanega, sok-y y meng n ges sã n da yaa yãmba, bõe la y na n dat tɩ b maan n kõ-yã. (Mat. 7:12) Y tõe n bool-b lame tɩ b wa naag yãmb ne y zakã rãmb n maan y zak pʋgẽ Biibl zãmsgã, wall n ges JW Télédiffusion wã. Y tõe n tũu taab me n moon koɛɛgã. Y sã n bool-b tɩ b wa tɩ y naag taab n dɩ, b kõn tol n yĩm ye. Bõe me la y tõe n maan n sõng neb sẽn nan wa y tigingã pʋgẽ paalem?

Rao a ye yʋʋr sẽn boond t’a Karlos yeelame: “Tõnd sẽn ta tigingã pʋgẽ paalmã, saam-bi-poak n bao sebr n gʋls zĩis nins d sẽn tõe n paam teed n da no-noogã, n kõ tõndo. Sõnga tõnd hal wʋsgo.” Sẽn wa-b paalmã sẽn yiẽ wã tʋʋlg bɩ waood sã n pa ta yãmb sẽn beẽ wã, b sũy na n yɩɩ noogo, y sã n sõng-b tɩ b bãng fut nins b sẽn na n ning tɩ zemsã. Y tõeeme me n togs-b tẽngã neb kʋdemdã yɛl kẽere, wall b tũudmã yɛl sãnda. Woto na n sõng-b lame tɩ koe-moonegã sasa bɩ b tõog tɩ b goamã kẽ nebã.

A Alɛn, rao ning yell d sẽn gom hal sɩngrẽ wã sẽn toeem tigingã yɩɩda yʋʋmde. A yeelame: “Sɩngrẽ wã, yɩɩ tɩlɛ tɩ m wõr m meng n sõs ne m tẽed-n-taasã, n bao n bãng-b sõma. La masã wã, m neeme tɩ d sɩd yaa wa zak a ye neba, tɩ m sũur noomẽ.” A Alɛn bãngame tɩ baa a sẽn toeem tigingã, pa kɩt tɩ yẽ ne a pĩnd zo-rãmbã zood sãam ye. A pʋd n paama zo-rãmb n paase, hal tɩ tõe tɩ b zoodã kaoos b yõor tɛka.