ನಾವು ಇನ್ನೊಬ್ರಿಗೆ ಸಹಾಯ ಮಾಡಲು ಯಾವಾಗಲು ತಯಾರಿರಬೇಕಂತ ಬೈಬಲ್‌ ಉತ್ತೇಜಿಸುತ್ತೆ. ಆದ್ರೆ ಇದನ್ನ ನಾವು ಖುಷಿ-ಖುಷಿಯಿಂದ, ಸರಿಯಾದ ಮನೋಭಾವದಿಂದ ಮಾಡಬೇಕು. ಇದ್ರಿಂದ ಕೊಡುವವರಿಗೂ ತಗೊಳ್ಳುವವರಿಗೂ ಇಬ್ಬರಿಗೂ ಖುಷಿ ಸಿಗುತ್ತೆ. (ಜ್ಞಾನೋಕ್ತಿ 11:25; ಲೂಕ 6:38) ಯೇಸು, “ತೆಗೆದುಕೊಳ್ಳುವುದಕ್ಕಿಂತಲೂ ಕೊಡುವುದರಲ್ಲಿ ಹೆಚ್ಚಿನ ಸಂತೋಷವಿದೆ” ಅಂತ ಹೇಳಿದ.—ಅಪೊಸ್ತಲರ ಕಾರ್ಯ 20:35.

•  ನಾವು ಯಾವ ರೀತಿ ಸಹಾಯ ಮಾಡಿದ್ರೆ ದೇವರಿಗೆ ಖುಷಿಯಾಗುತ್ತೆ?

•  ನಾವು ಯಾವ ರೀತಿ ಸಹಾಯ ಮಾಡಿದ್ರೆ ದೇವರಿಗೆ ಇಷ್ಟ ಆಗಲ್ಲ?

•  ಬೇರೆಯವರಿಗೆ ಸಹಾಯ ಮಾಡೋದ್ರ ಬಗ್ಗೆ ಬೈಬಲಿನ ಕೆಲವು ವಚನಗಳು

 ನಾವು ಬೇರೆಯವರಿಗೆ ಮನಸ್ಸಾರೆ ಸಹಾಯ ಮಾಡಿದ್ರೆ ದೇವರಿಗೆ ಖುಷಿಯಾಗುತ್ತೆ. ಬೈಬಲ್‌ ಹೀಗೆ ಹೇಳುತ್ತೆ: “ಪ್ರತಿಯೊಬ್ಬನು ಒಲ್ಲದ ಮನಸ್ಸಿನಿಂದಾಗಲಿ ಒತ್ತಾಯದಿಂದಾಗಲಿ ಮಾಡದೆ ತನ್ನ ಹೃದಯದಲ್ಲಿ ನಿರ್ಣಯಿಸಿಕೊಂಡಿರುವ ಪ್ರಕಾರವೇ ಮಾಡಲಿ; ಏಕೆಂದರೆ ಸಂತೋಷದಿಂದ ಕೊಡುವವನನ್ನು ದೇವರು ಪ್ರೀತಿಸುತ್ತಾನೆ.”—2 ಕೊರಿಂಥ 9:7.

 ನಾವು ಅಗತ್ಯ ಇರುವವರಿಗೆ ಮನಸ್ಸಾರೆ ಸಹಾಯ ಮಾಡಿದ್ರೆ ದೇವರು ನಮ್ಮ ಆರಾಧನೆಯನ್ನ ಸ್ವೀಕರಿಸ್ತಾನೆ. (ಯಾಕೋಬ 1:27) ಇನ್ನೊಬ್ರಿಗೆ ಸಹಾಯ ಮಾಡುವ, ಉದಾರವಾಗಿ ಕೊಡುವ ವ್ಯಕ್ತಿಯನ್ನ ಕಂಡ್ರೆ ದೇವರಿಗೆ ಖುಷಿಯಾಗುತ್ತೆ. ಅಂಥ ವ್ಯಕ್ತಿ ತನಗೆ ಸಾಲ ಕೊಟ್ಟ ಹಾಗೆ ಅಂತ ದೇವರು ಎಣಿಸ್ತಾನೆ. (ಜ್ಞಾನೋಕ್ತಿ 19:17) ಸ್ವತಃ ದೇವರೇ ಅದನ್ನ ಅವನಿಗೆ ಹಿಂತಿರುಗಿಸ್ತಾನೆ ಅಂತ ಬೈಬಲ್‌ ಹೇಳುತ್ತೆ.—ಲೂಕ 14:12-14.

 ಸ್ವಾರ್ಥ ಉದ್ದೇಶ ಇಟ್ಟುಕೊಂಡು ಸಹಾಯ ಮಾಡಿದ್ರೆ ದೇವರಿಗೆ ಇಷ್ಟ ಆಗಲ್ಲ. ಉದಾಹರಣೆಗೆ:

•   ಜನರನ್ನ ಮೆಚ್ಚಿಸೋಕೆ ಅಂತ.—ಮತ್ತಾಯ 6:2.

•   ವಾಪಸ್‌ ಏನಾದ್ರು ಸಿಗುತ್ತೆ ಅಂತ.—ಲೂಕ 14:12-14.

•   ಕೆಟ್ಟ ವಿಷಯಗಳಿಂದ ಮುಕ್ತಿ ಪಡೆಯೋಕೆ ಅಂತ.—ಕೀರ್ತನೆ 49:6, 7.

 ದೇವರಿಗೆ ಇಷ್ಟವಿಲ್ಲದ ವಿಷಯಗಳಿಗೆ ಸಹಾಯ ಮಾಡೋದು. ಉದಾಹರಣೆಗೆ, ಜೂಜಾಟ ಆಡಲು, ಡ್ರಗ್ಸ್‌ ತಗೊಳ್ಳಲು, ಕುಡಿಕತನಕ್ಕೆ ಬೀಳಲು ಒಬ್ರಿಗೆ ಹಣ ಕೊಡೋದು ತಪ್ಪು. (1 ಕೊರಿಂಥ 6:9, 10; 2 ಕೊರಿಂಥ 7:1) ಅದೇರೀತಿ ದುಡಿಯೋಕೆ ಸಾಮರ್ಥ್ಯ ಇದ್ದು ಕೆಲಸ ಮಾಡದವನಿಗೆ ಹಣ ಕೊಡೋದು ತಪ್ಪು.—2 ಥೆಸಲೊನೀಕ 3:10.

 ನಮ್ಮ ಕುಟುಂಬಕ್ಕೆ ಕೊಡೋದನ್ನ ಬಿಟ್ಟು ಬೇರೆಯವರಿಗೆ ಸಹಾಯ ಮಾಡೋದು. ಕುಟುಂಬದ ಯಜಮಾನನು ತನ್ನ ಕುಟುಂಬದ ಅಗತ್ಯಗಳನ್ನ ಪೂರೈಸಬೇಕು ಅಂತ ಬೈಬಲ್‌ ಹೇಳುತ್ತೆ. (1 ತಿಮೊತಿ 5:8) ಬೇರೆಯವರಿಗೆ ತುಂಬ ಸಹಾಯ ಮಾಡ್ತಾ, ಸಿಕಪಟ್ಟೆ ದಾನ ಮಾಡ್ತಾ ತನ್ನ ಕುಟುಂಬವನ್ನ ಕಷ್ಟಕ್ಕೆ ಸಿಕ್ಸಿಹಾಕಿಸಿದ್ರೆ ಅದು ಸರಿಯಲ್ಲ. ಈ ರೀತಿ ತಮ್ಮ ಆಸ್ತಿಯನ್ನೆಲ್ಲ ದೇವರಿಗೆ ದಾನ ಮಾಡ್ತೀವಿ ಅಂತ ಹೇಳಿ ವಯಸ್ಸಾದ ಅಪ್ಪ-ಅಮ್ಮನ ನೋಡಿಕೊಳ್ಳದೆ ಇದ್ದವರನ್ನ ಯೇಸು ಖಂಡಿಸಿದನು.—ಮಾರ್ಕ 7:9-13.