Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 40

Devidi avọ Goliat

Devidi avọ Goliat

Jihova ọ ta kẹ Samuẹle nọ: ‘Kpobọ uwou Jẹsi. Ọmọzae riẹ jọ ọ te jọ ovie avivẹ Izrẹl.’ Fikiere Samuẹle o te kpobọ uwou Jẹsi. Nọ ọ ruẹ ọmọ ọkpako Jẹsi, o te roro nọ: ‘Ọnana họ ọnọ ọ te jọ ovie na.’ Rekọ Jihova ọ tẹ ta kẹ Samuẹle nọ, ọna ọ salọ họ. Jihova ọ tẹ ta nọ: ‘Udu ohwo me re rri, orọnikọ erru oma riẹ hẹ.’

Jẹsi o te dhesẹ emezae ezeza efa nọ o wo kẹ Samuẹle. Rekọ Samuẹle ọ tẹ ta nọ: ‘Jihova ọ salọ ọvuọvo ho. Kọ who wo emezae efa?’ Jẹsi ọ tẹ ta nọ: ‘Ọvo jọ o gbe kiọkọ, ọrọ ọmaha kpobi nọ a re se Devidi. Ọ rrọ obọ ẹwọ be rẹrote igodẹ mẹ.’ Nọ a se Devidi ze, Jihova ọ tẹ ta kẹ Samuẹle nọ: ‘Ọna mẹ salọ!’ Samuẹle o te ku ewhri họ Devidi uzou, onọ u dhesẹ nọ Devidi ọ te jọ ovie Izrẹl evaọ obaro.

Nọ oke jọ o vrẹ no, emọ Izrẹl a te je lele ahwo Filistia fi ẹmo. Whaọ ahwo Filistia a wo ọgwara jọ nọ a re se Goliat. Kẹdẹ kẹdẹ Goliat o je se emọ Izrẹl ẹkoko. O ve bo nọ: ‘Wha vi ohwo jọ ze re o lele omẹ họre. Ohwo na ọ tẹ sai kpe omẹ, ma vẹ jọ erigbo rai. Rekọ me te kpe ohwo na, wha vẹ jọ erigbo mai.’

Ẹdẹjọ Devidi ọ tẹ wọ emu se inievo riẹ nọ e jọ isoja evaọ obọ ẹmo na. Nọ Devidi o yo ẹkoko nọ Goliat o bi se ahwo Izrẹl, ọ tẹ ta nọ: ‘Me ti lele iei họre!’ Sọl ọ tẹ ta kẹe nọ: ‘Whẹ yọ ọmọboba gheghe.’ Devidi ọ tẹ ta nọ: ‘Jihova o ti fiobọhọ kẹ omẹ.’

 Sọl ọ kaki ku ewu ẹmo riẹ fihọ Devidi oma, rekọ Devidi ọ tẹ ta nọ: ‘Mẹ sae rọ ewu nana họre he.’ Devidi ọ tẹ tọlọ urọba riẹ, ọ tẹ dhẹ kpohọ oria nọ ame ọ rrọ. Ọ tẹ tọlọ ibitho isoi nọ e rrọ riẹriẹriẹ fihọ ẹmẹkpa riẹ. Kẹsena Devidi ọ tẹ be dhẹ bru Goliat. Goliat o te bo nọ: ‘Whẹ yọ ọmọboba gheghe. Mẹ te rọ owhẹ kẹ emevra gbe erao ẹwọ re a re owhẹ no.’ Ozọ u mu Devidi hi. Devidi ọ tẹ ta kẹ Goliat nọ: ‘Ọgbọdọ avọ ozuẹ who bi ro bru omẹ ze, rekọ odẹ Jihova me bi ro bru owhẹ tha. Orọnọ mai whọ be họre he, rekọ Ọghẹnẹ mai whọ be họre na. Ahwo kpobi nọ a rrọ etenẹ a te riẹ nọ Jihova o wo ogaga vi ọgbọdọ hayo ozuẹ. Jihova ọ te rehọ owhai kpobi kẹ omai.’

Devidi o te fi ubiutho họ urọba rie, ọ jẹ rọ ẹgba riẹ kpobi veghe iei. Avọ obufihọ Jihova, ubiutho na u te ki aruezo Goliat jẹ nya ruẹe eva. Goliat ọgwara na o te kie fihọ otọ je whu. Devidi ọ tẹ dhẹ te Goliat oma, ọ tẹ rọ ọgbọdọ obọ Goliat kpei no. Ahwo Filistia a te muhọ ẹdhẹ. Kọ who fievahọ Jihova wọhọ epanọ Devidi o ru na?

“Rọkẹ ahwo, onana yọ oware nọ a rẹ sai ru hu, rekọ o rrọ ere kẹ Ọghẹnẹ hẹ, keme Ọghẹnẹ ọ rẹ sai ru eware kpobi.”​—Mak 10:27