Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 69

Gebriẹl Ọ Nyabru Meri

Gebriẹl Ọ Nyabru Meri

Ẹlizabẹt o wo omoni jọ nọ a re se Meri, yọ Meri ọ jẹ rria ẹwho Nazarẹt evaọ Galili. Ọzae jọ nọ o re ru iruo ekapenta nọ a re se Josẹf ọ sa Meri họ otọ. Nọ Ẹlizabẹt o dihọ te emerae ezeza no, Gebriẹl ọ tẹ romavia kẹ Meri. Enjẹle na ọ tẹ ta kẹ Meri nọ: ‘Do Meri. Who wo aruoriwo evaọ aro Jihova.’ Rekọ Meri o wo otoriẹ ẹme nọ Gebriẹl ọ ta kẹe na ha. Gebriẹl ọ tẹ ta kẹ Meri nọ: ‘Who re ti dihọ who ve yẹ ọmọzae, who ve se odẹ riẹ Jesu. Ọ te jọ ovie, yọ uvie riẹ o te jọ bẹdẹ bẹdẹ.’

Meri ọ tẹ ta nọ: ‘Rekọ me wo ọzae he. Kọ ẹvẹ mẹ te sai ro dihọ?’ Gebriẹl ọ tẹ ta kẹe nọ: ‘Oware ovo o rẹ bẹ Jihova eruo ho. Ẹzi Ọghẹnẹ ọ te ruọ owhẹ oma, whọ vẹ te rọ ẹkwoma riẹ dihọ, who ve ti yẹ ọmọzae. Ẹlizabẹt omoni ra o dihọ no re.’ Meri ọ tẹ ta kẹe nọ: ‘Mẹ yọ odibo ọmọtẹ Jihova. Jọ o via kẹ omẹ epanọ whọ ta na.’

 Meri o te weze bru Ẹlizabẹt. Nọ Meri o yere Ẹlizabẹt, ọmọ nọ ọ rrọ eva Ẹlizabẹt na o te nuhu oma. Ẹzi Ọghẹnẹ ọ tẹ vọ Ẹlizabẹt oma ọ tẹ ta nọ: ‘Meri, Jihova ọ ghale owhẹ no. Ọghọ riẹ ọ rro kẹhẹ re oni Olori mẹ o weze bru omẹ ze.’ Meri ọ tẹ ta nọ: ‘Mẹ rehọ eva mẹ kpobi jiri Jihova.’ Nọ Meri o lele Ẹlizabẹt rria te emerae ezeza no, o te zihe kpobọ Nazarẹt ẹwho riẹ.

Whaọ nọ Josẹf ọ riẹ nọ Meri o dihọ no, ọ gbẹ gwọlọ nọ ọ rẹ rehọ iẹe he. Rekọ enjẹle ọ tẹ romavia kẹe evaọ ewezẹ jẹ ta kẹe nọ: ‘Ozọ u mu owhẹ hẹ, ruigho họ Meri, keme o ru oware ovo thọ họ.’ Fikiere Josẹf o te ruigho họ Meri, jẹ rehọ iẹe ze obọ uwou riẹ.

“Koware koware nọ o were ỌNOWO oye o re ruẹ eva odhiwu gbe akpọ.”​—Olezi 135:6