Nọ Jesu o whu no, ọdafe jọ nọ a re se Josẹf ọ tẹ nyabru Pailet re ọ kẹe uvẹ wọ ori Jesu no ure-oja na nyai ki. Josẹf ọ tẹ rehọ ehọ elọlọhọ variẹ ori Jesu je ku idẹ gbe eware efa nọ i re gbo ore awere họ ori na, a tẹ wọe fihọ eghogho utho nọ a ri ki ohwo ọvuọvo fihọ họ. A te ghelie utho ulogbo ruru eghogho na. Ilori izerẹ na a tẹ ta kẹ Pailet nọ: ‘O wọhọ nọ ilele Jesu a te nyae wọ ori Jesu si no, a vẹ te ta nọ Jesu ọ kparoma no.’ Pailet ọ tẹ ta kẹ ae nọ: ‘Wha nyae ralọ unu uki na di, je fi isoja họ iẹe.’

Nọ edesa e vrẹ no, eyae jọ a tẹ nya kpobọ uki na evaọ ohiohiẹ, a tẹ ruẹ nọ a ghelie utho na no unu uki na no. Enjẹle jọ nọ ọ jọ evaọ uki na ọ tẹ ta kẹ eyae na nọ: ‘Ozọ u mu owhai hi, Jesu ọ kparoma no. Wha nyae vuẹ ilele riẹ re a nyae ruẹ e riẹ evaọ obọ Galili.’

Meri Magdalini ọ tẹ dhẹ nyae gwọlọ Pita avọ Jọn. Ọ tẹ ta kẹ ae nọ: ‘Ohwo jọ ọ wọ ori Jesu rehọ no!’ Pita avọ Jọn a tẹ dhẹ kpobọ uki na. Nọ a ruẹ nọ uki na o rrọ ofofe, a te zihe kpobọ iwou rai.

Nọ Meri o zihe kpobọ uki na, ọ tẹ ruẹ ijẹle evaọ eva uki na, ọ tẹ vuẹ ae nọ: ‘Mẹ riẹ obonọ a wọ Olori mẹ nya ha.’ Nọ o kuomarẹriẹ ọ tẹ ruẹ ọzae jọ, o te roro nọ ọzae na yọ ohwo nọ ọ be rẹrote ọgbọ na. Meri ọ tẹ ta kẹe nọ: ‘Ọga, ivie dhesẹ oria nọ whọ wọ ori na fihọ kẹ omẹ.’ Rekọ nọ ọzae na o sei nọ “Meri!” ọ tẹ nwane riẹ nọ Jesu. O te bo nọ: “Owuhrẹ!” jẹ gbalọ Jesu. Jesu ọ tẹ ta kẹe nọ: ‘Nyae vuẹ inievo mẹ inọ whọ ruẹ omẹ no.’ Meri ọ tẹ nwane dhẹ bru ilele Jesu, ọ tẹ ta kẹ ae nọ ọ ruẹ Jesu no.

Evaọ owọwọ ẹdẹ yena, ilele ivẹ Jesu jọ a te je no obọ Jerusalẹm kpobọ ẹwho jọ nọ a re se Emeọs. Ọzae jọ o te kuomagbe ai evaọ edhere na, ọ tẹ nọ ae oware nọ a jẹ ta kpahe. A tẹ ta kẹe nọ: ‘Kọ who ri yo? Edẹ esa nọ e vrẹ, ilori izerẹ a kpe Jesu. Obọnana eyae jọ a be ta nọ Jesu ọ kparoma no!’ Ọzae na ọ tẹ nọ ae nọ: ‘Kọ wha  rọwo eme nọ eruẹaro na a ta? Eruẹaro na a ta nọ Kristi o ti whu, ọ vẹ te kparoma.’ Ọzae na ọ tẹ gbẹ be fotọ Ikereakere na kẹ ae. Nọ a te Emeọs no, ilele na a tẹ ta kẹ ọzae na nọ ọ jọ kugbe ai. Nọ a jẹ re emu, ọzae na ọ tẹ lẹ fihọ ebrẹdi na, a tẹ nwane riẹ nọ Jesu. Ẹsiẹvo na a gbẹ ruẹ Jesu hu.

Ilele ivẹ na a te siawọ zihe kpobọ uwou nọ ikọ na a kokohọ evaọ obọ Jerusalẹm, a tẹ vuẹ ae eware nọ e via kpobi. Nọ aikpobi a gbẹ rrọ evaọ uwou na, Jesu ọ tẹ romavia kẹ ae. Ikọ na a jẹ kake rọwo nọ yọ Jesu hu. Ọ tẹ ta kẹ ae nọ: ‘Wha rri abọ mẹ, wha dhobọte omẹ. A kere nọ Kristi ọ rẹ te kparoma no uwhu ze.’

“Mẹ họ edhere na gbe uzẹme na gbe uzuazọ na. Ohwo ọvo ọ rẹ nya bru Ọsẹ na ze he ajokpaọ ẹkwoma mẹ.”​—Jọn 14:6