Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 75

Ẹdhọ Ọ Dawo Jesu

Ẹdhọ Ọ Dawo Jesu

Nọ Jesu ọ nwane họ-ame no, ẹzi ọfuafo na ọ tẹ kpọe kpobọ udhude. Evaọ edẹ udhuvẹ (40) soso ọ re emu vievie he, ohọo u te je kpei gaga. Fikiere Ẹdhọ ọ tẹ nyaze te dawo Jesu, ọ tẹ ta kẹ Jesu nọ: ‘Otẹrọnọ whẹ yọ Ọmọ Ọghẹnẹ, ta kẹ itho nana re i zihe ruọ ebrẹdi.’ Rekọ Jesu ọ tẹ rọ Ikereakere na kpahe kẹe nọ: ‘A kere nọ orọnikọ fiki emu ọvo ohwo ọ rẹ rọ jọ uzuazọ họ. O gwọlọ nọ ohwo ọ rẹ gaviezọ kẹ ẹme kpobi nọ Jihova ọ ta.’

Ẹdhọ ọ tẹ wariẹ dawo Jesu inọ: ‘Otẹrọnọ whẹ yọ Ọmọ Ọghẹnẹ, la no ehru oria nọ o mai kpehru evaọ etẹmpol na fihọ otọ. A kere nọ Ọghẹnẹ o ti vi ijẹle riẹ ze te ja owhẹ.’ Rekọ Jesu ọ tẹ wariẹ ta ẹme no Ikereakere na ze inọ: ‘A kere nọ whọ rẹ dawo Jihova Ọghẹnẹ ra vievie he.’

Kẹsena Setan o te dhesẹ esuo akpọ na kpobi avọ efe gbe oruaro rai kẹ Jesu, ọ tẹ ta kẹe nọ: ‘Mẹ te rọ esuo akpọ nana kpobi avọ oruaro rai kẹ owhẹ otẹrọnọ who kigwẹ gọ omẹ.’ Jesu ọ tẹ ta kẹe nọ: ‘Nyavrẹ, Setan! A kere nọ Jihova Ọghẹnẹ ra ọvo whọ rẹ gọ.’

Ẹdhọ ọ tẹ nyase iẹe ba, ijẹle e tẹ wọ emu se Jesu inọ ọ re. No umuo oke yena vrẹ, Jesu o te mu usiuwoma họ ẹta kpahe Uvie Ọghẹnẹ. Iruo nana Ọghẹnẹ o vi rie ze ti ru evaọ otọakpọ. Eware nọ Jesu o je wuhrẹ e jẹ were ahwo gaga, fikiere ahwo a je lele iei kpohọ oria kpobi nọ ọ jẹ nya.

“[Nọ Ẹdhọ] ọ tẹ be ta ọrue ọ rẹ tae epaọ ẹkoma riẹ, keme ọtọrue ọ rrọ gbe ọsẹ ọrue.”​—Jọn 8:44