Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 80

Jesu Ọ Salọ Ikọ Ikpegbivẹ

Jesu Ọ Salọ Ikọ Ikpegbivẹ

Nọ Jesu ọ ta usiuwoma te ukpe ovo gbe ubro no, ọ tẹ gwọlọ nọ ọ rẹ salọ ilele ikpegbivẹ re a jọ ikọ riẹ. Kọ amono ọ te salọ evaọ udevie ilele riẹ nọ e te jọ kugbei ẹsikpobi? Kọ amono o ti wuhrẹ re a fiobọhọ kẹ ahwo nọ a ti kurẹriẹ ze na? Jesu ọ gwọlọ nọ Jihova o re fiobọhọ kẹe re ọ sae salọ ahwo na. Fikiere ọye ọvo o te kpobọ ugbehru, ọ tẹ lẹ aso okioke. Nọ oke o ke no, Jesu o te se ilele riẹ jọ, ọ tẹ jọ usu rai salọ ikọ 12. Kọ whọ kareghẹhọ edẹ rai? Edẹ rai họ Pita, Andru, Jemis, Jọn, Filip, Batolomi, Tọmọs, Matiu, Jemis ọmọ Alfiọs, Tadiọs, Saemọn, gbe Judas Iskariọt.

Andru, Pita, Filip, Jemis

Ikọ ikpegbivẹ na a te hae lele Jesu kpohọ oria kpobi nọ ọ be nya. Nọ o wuhrẹ ai no, o te vi ai nyae ta usiuwoma. Jihova ọ kẹ rai ogaga nọ a re ro le idhivẹri no ahwo oma je siwi enọ e be mọ.

Jọn, Matiu, Batolomi, Tọmọs

Jesu o se ikọ ikpegbivẹ na egbẹnyusu riẹ yọ o fievahọ ae. Ahwo Farisi na a je roro nọ ikọ Jesu na yọ ahwo gheghe yọ a  kpohọ isukulu hu. Rekọ Jesu o wuhrẹ i rai ziezi rọkẹ iruo usiuwoma ota na. Ikọ na a te jọ kugbe Jesu evaọ okenọ o mai wuzou evaọ uzuazọ riẹ, koyehọ oke uwhu riẹ gbe oke ẹkparomatha riẹ. Wọhọ Jesu, ẹwho Galili ikọ na jọ a no ze. Ejọ evaọ usu ikọ na a wo eyae no.

Jemis ọmọ Alfiọs, Judas Iskariọt, Tadiọs, Saemọn

Ikọ na yọ ahwo gheghe wọhọ omai, yọ eware e jẹ hae thọ ae obọ. Ẹsejọ dede a re roro ẹme te re a tẹ ta ha, yọ a jẹ hae jiroro thọ. Ẹsejọ a je wo odiri hi. A jẹ tubẹ vro avro kpahe ohwo nọ ọ mae rro evaọ udevie rai. Rekọ aikpobi a jọ emamọ ahwo yọ a you Jihova. Ae họ enọ i ti mu ukoko na họ jẹ kpọe nọ Jesu o te whu no.

“Me bi se owhai egbẹnyusu, keme mẹ ta eware kpobi nọ me yo mi Ọsẹ mẹ kẹ owhai no.”​—Jọn 15:15