Oke jọ nọ ohọo o jọ evaọ Izrẹl, aye Izrẹl jọ nọ a re se Naomi ọ tẹ kwa kpobọ Moab avọ ọzae riẹ gbe emezae ivẹ rai. Nọ a rria obei te oke jọ no, ọzae Naomi o te whu. Emezae ivẹ riẹ na a rehọ eyae Moab, odẹ ọjọ Rut, odẹ ọnọ o kiọkọ kọ Ọpa. Rekọ nọ oke jọ o vrẹ no, emezae ivẹ Naomi i te whu.

Nọ Naomi o yo nọ ohọo o gbẹ rrọ obọ Izrẹl he, ọ tẹ jiroro nọ o re zihe kpo. Rut avọ Ọpa a tẹ wọ lele iei, rekọ nọ a nya te oria jọ no, Naomi ọ tẹ ta kẹ ae nọ: ‘Wha jọ emamọ eyae kẹ emọ mẹ yọ wha jọ emamọ eyae kẹ omẹ re. Mẹ gwọlọ nọ wha kpo re wha wariẹ wo ezae.’ Eyae ivẹ na a tẹ ta kẹ Naomi nọ: ‘Ma you owhẹ! Ma gwọlọ nyasiọ owhẹ ba ha.’ Rekiyọ Naomi ọ gbẹ jẹ ta kẹ ae nọ a zihe kpo ghele. Kẹsena Ọpa o te gine zihe kpo, rekọ Rut ọ rọwo zihe kpo ho. Naomi ọ tẹ ta kẹ Rut nọ: ‘Ọpa o bi zihe kpo bru ahwo riẹ gbe eghẹnẹ riẹ. Lele iei zihe, zihe kpobọ uwou oni ra.’ Rekọ Rut ọ tẹ ta kẹ Naomi nọ: ‘Mẹ sae nyasiọ owhẹ ba ha. Ahwo ra a te jọ ahwo mẹ, yọ Ọghẹnẹ ra ọ te jọ Ọghẹnẹ mẹ.’ Ẹvẹ who roro nọ o jọ Naomi oma nọ Rut ọ ta ere?

Evaọ oke emuhọ ivuẹvu ebali Rut avọ Naomi a ro te obọ Izrẹl. Ẹdẹ jọ Rut ọ tẹ nyae gwọlọ ebali nọ a vu kiọkọ evaọ udhu ọzae jọ nọ a re se Boaz. Boaz yọ ọmọ Rehab. Boaz o yo nọ Rut yọ ohwo Moab nọ o lele Naomi kpozi. Ọ tẹ ta kẹ iruiruo riẹ nọ a nyasiọ ebali jọ ba udhu na re Rut ọ tọlọ.

 Evaọ owọwọ ẹdẹ yena, Naomi ọ tẹ nọ Rut nọ: ‘Udhu ono who jo ru iruo nẹnẹ?’ Rut ọ tẹ ta kẹe nọ: ‘Udhu ọzae jọ nọ a re se Boaz.’ Naomi ọ tẹ ta kẹ Rut nọ: ‘Boaz yọ omoni ọzae mẹ. Gbẹ hai lele idibo emetẹ riẹ ru iruo evaọ udhu riẹ. Ohwo ọvo o ti kpokpo owhẹ hẹ.’

Rut ọ tẹ jọ udhu Boaz ru iruo bẹsenọ ivuẹvu na kpobi i ro kuhọ. Boaz o muẹrohọ nọ Rut o re ru iruo ziezi yọ emamọ aye ọ rrọ. Evaọ oke yena, nọ ọzae aye o te whu yọ aye na o yẹ ọmọ kẹe he, omoni ọzae na jọ ọ rẹ rehọ aye na. Fikiere Boaz ọ tẹ rehọ Rut. Aimava a te yẹ ọmọzae, odẹ ọmọ na Obẹd, ọnọ o yẹ ọsẹ Devidi ovie na. Eva e were egbẹnyusu Naomi gaga. Fikiere a tẹ ta nọ: ‘Jihova ọ rehọ Rut ghale owhẹ, ọnọ ọ be rẹrote owhẹ, whaọ enẹna o yẹ ọmọzae kẹ owhẹ no. Ajọ ujiro u te Jihova.’