Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 31

Joshua avọ Ahwo Gibiọn

Joshua avọ Ahwo Gibiọn

Usi epanọ a ro fi Jeriko kparobọ u do ruọ otọ Kenan soso. Ivie Kenan a te kuomagbe re a họre emọ Izrẹl. Rekọ ahwo Gibiọn a te ru oware jọ. A te ku iwu nọ e bẹre no fihọ jẹ nyabru Joshua ze, a tẹ ta kẹe nọ: ‘Ugbothabọ ma no ze. Ma yo kpahe Jihova gbe oware nọ o ru kẹ owhai evaọ obọ Ijipti gbe evaọ obọ Moab. Wha ya eyaa kẹ omai inọ wha te họre omai hi, ma vẹ te jọ erigbo rai.’

Joshua ọ ginẹ rọwo ẹme nọ a ta na, jẹ ya eyaa nọ a te họre ai hi. Nọ edẹ esa e vrẹ no, a tẹ vuẹ Joshua nọ kpakọ ugbothabọ a no ze he. Kpakọ Kenan etenẹ a no ze. Joshua ọ tẹ nọ ahwo Gibiọn nọ: ‘Fikieme wha rọ ta ọrue kẹ omai?’ A te yo kẹe nọ: ‘Ozọ u je mu omai! Ma riẹ nọ Jihova Ọghẹnẹ rai ọ be họre kẹ owhai. Ivie wha kpe omai hi.’ Joshua o gine ru eyaa riẹ na gba jẹ kẹ ai uvẹ.

U kri hi, ivie isoi Kenan avọ egbaẹmo rai a tẹ gwọlọ nọ a re kpe ahwo Gibiọn. Rekọ Joshua avọ egbaẹmo riẹ a tẹ nya aso  okioke re a sai fiobọhọ kẹ ai. Ohọre na u muhọ evaọ irioke frifri. Ahwo Kenan a te muhọ ẹdhẹ. Oria kpobi nọ a dhẹ te, Jihova ọ jẹ rehọ oso-itho tehe ai. Kẹsena Joshua ọ tẹ yare Jihova nọ o ru ọre na daji oria ovo. Fikieme Joshua ọ rọ yare Jihova nọ o ru ọre na daji kpakiyọ ọre ọ re daji ẹdẹvo ho? Keme Joshua o fievahọ Jihova. Okpẹdoke soso ọre na o kiediwi hi bẹsenọ emọ Izrẹl a ro fi ivie Kenan gbe egbaẹmo rai kpobi kparobọ riẹriẹriẹ.

“Jọ ‘Ee’ rai o jọ Ee, ‘Ijo’ rai o jọ Ijo, keme onọ o vrẹ onana, obọ omuomu na u no ze.”​—Matiu 5:37