Kpohọ eme nọ e riẹ eva

Kpohọ oria izoẹme

Ileta nọ Utu Ẹruorote na U Kere

Ileta nọ Utu Ẹruorote na U Kere

Inievo Eghaghae:

Mai idibo Jihova, ma you Ẹme Ọghẹnẹ Ebaibol na gaga. U mu omai ẹro nọ ikuigbe Ebaibol na e rrọ gbagba, a sai fievahọ ehrẹ riẹ, yọ onana o kẹ imuẹro inọ Jihova o you omai ahwo-akpọ gaga. (Olezi 119:105; Luk 1:3; 1 Jọn 4:19) O rẹ were omai re ma fiobọhọ kẹ ahwo wuhrẹ uzẹme nọ o rrọ Ebaibol na. Fikiere, eva e were omai nọ ma ro siobọno obe okpokpọ nana, “Eware nọ Whọ rẹ Sai Wuhrẹ Evaọ Ebaibol Na.” Joma ta kpahe eware jọ nọ e rrọ obe nana.

Emaha na ma wo họ iroro ro kere obe nana. Rekọ a sae rehọ iẹe fiobọhọ kẹ ahwo nọ a kpako no nọ a gwọlọ gbe wuhrẹ kpahe Ebaibol na. Nọ orọnọ Ebaibol na yọ obe rọkẹ ahwo kpobi na, ababọ avro ma ti wo erere vọvọ nọ ma te se ikuigbe nọ e rrọ eva riẹ, yọ e te wha evawere se omai.

Obe nana o ta kpahe ikuigbe nọ e rrọ Ebaibol na no emuhọ emama vrẹ. Ma daoma kere ikuigbe Ebaibol na vevẹ evaọ oghẹrẹ nọ a sai ro wo otoriẹ rai lọlọhọ, yọ e nya lele oghẹrẹ nọ e rọ via othotha.

Rekọ orọnọ ikuigbe epanọ eware e rrọ via ọvo obe nana u gbiku rai hi. Ma kere i rie evaọ oghẹrẹ nọ eme gbe iwoho nọ e rrọ eva riẹ, i re ro fiobọhọ kẹ omai jọ iroro mai ruẹ oware nọ o be via na, gbe epanọ o jọ ahwo nọ a gbiku rai na oma.

Obe nana u ti fiobọhọ kẹ omai riẹ nọ Ebaibol na yọ obe nọ o ta kpahe oghẹrẹ ahwo sa-sa, te enọ i yoẹme kẹ Jihova gbe enọ i yoẹme kẹe he. U ti je fiobọhọ kẹ omai riẹ eware nọ ma rẹ sai wuhrẹ no iriruo rai ze. (Ahwo Rom 15:4; 1 Ahwo Kọrint 10:6) Obe  nana u wo abọ 14. Emuhọ abọ ọvuọvo o wo eme emuhọ nọ e ta kpahe eware nọ ma rẹ sai wuhrẹ no izoẹme nọ e rrọ abọ yena ze.

Whọ tẹ rrọ ọsẹ hayo oni, whọ sai se uwuhrẹ jọ kugbe ọmọ ra jẹ ta kpahe iwoho na. Kẹsena whai imava wha ve se eria Ebaibol nọ a si iku na no ze. Fiobọhọ kẹ ọmọ ra rehọ eware nọ o wuhrẹ evaọ obe na wawọ enọ o bi se evaọ Ebaibol na. Ma sai ru epọvo na re nọ ma te bi wuhrẹ obe na kugbe ahwo nọ a kpako no re a sai wo otoriẹ ikuigbe Ebaibol na ziezi.

U mu omai ẹro nọ obe nana u ti fiobọhọ kẹ ahwo kpobi nọ a gwọlọ riẹ Ọghẹnẹ, te emaha te ekpako, re a wuhrẹ Ẹme Ọghẹnẹ je fi eware nọ a bi wuhrẹ na họ iruo evaọ uzuazọ rai. Onana u ve ti fiobọhọ kẹ ai gọ Ọghẹnẹ kugbe omai.

Inievo rai,

Utu Ẹruorote Iruẹru Isẹri Jihova