Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 48

Ọmọ Aye-Uku jọ O Zihe Ziọ Uzuazọ

Ọmọ Aye-Uku jọ O Zihe Ziọ Uzuazọ

Evaọ ikpe esa gbe ubro nọ oso ọ jẹ rọ rrọ họ na, Jihova ọ tẹ ta kẹ Elaeja nọ: ‘Kpobọ Zarẹfat. Aye-uku jọ nọ ọ rrọ obei ọ te kẹ owhẹ emu.’ Nọ Elaeja ọ be nwane nya ruọ okpẹwho na, ọ tẹ ruẹ aye-uku jọ nọ ọ be gwọlọ ire. Elaeja ọ tẹ ta kẹ aye na nọ ọ kẹe ame da. Nọ aye na ọ be nyae jẹ ame ze na, Elaeja ọ tẹ jẹ ta kẹe nọ: ‘Iviena rehọ ebrẹdi jọ kugbe ze re mẹ re.’ Rekọ aye-uku na ọ tẹ ta kẹe nọ: ‘Me wo ebrẹdi evuọvo nọ mẹ sae kẹ owhẹ hẹ. Umutho eka nọ a wuhu gbe emewhri nọ o kiọkọ mẹ gwọlọ ro ru emu, re mẹ avọ ọmọ mẹ ma re.’ Elaeja ọ tẹ ta kẹe nọ: ‘Jihova ọ ya eyaa nọ whọ tẹ kẹ omẹ emu re, ewhri ra avọ eka nọ a wuhu na i ti re he bẹsenọ oso ọ te rọ wariẹ rrọ.’

Fikiere aye-uku na o te kpo je ru ebrẹdi kẹ Elaeja. Aye-uku na avọ ọmọ riẹ a ruẹ emu re bẹsenọ oso ọ rọ wariẹ rrọ nwane wọhọ epanọ Jihova ọ ya eyaa riẹ. Othẹ eka nọ a wuhu avọ ewhri na i re he.

 Rekọ oware igbunu jọ o via. Ọmọzae aye-uku na ọ tẹ jẹ mọ, kẹsena o te whu. Aye-uku na ọ tẹ lẹ Elaeja re o fiobọhọ kẹe. Elaeja ọ tẹ wọ ọmọ na mi aye na, jẹ wọe kpohọ ubruwou obehru nọ o wo họ na. Elaeja ọ tẹ rọ ọmọ na kiẹzẹ ehwa, ọ tẹ lẹ inọ: ‘Jihova, ivie ru re ọmọ nana o zihe ziọ uzuazọ.’ Kọ whọ riẹ oware nọ o rọ rrọ oware igbunu re Jihova o zihe ọmọ na ziọ uzuazọ? Keme rite oke yena, a re kpare ohwo ọvo no uwhu ze he. Yọ aye-uku nana avọ ọmọ riẹ a rrọ ahwo Izrẹl he.

Rekọ ọmọ na ọ wariẹ zihe ziọ uzuazọ, o te muhọ ẹwẹ! Elaeja ọ tẹ ta kẹ aye-uku na nọ: ‘Rri! Ọmọ ra o zihe ziọ uzuazọ no.’ Eva e were aye na gaga, fikiere ọ tẹ ta kẹ Elaeja nọ: ‘Whẹ ginọ ọruẹaro Ọghẹnẹ. Mẹ riẹ ere keme ẹme nọ Jihova ọ ta kẹ owhẹ ọvo whọ be ta.’

“Wha roro kpahe ekọlọbe: A rẹ kọ ibi hayo vu hu; a wo eru hayo uwou nọ a rẹ jọ rawo eware he; ghele na, Ọghẹnẹ ọ be kuọ ae. Kọ wha gbẹ ghare gaga vi evra?”​—Luk 12:24