Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 57

Jihova O Vi Jerimaya Nyai Whowho Ovuẹ Riẹ

Jihova O Vi Jerimaya Nyai Whowho Ovuẹ Riẹ

Jihova ọ salọ Jerimaya re ọ jọ ọruẹaro evaọ Juda. Jihova ọ ta kẹ Jerimaya nọ o whowho ovuẹ riẹ kẹ ahwo na, re ọ vẹvẹ ai unu inọ a siobọno eware iyoma nọ a bi ru. Jerimaya ọ tẹ ta nọ: ‘Jihova mẹ yọ ọmaha gheghe. Mẹ riẹ ẹme ẹta ha, yọ mẹ riẹ oware nọ mẹ te ta kẹ ahwo na gbe he.’ Jihova ọ tẹ ta kẹe nọ: ‘Ozọ u mu owhẹ hẹ. Mẹ te vuẹ owhẹ ẹme nọ whọ te ta. Me ti fiobọhọ kẹ owhẹ.’

Jihova ọ tẹ ta kẹ Jerimaya nọ o koko ekpako ahwo Izrẹl họ, re ọ jọ iraro rai rehọ omothẹ fi otọ, kẹsena ọ vẹ ta kẹ ai nọ: ‘Enẹ ọvona a te raha Jerusalẹm re.’ Nọ Jerimaya o ru epanọ Jihova ọ ta na, eva e tẹ dha ekpako Izrẹl gaga. Ozerẹ jọ nọ a re se Pashọ ọ tẹ tehe Jerimaya, kẹsena ọ tẹ kare iẹe fihọ ure bẹsenọ oke o rọ ke. Nọ oke u rie no, Pashọ o te siobọno Jerimaya. Jerimaya ọ tẹ ta nọ: ‘O bẹ omẹ no. Mẹ gbẹ te ta Ẹme Ọghẹnẹ hẹ.’ Kọ Jerimaya ọ ginẹ siọ Ẹme Ọghẹnẹ ba ẹta? Ijo. Nọ Jerimaya ọ wariẹ roro kpahe onana, ọ tẹ ta nọ: ‘Ovuẹ Jihova o wọhọ erae nọ e be to evaọ udu mẹ. Mẹ rẹ sae siọ Ẹme Ọghẹnẹ ba ẹta ha.’ Jerimaya ọ gbẹ jẹ vẹvẹ ahwo na unu ghele.

Nọ ikpe jọ e vrẹ no, ovie ọkpokpọ ọfa o te muhọ esuo evaọ Juda. Eva Jerimaya e jẹ dha izerẹ gbe eruẹaro erue na fiki ovuẹ nọ o je whowho na. A tẹ ta kẹ emọ-ivie na nọ: ‘U fo nọ a re kpe ọzae nana no.’ Jerimaya ọ tẹ ta nọ: ‘Wha te kpe omẹ, yọ wha kpe azẹ fihọ uzou. Keme ẹme Jihova mẹ be ta orọnọ ẹme obọmẹ hẹ.’ Nọ emọ-ivie na a yo ẹme nọ Jerimaya ọ ta, a tẹ ta nọ: ‘U fo nọ a re kpe ọzae nana vievie he.’

 Nọ Jerimaya o bi whowho ovuẹ na, yọ eva e be dha emọ-ivie na gaga. A tẹ ta kẹ ovie na nọ o kpe Jerimaya no. Ovie na ọ tẹ ta kẹ ai inọ a ru Jerimaya oware kpobi nọ a gwọlọ ru ei. Fikiere a te gbolo Jerimaya fihọ ozae nọ o vọ avọ ọloho, keme a gwọlọ nọ o whu fihọ etẹe. Jerimaya o te je zue ruọ ọloho na.

Ọzae jọ nọ o bi ruiruo evaọ uwou ovie na nọ a re se Ẹbẹdmẹlẹk ọ tẹ ta kẹ ovie na nọ: ‘Emọ-ivie na a gbolo Jerimaya fihọ ozae! Ma tẹ nyase iẹe ba etẹe o ti whu.’ Ovie na ọ tẹ kẹ Ẹbẹdmẹlẹk udu inọ ọ rehọ ezae 30 lele oma re a nyai si Jerimaya no eva ozae na ze. Kọ u gbe woma re ma jọ wọhọ Jerimaya, ọnọ ọ kuvẹ re oware ovo o whaha iẹe Ẹme Ọghẹnẹ ọta ha?

“Ahwo kpobi a ti mukpahe owhai fiki odẹ mẹ, rekọ ọnọ o thihakọ te urere a ti siwi ei.”​—Matiu 10:22