Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 45

Uvie nọ O Ghale Kpohọ Abava

Uvie nọ O Ghale Kpohọ Abava

Okenọ Solomọn ọ jẹ rọ gọ Jihova, udhedhẹ o jọ Izrẹl soso. Rekọ Solomọn ọ tẹ rehọ eyae erẹwho efa buobu nọ e jẹ gọ edhọ. Ẹmẹrera na, Solomọn o te nwene je mu edhọ họ ẹgọ. Eva e dha Jihova gaga. Jihova ọ ta kẹ Solomọn nọ: ‘Uvie Izrẹl u ti no uviuwou ra no, o vẹ ghale kpohọ abava. Mẹ te rehọ abọ nọ ọ mae rro kẹ odibo ra, uviuwou ra o vẹ te rehọ abọ ọkakao.’

Jihova ọ wariẹ rọ edhere ọfa dhesẹ oware nọ ọ gwọlọ ru na. Ẹdẹjọ nọ odibo Solomọn nọ a re se Jeroboam ọ jọ edhere, ọ tẹ nyaku ọruẹaro Ọghẹnẹ jọ nọ a re se Ahija. Ahija ọ tẹ ba ewu riẹ no jẹ bẹre iẹe kpohọ ewẹ 12, kẹsena ọ tẹ ta kẹ Jeroboam nọ: ‘Jihova ọ te rehọ uvie Izrẹl no uviuwou Solomọn no, ọ vẹ ghale iẹe kpohọ abava. Rehọ ewẹ ikpe keme erua ikpe who ti su.’ Nọ Solomọn o yo kpahe onana, ọ tẹ gwọlọ nọ o re kpe Jeroboam no! Fikiere Jeroboam ọ tẹ dhẹ kpobọ Ijipti nyai dhere. Nọ Solomọn o whu no, Rehoboam ọmọ riẹ o te zihe ruọ ovie. Nọ Jeroboam o yo nọ Solomọn o whu no, o te zihe ziọ obọ Izrẹl.

 Ekpako Izrẹl a tẹ ta kẹ Rehoboam nọ: ‘Whọ tẹ riẹ ahwo na ru, a ti yoẹme kẹ owhẹ.’ Rekọ egbẹnyusu Rehoboam a tẹ ta kẹe nọ: ‘Ru ahwo na gaga! Rehọ ai ruiruo vi epaọ anwẹdẹ!’ Rehoboam o te ru lele ohrẹ egbẹnyusu riẹ nọ e jọ izoge. O te gine ru akpọ bẹ ahwo na, a tẹ dhẹ se iẹe ba. Ahwo na a tẹ rehọ Jeroboam mu ovie erua ikpe, yọ erua ikpe nana a re se uvie Izrẹl. Erua ivẹ nọ i kiọkọ a re se uvie Juda, yọ erua ivẹ nana ọvo Rehoboam o je su. Whaọ obọnana erua 12 Izrẹl e ghale kpohọ abava no.

Jeroboam ọ gwọlọ nọ ahwo na a kpobọ Jerusalẹm nyae gọ Jihova ha, keme obei uvie Rehoboam o rrọ. Kọ whọ riẹ oware nọ o soriẹ? Ozọ u je mu Jeroboam inọ ahwo na a te dhẹ se iẹe ba bru Rehoboam. Fikiere ọ tẹ ma emọ iruẹ igoru ivẹ jẹ ta kẹ ahwo na nọ: ‘Jerusalẹm o thabọ hrọ. Wha jọ etẹnẹ gọ.’ Ahwo na a te mu emọ iruẹ ivẹ na họ ẹgọ, Jihova ọ tẹ thọrọ ae ẹro.

“Wha mu usu nọ u fo ho kugbe enọ e rrọ Ileleikristi hi hi. Didi usu ẹrẹreokie o wo kugbe emuemu? . . .  Hayo kọ eme ohwo nọ ọ rọwo Jesu avọ ọnọ ọ rọwo e riẹ hẹ a wo kugbe?”​—2 Ahwo Kọrint 6:14, 15