Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 20

Iye Ezeza nọ I Lele I Rie

Iye Ezeza nọ I Lele I Rie

Mosis avọ Erọn a tẹ nyae ta kẹ Fẹro nọ Ọghẹnẹ ọ ta nọ: ‘Who gbe siobọno ahwo mẹ kpo ho, me ti vi inyẹ ziọ otọ Ijipti.’ Inyẹ buobu e tẹ rra ruọ iwou ahwo Ijipti, te iwou edafe te iwou iyogbere. Inyẹ e tẹ vọ oria kpobi evaọ Ijipti. Rekọ obọ Goshẹn nọ emọ Izrẹl a jẹ rria, inyẹ na i te obei hi. No umuo uye avọ ene na vrẹ, ahwo Ijipti ọvo iye na i je te. Fẹro ọ tẹ lẹ Mosis nọ: ‘Lẹ Jihova re o si inyẹ na no, wha ve kpo.’ Rekọ nọ Jihova o si inyẹ na no, Fẹro ọ rọwo siobọno ahwo Izrẹl kpo ghele he. Kọ Fẹro o ti siobọno emọ Izrẹl kpo ẹdẹjọ?

Jihova ọ tẹ ta nọ: ‘Fẹro ọ gbẹ rọwo siobọno ahwo mẹ kpo ho, erao ahwo Ijipti i ti kie ẹyao je whu.’ Nọ oke o ke, erao ahwo Ijipti i te gine muhọ ewhu. Rekọ erao ahwo Izrẹl i whu hu. Ghele na, Fẹro o ru udu gaga, ọ rọwo siobọno emọ Izrẹl kpo ho.

Jihova ọ tẹ ta kẹ Mosis nọ ọ nyabru Fẹro, re ọ jọ iraro riẹ frẹ enwo kpehru. Enwo na o te zihe ruọ ovu nọ ọ vọ oria kpobi evaọ Ijipti. Enwo na o te bru emela fihọ ahwo Ijipti kpobi oma gbe erao rai. Rekọ Fẹro ọ rọwo siobọno emọ Izrẹl kpo ghele he.

Jihova ọ tẹ wariẹ vi Mosis bru Fẹro re ọ nyae ta kẹe nọ: ‘Whọ gbẹ be se nọ who re siobọno ahwo mẹ kpo? Odẹnotha oso-itho ọ te rrọ evaọ otọ Ijipti soso.’ No oke o ke, Jihova o te vi oso-itho,  egbrara, gbe erae ze. Oghẹrẹ oso otiọna ọ re rrọ evaọ Ijipti ẹdẹvo ho. Oso na o te kpe ire gbe ekakọ nọ e jọ Ijipti kpobi no, rekọ o te obọ Goshẹn nọ emọ Izrẹl a jẹ rria ha. Fẹro ọ tẹ ta nọ: ‘Lẹ Jihova kẹ omẹ re oso na ọ ka! Kẹsena wha ve kpo.’ Rekọ nọ oso-itho na ọ nwane ka no, Fẹro ọ se ghele nọ o re siobọno emọ Izrẹl kpo.

Mosis ọ tẹ ta kẹe nọ: ‘Ebaka e te re ekakọ kpobi nọ oso-itho na ọ raha kiọkọ.’ Ebaka buobu gbidigbidi e tẹ re ekakọ gbe ire kpobi nọ i kiọkọ otọ Ijipti no. Fẹro ọ tẹ lẹ Mosis nọ: ‘Lẹ Jihova re o si ebaka na no.’ Rekọ nọ Jihova o si ebaka na no, Fẹro ọ gbẹ gudu ghele, ọ rọwo siobọno emọ Izrẹl kpo ho.

Jihova ọ tẹ ta kẹ Mosis nọ: ‘Riẹ obọ ra rri ehru.’ Ẹsiẹvo na, oria kpobi u te mu ebi. Edẹ esa soso, a ruẹ ohwohwo ho, yọ a ruẹ oware ovo gbe he. Rekọ elo ọ jọ obonọ ahwo Izrẹl a jẹ rria.

Fẹro ọ tẹ ta kẹ Mosis nọ: ‘Whẹ avọ ahwo ra wha sai kpo. Rekọ wha nyasiọ erao rai ba.’ Mosis ọ tẹ ta kẹe nọ: ‘Ma rẹ wha erao mai lele oma, keme eye ma ti ro dhe idhe kẹ Ọghẹnẹ mai.’ Eva e tẹ dha Fẹro gaga. O te doku Mosis inọ: ‘No etenẹ no ovẹrẹ! Mẹ tẹ wariẹ ruẹ owhẹ ofa, me ti kpe owhẹ no.’

“Wha ve ti vuhu enọ ikiẹrẹe gbe iruimuomu, gbe ọnọ ọ be gọ Ọghẹnẹ gbe ọnọ ọ be gọ e he.”​—Malakae 3:18