Nọ emọ Izrẹl a no Ugbehru Saena no, a tẹ nya udhude Paran kpohọ oria nọ a re se Kedẹsh. Jihova ọ tẹ jọ etẹe ta kẹ Mosis nọ: ‘Vi ezae 12 nyae kiẹ otọ Kenan riwi, keme otọ yena mẹ te rọ kẹ owhai, yọ ọzae ọvo ọye o re no orua ze.’ Fikiere Mosis ọ tẹ salọ ezae 12, ọ tẹ ta kẹ ae nọ: ‘Wha kpobọ Kenan re wha kiẹ otọ na riwi sọ u re woma ekakọ. Wha ve je rri sọ ahwo na egba hayo eyẹlẹ, sọ a be rria iwou-idhu hayo ikpewho.’ Fikiere Joshua avọ Kelẹb gbe ekiotọ nọ i kiọkọ a te kpobọ Kenan.

Nọ edẹ 40 e vrẹ no, ekiotọ na a te zihe ze, yọ a wha ibi-ire ifigi, pomẹgraneti, gbe igrepu lele oma kpozi. A tẹ ta kẹ Mosis nọ: ‘Otọ na u re wowoma, rekọ ahwo na a rrọ gaga, yọ igbẹhẹ ikpewho rai i kpehru gaga.’ Rekọ Kelẹb ọ tẹ ta nọ: ‘Ma rẹ sai fi ai kparobọ. Wha joma nya obọnana!’ Kọ whọ riẹ oware nọ Kelẹb ọ rọ ta ere? Keme ọyomariẹ avọ Joshua a fievahọ Jihova. Rekọ ekiotọ 10 nọ i kiọkọ a tẹ ta nọ: ‘Ijo, ma nya ha! Ahwo na a rrọ ruaro wọhọ egwara! Ma tulo evaọ aro rai hi, ma wọhọ ebaka gheghe kẹ ae.’

Ozọ u te mu emọ Izrẹl gaga. A te muhọ ẹgo jẹ be ta kẹ ohwohwo nọ: ‘Joma rehọ osu ọfa mu kẹ omamai re ma zihe kpobọ Ijipti. Fikieme ma je kpobọ Kenan re a kpe omai kufiẹ?’  Joshua avọ Kelẹb a tẹ ta nọ: ‘Wha ghẹmeeyo kẹ Jihova ha, yọ ozọ u mu owhai gbe he. Jihova ọ te thọ omai.’ Rekọ emọ Izrẹl a yo ghele he. A jẹ tubẹ gwọlọ epanọ a re ro kpe Joshua avọ Kelẹb!

Kọ eme Jihova o ru? Jihova ọ tẹ ta kẹ Mosis nọ: ‘Ghelọ eware kpobi nọ me ru kẹ owhai no na, emọ Izrẹl a bi yoẹme kẹ omẹ ghele he. Fiki onana, a te rria igbrẹwọ nana ikpe 40 soso, yọ igbrẹwọ nana a ti whu fihọ. Emọ rai ọvo gbe Joshua avọ Kelẹb a te ruọ otọ nọ mẹ ya eyaa riẹ kẹ owhai na.’

“Fikieme ozọ u bi ro mu owhai ga tere, whai enọ i wo ẹrọwọ ọkakao?”​—Matiu 8:26