Okenọ Mosis ọ jọ obọ Ugbehru Saena, Jihova ọ tẹ ta kẹe inọ ọ bọ oghẹrẹ uwou jọ nọ a re se uwou-udhu, oria nọ emọ Izrẹl a sae jọ gọe. A rẹ sae wọ uwou-udhu na lele oma evaọ okenọ a tẹ be nya no oria ruọ oria.

Jihova ọ tẹ ta kẹ Mosis nọ: ‘Ta kẹ ahwo na re a zọhọ eware nọ a sae rọ bọ uwou-udhu na.’ Emọ Izrẹl a tẹ zọhọ igoru, isiliva, ẹroo, itho eghaghae, gbe emero buobu. A tẹ jẹ zọhọ ilulu, ehọ elọlọhọ, oviẹ-erao, gbe eware efa buobu. Eware nọ a zọhọ i bu te epanọ Mosis ọ rọ ta kẹ ai inọ: ‘Eware na i te no! Wha gbẹ rọ ze he.’

Ezae gbe eyae buobu nọ i wo onaa sa-sa, ae a fiobọhọ bọ uwou-udhu na. Jihova ọ kẹ rai areghẹ nọ a sae rọ bọ uwou-udhu na. Ejọ i je zuo ilulu, gbe ehọ elọlọhọ. Efa e jẹ bẹre itho, ghra igoru, yọ ejọ e jẹ kare ire.

Ahwo na a bọ uwou-udhu na wọhọ epanọ Jihova ọ ta kẹ ae. A rehọ ekọtini owowoma jọ ghale uwou-udhu na kpohọ abava, a re se abọjọ Ọrẹri, yọ a re se abọ nọ o kiọkọ Ọrẹri Erẹri. Abọ Ọrẹri Erẹri na a wọ etehe-ọvo na họ, yọ igoru gbe ure akasia a ro ku ei. Whọ rẹ jọ abọ Ọrẹri na ruẹ ukpẹ-adada nọ a rehọ igoru ru, emẹjẹ, gbe agbada-idhe nọ a rẹ jọ mahe insẹnse. Whọ rẹ jọ etegu uwou-udhu na ruẹ odhe nọ a rehọ ẹroo ru, gbe agbada-idhe ologbo. Etehe-ọvọ na ọ rẹ kareghẹhọ emọ Izrẹl eyaa nọ a ya kẹ Jihova inọ ọye ọvo a re yoẹme kẹ. Kọ whọ riẹ  oware nọ a re se ọvọ? Ọvọ yọ eyaa nọ i wuzou gaga.

Jihova ọ tẹ salọ Erọn avọ emezae riẹ re a jọ izerẹ nọ i re ruiruo evaọ uwou-udhu na. Ae a rẹ rẹrote uwou-udhu na jẹ jọ eva riẹ dhe idhe kẹ Jihova. Erọn ozerẹ okpehru na ọvo a kuvẹ re ọ ruọ oria Ọrẹri Erẹri na. Ọ rẹ ruọ oria Ọrẹri Erẹri na ẹsiẹvo ẹgbukpe re o dhe idhe izieraha rọkẹ omariẹ, uviuwou riẹ, gbe orẹwho Izrẹl soso.

Anwọ ẹgbukpe soso ọna nọ emọ Izrẹl a ro no igbo Ijipti ze jẹ bọ uwou-udhu na re. Whaọ obọnana a wo oria nọ a rẹ jọ gọ Jihova no.

Oruaro Jihova o tẹ vọ uwou-udhu na soso, je ru ẹgho romavia evaọ ehru riẹ. Nọ ẹgho na ọ tẹ rrọ ehru uwou-udhu na, emọ Izrẹl a re no oria nọ a wo họ na ha. Rekọ nọ ẹgho na ọ tẹ kpama, a vẹ riẹ nọ okenọ a re ro kpohọ oria ofa u te no. A vẹ kpare uwou-udhu na no, kẹsena a ve mu ẹgho na họ ẹnya lele.

“Kẹsena me te yo urru oruarua jọ nọ u do no agbara-uvie na ze nọ o ta nọ: ‘Rri! Uwou Ọghẹnẹ o te jọ udevie ahwo-akpọ, ọ te rria kugbe ae, yọ a te jọ ahwo riẹ.’”​—Eviavia 21:3