Ilai Ozerẹ Okpehru na o wo emezae ivẹ nọ e jọ izerẹ evaọ uwou Ọghẹnẹ. Edẹ emezae ivẹ na họ Hofini avọ Finihas. A je yoẹme kẹ Jihova ha, yọ a je ru ahwo eware iyoma. Nọ emọ Izrẹl a tẹ nyaze ti dhe idhe kẹ Jihova, Hofini avọ Finihas a vẹ rehọ emamọ abọ evaọ arao nọ a gwọlọ ro dhe idhe na. Ilai o yo kpahe eware nọ emọ riẹ a bi ru na, rekọ o ru oware ovo kpahe iẹe he. Kọ Jihova ọ te kẹ ai uvẹ re a hai ru enenẹ ọvo?

Dede nọ Samuẹle ọ maha vi Hofini avọ Finihas, ọ rọ aro kele ai hi. Eva Samuẹle e were Jihova. Aso ẹdẹjọ nọ Samuẹle ọ jọ owezẹ, o te yo urru jọ nọ u se odẹ riẹ. Ọ tẹ kpama jẹ dhẹ bru Ilai, ọ tẹ ta kẹ Ilai nọ: ‘Mẹ nyaze no!’ Rekọ Ilai ọ tẹ ta kẹe nọ: ‘Me se owhẹ hẹ. Wariẹ zihe nyai kiẹzẹ.’ Samuẹle ọ tẹ wariẹ nyai kiẹzẹ. Urru na o tẹ wariẹ sei. Nọ Samuẹle ọ wariẹ yo urru na orọ avọ isiasa, Ilai ọ tẹ riẹ nọ Jihova o bi se Samuẹle na. Ilai ọ tẹ ta kẹ Samuẹle nọ ọ tẹ wariẹ yo urru na, jọ ọ ta nọ: ‘Ivie ta ze, Jihova. Odibo ra o bi yo.’

Samuẹle ọ tẹ wariẹ nyai kiẹzẹ. Kẹsena o te yo urru na nọ o wariẹ sei: ‘Samuẹle! Samuẹle!’ O te yo nọ: ‘Ivie ta ze keme  odibo ra o bi yo.’ Jihova ọ tẹ ta kẹe nọ: ‘Ta kẹ Ilai nọ mẹ te kẹe avọ uviuwou riẹ uye. Ọ riẹ nọ emọ riẹ a bi ru eware iyoma evaọ uwou mẹ, rekọ o bi ru oware ovo kpahe iẹe he.’ Nọ oke o ke, Samuẹle o te rovie ethẹ uwou Ọghẹnẹ wọhọ epanọ o re ru vẹre na. Ozọ u je mu ei re ọ vuẹ Ilai uwou nọ Jihova o vi rie na. Rekọ Ilai o te se Samuẹle jẹ nọe nọ: ‘Ọmọ mẹ, eme Jihova ọ ta kẹ owhẹ? Vuẹ omẹ oware kpobi.’ Fikiere Samuẹle ọ tẹ vuẹ Ilai oware kpobi nọ Jihova ọ ta kẹe.

Jihova ọ jọ kugbe Samuẹle nọ ọ be rro ze na. Evaọ otọ Izrẹl soso, emọ Izrẹl a riẹ nọ Jihova ọ salọ Samuẹle re ọ jọ ọruẹaro gbe obruoziẹ.

“Kareghẹhọ ọnọ ọ ma owhẹ evaọ oke ọmoha ra.”​—Ọtausiuwoma Na 12:1