Kpohọ eme nọ e riẹ eva

Kpohọ oria izoẹme

 UWUHRẸ AVỌ 76

Jesu O Ru Etẹmpol na Fo

Jesu O Ru Etẹmpol na Fo

Evaọ amara Asa hayo Ane ọrọ ukpe 30 C.E., Jesu o te kpobọ Jerusalẹm. Ahwo buobu a ziọ Jerusalẹm rọkẹ Ehaa Ọnyavrẹ na. Usu eware jọ nọ a re ru evaọ ehaa na họ, erao nọ a re ro dhe idhe evaọ etẹmpol na. Ahwo jọ a rẹ wha erao lele oma, yọ amọfa a rẹ dẹ erao evaọ Jerusalẹm.

Nọ Jesu o kpohọ etẹmpol na, ọ tẹ ruẹ nọ ahwo a be zẹ erao evaọ eva riẹ. A be thueki evaọ uwou nọ u fo nọ a rẹ jọ gọ Jihova! Kọ eme Jesu o ru? O te zuo oviaviẹ ifi, o te le igodẹ gbe iruẹ nọ a jẹ zẹ evaọ etẹmpol na ruọ otafe. O te gele emẹjẹ inwene-igho na kie, je ku igho rai fihọ otọ. Jesu ọ tẹ ta kẹ enọ e jẹ zẹ  irueruẹ na nọ: ‘Wha wọ eware nana no etenẹ! Wha gbe ru uwou Ọsẹ mẹ họ uwou eki hi!’

Oware nọ Jesu o ru na u gbe ahwo kpobi nọ a jọ etẹmpol na unu gaga. Ilele riẹ a tẹ kareghẹhọ eruẹaruẹ nọ e ta kpahe Mesaya na inọ: ‘Ọwhọ kẹ uwou ra ọ te da omẹ oma fia.’

Nọ oke jọ o vrẹ no evaọ ukpe 33 C.E., Jesu ọ tẹ wariẹ ru etẹmpol na fo orọ avivẹ. Ọ gwọlọ nọ ohwo ọvo ọ jọ uwou Ọsẹ riẹ ru ugberuo ho.

“Wha sae gbodibo kẹ Ọghẹnẹ gbe Efe he.”​—Luk 16:13