Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 18

Ure nọ O be Ware Erae

Ure nọ O be Ware Erae

Mosis ọ rria Midian ikpe 40 soso. Ọ jọ obei wo aye je yẹ emọ. Ẹdẹjọ nọ ọ jẹ rẹrote igodẹ riẹ kele ugbehru Saena, ọ tẹ ruẹ oware jọ nọ u gbe rie unu gaga. Ọ ruẹ ure nọ o be ware erae rekiyọ o be to ho! Nọ Mosis ọ nya kẹle ure na re ọ ruẹ oware nọ o be via, o te yo urru jọ nọ o ta ẹme no udevie erae na ze inọ: ‘Mosis! Whọ nya kẹle erae na ha. Si eviẹ ra no keme otọ nọ who dikihẹ na otọ ọrẹri.’ Jihova ọ jẹ rọ ẹkwoma enjẹle ta ẹme kẹ Mosis na.

Ozọ u te mu Mosis gaga, fikiere o te ruru ovao riẹ. Urru na o tẹ ta nọ: ‘Mẹ be ruẹ uye nọ emọ Izrẹl a be ruẹ. Me ti siwi ai no obọ ahwo Ijipti, jẹ rehọ ae ziọ otọ nọ o rrọ wowoma. Whẹ họ ohwo nọ o ti su ai no Ijipti ze.’ Onana u gbe Mosis unu gaga.

Mosis ọ tẹ nọ inọ: ‘Otẹrọnọ a nọ omẹ nọ ono o vi omẹ ze, kọ ẹvẹ mẹ te ta?’ Ọghẹnẹ o te yo kẹe inọ: ‘Ta kẹ ae nọ Jihova Ọghẹnẹ Abraham, Ọghẹnẹ Aiziki, gbe Ọghẹnẹ Jekọp o vi owhẹ ze.’ Mosis ọ tẹ ta nọ: ‘Kọ ahwo na a gbẹ gaviezọ kẹ omẹ hẹ?’ Jihova o te dhesẹ oware jọ kẹ Mosis nọ o re ru re ahwo na a rọwo nọ Ọghẹnẹ o vi rie ze. Ọ ta kẹ Mosis nọ o gbolo ọkpọ riẹ fihọ otọ. Ọkpọ na o te zihe ruọ araomuomu! Nọ Mosis o kru uweli araomuomu na, o tẹ wariẹ zihe ruọ ọkpọ. Jihova ọ tẹ ta nọ: ‘Who te dhesẹ oka nana kẹ emọ Izrẹl, a te riẹ nọ me vi owhẹ ze.’

Mosis ọ tẹ ta nọ: ‘Whaọ mẹ riẹ ẹme ẹta ha.’ Jihova ọ tẹ ta kẹe nọ: ‘Mẹ te vuẹ owhẹ ẹme nọ whọ te ta, yọ me ti vi Erọn oniọvo ra lele owhẹ re o fiobọhọ kẹ owhẹ.’ Nọ Mosis ọ riẹ nọ Ọghẹnẹ ọ rrọ kugbei no, ọ tẹ rehọ aye gbe emọ riẹ a te zihe kpobọ Ijipti.

“Wha du ruawa ẹme nọ wha rẹ ta gbe epanọ wha te rọ tae he, keme a te kẹ owhai ẹme nọ wha te ta evaọ auwa yena.”​—Matiu 10:19