Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 21

Uye Avọ Ikpe Na

Uye Avọ Ikpe Na

Mosis ọ ta kẹ Fẹro nọ ọ te gbẹ wariẹ nyabru ei ze he. Rekọ taure o te no ọgwa Fẹro, ọ tẹ ta kẹ Fẹro nọ: ‘Evaọ aso nana, ọmọ ọkpako ohwo Ijipti kpobi o ti whu, makọ ọmọ ọkpako Fẹro hayo ọrọ ọrigbo riẹ.’

Jihova ọ tẹ ta kẹ emọ Izrẹl nọ a re emu obọdẹ jọ. Ọ ta kẹ ae inọ: ‘Wha kpe ogodẹ ọzae hayo ẹwẹ ọzae nọ ọ rrọ ukpe ovo, re wha rehọ azẹ riẹ wholo unuẹthẹ rai. Wha rehọ iẹe tọ re wha re iẹe avọ ebrẹdi nọ e kare ẹvi. Wha ku iwu rai họ je ku eviẹ rai họ, re wha ruẹrẹ oma kpahe. Aso ọnana me ti si owhai no igbo.’ Kọ eva e gbẹ were emọ Izrẹl gaga?

Evaọ udevie aso, enjẹle Jihova ọ tẹ nya iwou ahwo Ijipti kpobi wariẹ. Uwou kpobi nọ a rọ azẹ wholo unuẹthẹ riẹ hẹ, enjẹle na o kpe ọmọ ọkpako nọ ọ rrọ uwou yena. Rekọ enjẹle na ọ nyavrẹ uwou kpobi nọ a rọ azẹ wholo unuẹthẹ riẹ. Evaọ iwou ahwo Ijipti kpobi, te edafe te iyogbere, ọmọ ọkpako rai o whu. Rekọ emọ ahwo Izrẹl i whu hu.

Makọ ọmọ ọkpako Fẹro o whu re. O da Fẹro gaga nọ ọmọ riẹ o whu. O te se Mosis avọ Erọn jẹ ta kẹ ae inọ: ‘Wha kwa ewha rai wha kpo. Wha nyae gọ Ọghẹnẹ rai. Wha wha erao rai lele oma!’

 Evaọ aso yena nọ ọvẹre o bi lo na, emọ Izrẹl a tẹ nya no Ijipti, yọ a ruẹrẹ rai họ unuwou avọ unuwou gbe orua avọ orua. Ezae Izrẹl nọ i no Ijipti a bu te idu egba ezeza (600,000), avọ eyae gbe emaha buobu. Ahwo Ijipti buobu dede a lele emọ Izrẹl re a gọ Jihova re. Whaọ enẹna ahwo Izrẹl a no igbo no!

Kukpe kukpe emọ Izrẹl a rẹ re oghẹrẹ emu nọ a re nọ a je no Ijipti. A jẹ hae rọ emu nana kareghẹhọ oghẹrẹ nọ Jihova o ro siwi ai no igbo Ijipti. A je se onana Ehaa Ọnyavrẹ.

“Fiki onana me ro vu owhẹ wa uzuazọ: re mẹ rọ ẹkwoma ra dhesẹ ogaga mẹ via, gbe re a jọ otọakpọ na soso whowho odẹ me.”​—Ahwo Rom 9:17