Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 17

Mosis Ọ Salọ nọ Ọ rẹ Gọ Jihova

Mosis Ọ Salọ nọ Ọ rẹ Gọ Jihova

Evaọ obọ Ijipti, a je se uviuwou Jekọp emọ Izrẹl. Nọ Jekọp avọ Josẹf a whu no, Fẹro ọfa o te muhọ esu. Ozọ u je mu ei inọ emọ Izrẹl a te ga vi ahwo Ijipti. Fikiere Fẹro nana o te zihe emọ Izrẹl ruọ erigbo. Ọ gba rai họ nọ a ma eblọko je ruiruo evaọ idhu ahwo Ijipti. Rekọ epanọ ahwo Ijipti a gba emọ Izrẹl họ ruiruo te, ere emọ Izrẹl a bu ga te. Fikinọ o were Fẹro ho, o te juzi nọ ohwo Izrẹl o te yẹ ọmọzae, jọ a kpei no. Dai roro kpahe epanọ ozọ u mu emọ Izrẹl te fiki uzi nana!

Aye Izrẹl jọ nọ a re se Jokebẹd o te yẹ ọmọzae, yọ ọmọ na o wo erru gaga. Re a siọ ọmọ na ba ekpe, ọ tẹ wọ ọmọ na họ ekete, kẹsena o te si ei no họ udevie ikpoko evaọ akotọ ethẹ Naele. Oniọvo ọmọ na nọ a re se Miriam o te dhere akotọ re ọ ruẹ oware nọ o te via.

Nọ ọmọtẹ Fẹro ọ nyaze te họ evaọ ethẹ na, ọ tẹ ruẹ ekete na. Nọ ọ ruẹ ọmọ nọ ọ rrọ ekete  na be viẹ, ohrọ ọmọ na o tẹ riẹe gaga. Miriam ọ tẹ nọ ọmọtẹ Fẹro nọ: ‘Kọ mẹ nyai se aye jọ ze re ọ yọrọ ọmọ na kẹ owhẹ?’ Nọ ọmọtẹ Fẹro ọ ta nọ ee, Miriam ọ tẹ nyai se Jokebẹd oni riẹ ze. Ọmọtẹ Fẹro ọ tẹ ta kẹ Jokebẹd nọ: ‘Wọ ọmọ na kpo re whọ yọrọ iẹe kẹ omẹ, mẹ te hwosa kẹ owhe.’

Nọ ọmọ na ọ rro no omojọ, Jokebẹd ọ tẹ rehọ iẹe se ọmọtẹ Fẹro. Ọmọtẹ Fẹro o te se odẹ ọmọ na Mosis jẹ yọrọ iẹe wọhọ ọmọ obọriẹ. Mosis o te zihe ruọ ọmọ-ovie, yọ oware kpobi nọ ọ gwọlọ u re tei obọ. Rekọ Jihova ọ thọrọ Mosis ẹro ho. Ọ riẹ nọ ọyomariẹ yọ ohwo Izrẹl orọnikọ ohwo Ijipti hi. Ọ tẹ salọ nọ ọ rẹ gọ Jihova.

Nọ Mosis o te ikpe 40 no, ọ tẹ gwọlọ nọ o re fiobọhọ kẹ ahwo riẹ. Ẹdẹjọ nọ ọ ruẹ ohwo Ijipti nọ ọ be họre ohwo Izrẹl, Mosis o te kpe ohwo Ijipti na no. Kẹsena ọ tẹ whẹ ẹkpẹ ruru ori ohwo Ijipti na. Nọ Fẹro o yo kpahe oware nana, ọ tẹ gwọlọ nọ o re kpe Mosis. Rekọ Mosis ọ tẹ dhẹ kpobọ ẹwho nọ a re se Midian. Jihova ọ rẹrotei evaọ obei.

“Fiki ẹrọwọ [Mosis] . . . ọ rọwo nọ a sei ọmọzae ọmọtẹ Fẹro ho, ọ salọ nọ a rẹ lahiẹ iẹe kugbe ahwo Ọghẹnẹ.” ​Ahwo Hibru 11:24, 25