Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 94

Ẹzi Ọfuafo O Te Ilele na Obọ

Ẹzi Ọfuafo O Te Ilele na Obọ

Nọ Jesu o zihe kpobọ odhiwu te edẹ ikpe no, ẹzi ọfuafo na o te te ilele riẹ obọ. Onana o via evaọ ẹdẹ Pẹntikọst 33 C.E., nọ ahwo buobu a no eria sa-sa ze ti ru ehaa evaọ Jerusalẹm. Ilele nọ i bu te oware wọhọ udhozeza (120) a kokohọ ubruwou ehru jọ evaọ Jerusalẹm. Idudhe na, oware igbunu jọ o tẹ via. Oware jọ nọ o wọhọ ukulu erae u te dikihẹ ehru uzou ilele na omomọvo, aikpobi a te mu evẹrẹ sa-sa họ ẹjẹ. Edo nọ ọ wọhọ ofou ọgaga ọ tẹ vọ uwou na kpobi.

Nọ erara nọ i no ewho sa-sa ziọ Jerusalẹm a yo edo na, a tẹ dhẹ ze te ruẹ oware nọ o be via. U gbe rai unu gaga nọ a ruẹ ilele na nọ a be jẹ evẹrẹ sa-sa. A tẹ ta nọ: ‘Obọ Galili ahwo nana a no ze. Kọ ẹvẹ a be sae rọ jẹ evẹrẹ mai?’

Pita gbe ikọ nọ i kiọkọ na a te dikihẹ aro ogbotu na. Pita ọ tẹ vuẹ ahwo na epanọ a ro kpe Jesu gbe epanọ Jihova ọ rọ kpare iẹe no uwhu ze. Pita ọ tẹ ta nọ: ‘Obọnana Jesu ọ rrọ  obọze Ọghẹnẹ evaọ obọ odhiwu, yọ ọye o ku ẹzi na ku omai, oye wha be rọ ruẹ je yo eme nọ ẹzi na ọ be wọ omai ta na.’

Eme Pita na i duobọte ahwo na udu gaga, a tẹ ta nọ: “Kọ eme ma re ru?” Ọ tẹ ta kẹ ai nọ: ‘Wha kurẹriẹ no izieraha rai re wha họ-ame evaọ odẹ Jesu. Ẹzi ọfuafo na o ve ti te owhai obọ re.’ Eva ẹdẹ ọyena, ahwo nọ a bu te oware wọhọ idu esa (3,000) soso ae a họ-ame. No umuo ẹdẹ yena vrẹ, ilele na a te muhọ evihọ evaọ Jerusalẹm. Ẹzi ọfuafo na o fiobọhọ kẹ ikọ na rọ ikoko buobu mu, re a sai wuhrẹ ilele na eware kpobi nọ Jesu o juzi rai kẹ ai.

“Whọ tẹ jọ ẹgbede rọ unu ra whowho inọ Jesu họ Olori, je wo ẹrọwọ evaọ udu ra inọ Ọghẹnẹ ọ kpare riẹ no uwhu ze, a ti siwi owhẹ.”​—Ahwo Rom 10:9