Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 9

A Yẹ Ọmọ No!

A Yẹ Ọmọ No!

Abraham avọ Sera a rọo te ikpe buobu no. A nyasiọ emamọ uwou rai ba evaọ obọ ẹwho Ọr, a tẹ be rria uwou-udhu. Rekọ Sera o je muofu hu, keme o fievahọ Jihova.

Sera ọ gwọlọ nọ o re yẹ ọmọ, fikiere ọ tẹ ta kẹ Abraham nọ: ‘Hega odibo-ọmọtẹ mẹ o te yẹ ọmọ, yọ me wo ọmọ no.’ U kri hi, Hega o te yẹ ọmọzae. Odẹ riẹ Ishmẹl.

Nọ ikpe buobu e vrẹ no, okenọ Abraham ọ jọ ikpe 99, yọ Sera ọ rrọ ikpe 89, erara esa jọ i te weze bru ai ze. Abraham o te zizie ai nọ a wẹriẹ re a serihọ evaọ otọ ure jọ, jẹ re ememu. Kọ whọ riẹ ahwo nọ erara na a jọ? Erara na yọ ijẹle! A ta kẹ Abraham nọ: ‘Oke utiona evaọ ukpe notha, aye ra o ti yẹ ọmọzae.’ Sera ọ jẹ jọ eva uwou-udhu na yo ẹme nọ a be ta na. Sera ọ tẹ hwẹ jẹ ta kẹ omariẹ nọ: ‘Kọ mẹ sai gbe yẹ ọmọ nọ mẹ who no na?’

Ukpe nọ u lele i rie, Sera o te gine yẹ ọmọzae wọhọ epanọ ijẹle Jihova a ta na. Abraham o te se odẹ ọmọ na Aiziki, yọ otofa odẹ na họ “ọhwehwẹ.”

 Okenọ Aiziki ọ jọ oware wọhọ ikpe isoi, Sera ọ tẹ ruẹ nọ Ishmẹl ọ be rọ Aiziki zaharo. Fikinọ Sera ọ gwọlọ thọ ọmọ riẹ, ọ tẹ ta kẹ Abraham nọ o le Hega avọ Ishmẹl no uwou na. Evaọ oke ọsosuọ, o were Abraham hu. Rekọ Jihova ọ tẹ ta kẹ Abraham nọ: ‘Gaviezọ kẹ Sera. Mẹ te rẹrote Ishmẹl. Rekọ ẹkwoma Aiziki me ti ro ru eyaa nọ mẹ ya kẹ owhẹ na gba.’

“Fiki ẹrọwọ, a kẹ Sera ogaga nọ o ro dihọ, . . . keme o rri Ọnọ ọ ya eyaa na inọ o re ru ẹme riẹ gba.”​—Ahwo Hibru 11:11