Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 87

Emu Owọwọ Jesu

Emu Owọwọ Jesu

Ahwo Ju a re ru Ehaa Ọnyavrẹ evaọ edẹ 14 amara Nisan kukpe kukpe. Onana o jẹ hae kareghẹhọ ae epanọ Jihova o ro siwi ae no igbo Ijipti jẹ rehọ ae ziọ Ẹkwotọ Eyaa na. Evaọ ukpe 33 C.E., Jesu avọ ikọ riẹ a ru Ehaa Ọnyavrẹ na evaọ uwou ehru jọ evaọ obọ Jerusalẹm. Nọ Ehaa Ọnyavrẹ na i bi te ekuhọ no, Jesu ọ tẹ ta nọ: ‘Omọvo rai jọ o ti vivie omẹ.’ Akpọ o te gbe ikọ na unu, a tẹ nọ Jesu nọ: ‘Ono họ ohwo ọyena?’ Jesu ọ tẹ ta nọ: ‘Ohwo nọ mẹ te rọ ebrẹdi nana kẹ na.’ Ọ tẹ rehọ ẹwẹ ebrẹdi na kẹ Judas Iskariọt. Judas ọ tẹ nwane kpama, je no eva uwou na no.

Nọ Jesu ọ lẹ no, o te bru ebrẹdi na ibribro, jẹ rehọ iẹe kẹ ikọ riẹ nọ i kiọkọ. Ọ tẹ ta nọ: ‘Wha re ebrẹdi nana, keme u dikihẹ kẹ omamẹ, onọ mẹ te rọ kẹ fiki rai.’ Ọ tẹ jẹ lẹ fihọ udi na, ọ tẹ rehọ iẹe kẹ ikọ riẹ. Ọ tẹ ta nọ: ‘Wha da udi na, keme u dikihẹ kẹ azẹ mẹ, onọ u ti hwẹ fiki izieraha rai. Mẹ be vuẹ owhai nọ wha ti lele omẹ su evaọ obọ odhiwu. Wha hai ru onana rọ kareghẹhọ omẹ kukpe kukpe.’ Ilele Jesu a gbẹ be hai kuomagbe ru oyena kukpe kukpe. Enẹna a re se omaukugbe yena Emu Owọwọ Olori Na.

 Nọ a re emu na no, ikọ na a tẹ jẹ vravro kpahe ohwo nọ ọ mai rro evaọ udevie rai. Rekọ Jesu ọ tẹ ta kẹ ae nọ: ‘Ohwo nọ ọ mae rro evaọ udevie rai họ ọnọ ọ rẹ romakpotọ, je rri omariẹ wọhọ ọnọ ọ mae kawo evaọ udevie rai.

‘Whai yọ egbẹnyusu mẹ. Mẹ te vuẹ owhai eware kpobi nọ Ọsẹ mẹ ọ gwọlọ nọ mẹ vuẹ owhai. Uviemenẹ me ti zihe bru Ọsẹ mẹ evaọ obọ odhiwu. Wha te gbẹ jariẹ, yọ uyoyou nọ o te jọ udevie rai a te rọ riẹ nọ whai yọ ilele mẹ. Wha you ohwohwo wọhọ epanọ me you owhai na.’

Ukuhọ riẹ, Jesu ọ tẹ lẹ se Jihova inọ ọ thọ ilele na kpobi. Ọ yare Jihova re ilele riẹ a ru iruo kugbe avọ udhedhẹ. Ọ lẹ re a ru odẹ Jihova fo. Jesu avọ ilele riẹ a tẹ so ile jiri Jihova taure a tẹ ruọ otafe. Okenọ a ti ro mu Jesu o kẹle no.

“Ozọ u mu owhai hi, uthuru okakao, keme o ruọ Ọsẹ rai no inọ ọ rẹ kẹ owhai Uvie na.”​—Luk 12:32